వాళ్ళిద్దరికీ మోహన్‌బాబు క్షమాపణ చెప్పాల్సిందే: నాగబాబు

కులాంతర, మతాంతర వివాహాలు జరుగుతున్న ఈ రోజుల్లో, కులం పేరు చెప్పి ఇంకా కొందరు రాజకీయాలు చేయాలనుకోవడం, ఆ రాజకీయాల్ని సినీ పరిశ్రమకు ఆపాదించడం హేయమని సినీ నటుడు, నిర్మాత కొణిదెల నాగబాబు అభిప్రాయపడ్డారు.

ఓ ఛానల్ చర్చా కార్యక్రమంలో, చిరంజీవి కుటుంబానికి కులం ఆపాదించడం సరికాదనీ, అలాగే మోహన్‌బాబు కుటుంబానికి సైతం కులం ఆపాదించడాన్ని తాను సమర్థించనని నాగబాబు చెప్పుకొచ్చారు. అయితే, మూవీ ఆర్టిస్ట్స్ అసోసియేషన్ ఎన్నికల నేపథ్యంలో జరిగిన రచ్చ మాత్రం అత్యంత బాధాకరమని అన్నారు నాగబాబు.

సీనియర్ నటుడు బెనర్జీని బూతులు తిట్టడం, అలాగే యువ నటుడు తనీష్ మీదా తిట్ల వర్షం కురిపించడం మోహన్‌బాబు లాంటి సీనియర్ నటుడికి తగదని నాగబాబు చెప్పుకొచ్చారు. ఒకే ప్యానల్ పూర్తిగా గెలిస్తే, ఏ నిర్ణయం విషయంలో అయినా, అధ్యక్షుడి మాట చెల్లుబాటు అవుతుందనీ, ఆ కోణంలోనే ప్రకాష్ రాజ్ ప్యానల్ నుంచి గెలిచినవారంతా, మంచు విష్ణు ప్యానెల్‌కి లైన్ క్లియర్ చేస్తూ రాజీనామాలు ఇచ్చారని నాగబాబు అభిప్రాయపడ్డారు.

‘మా’ అధ్యక్షుడిగా మంచు విష్ణుకి ఇకపై ఎలాంటి ఆటంకాలూ వుండవని చెప్పిన నాగబాబు, ఎన్నికల నేపథ్యంలో ఇచ్చిన హామీల్ని నెరవేర్చే దిశగా పనిచేస్తాడని ఆశిస్తున్నట్లు చెప్పారు. కాగా, ఈ మొత్తం వ్యవహారంలో మోహన్ బాబు తీరు సరిగ్గా లేదన్న నాగబాబు వెంటనే బెనర్జీ, తనీష్‌లకు క్షమాపణ చెప్పి వివాదానికి ముగింపు పలకాలని మోహన్ ‌బాబుని డిమాండ్ చేశారు.

‘మా’ సభ్యత్వానికి రాజీనామా చేయడం వెనుక చాలా ఆలోచన జరిగిందన్న నాగబాబు, ప్రాంతీయ వాదంతో సంకుచిత కోణంలో ఆలోచించేవారు ‘మా’ అధ్యక్ష పదవిలో వున్నప్పుడు, వారి నేతృత్వంలో ‘మా’ నడుస్తున్నప్పుడు, తనలాంటి విశాల భావాలున్నవారు అందులో వుండడం సరికాదు గనుకనే, తాను ‘మా’ సభ్యత్వానికి రాజీనామా చేసినట్లు చెప్పారు నాగబాబు.

చిరంజీవి ఏనాడూ పెద్దరికం తీసుకోలేదనీ, సాయం కోరి ఎవరు వచ్చినా చిరంజీవి చేతనైనంతవరకు సాయం చేయడమో, ఆయా సమస్యలకు పరిష్కారం చూపడమో చేశారు తప్ప, పెదరాయుడిలా తీర్పులు ఇచ్చే పని చేయలేదని నాగబాబు వ్యాఖ్యానించడం గమనార్హం.