Mr.Bachchan: ‘షాక్’తో జన్మ.. ‘మిరపకాయ్’తో పునర్జన్మ ఇచ్చారు రవితేజ.. నేనీరోజు ఈ స్థాయిలో ఉండటానికి కారణం ఆయనే’నని దర్శకుడు హరీశ్ శంకర్ అన్నారు. తన దర్శకత్వంలో రవితేజ-భాగ్యశ్రీ బోర్సే జంటగా తెరకెక్కించిన సినిమా మిస్టర్ బచ్చన్. సినిమా ఆగష్టు 15న విడుదలవుతున్న సందర్భంగా కర్నూలులో ప్రీ-రిలీజ్ వేడుక నిర్వహించారు. ఈ సందర్భంగా హరీశ్ మాట్లాడుతూ..
‘మిరపకాయ్, మిస్టర్ బచ్చన్ సినిమా టైటిల్స్ పెట్టింది రవితేజ. జీవితాన్నీ.. సినిమాలనీ ఇచ్చారు. సినిమాకు ఓన్లీ హోప్ క్యాప్షన్. అది సినిమాకే కాదు.. నా జీవితానికి కూడా. నా రైటింగ్ టీమ్ నా బలం. భాస్కరభట్ల, కాసర్ల శ్యామ్, వనమాలి మంచి పాటలు రాశారు. నిర్మాత విశ్వప్రసాద్ అడిగినదానికంటే ఎక్కువే ఇచ్చారు. సినిమా మీ అందరికీ నచ్చుతుంద’ని అన్నారు.
రవితేజ మాట్లాడుతూ.. ‘హరీశ్-నా కాంబినేషన్లో ఇది హ్యాట్రిక్ కి వెళ్లాలి. ఈ సినిమా హరీశ్ కు మంచి హిట్ అందించాలి. భాగ్యశ్రీ చక్కగా నటించడమే కాదు.. డబ్బింగ్ కూడా చెప్పింది. మిక్కీ.జె మేయర్ మంచి సంగీతం అందించాడు. సినిమా ఖచ్చితంగా మీ అందరికీ నచ్చతుంద’ని అన్నారు.
నిర్మాత విశ్వప్రసాద్ మాట్లాడుతూ.. ‘ఇప్పటివరకూ టీజర్లో చూసిన ఎలిమెంట్స్ కంటే ఎక్కువగా సినిమాలో ఉన్నాయి. రవితేజ యాక్షన్, హరీశ్ శంకర్ పవర్ ఏంటో సినిమాలో చూస్తారు. ఆగష్టు 14న ప్రీమియర్స్ తో ఇది నిజం కాబోతుంద’ని అన్నారు.
సహ నిర్మాత వివేక్ కూచిభొట్ల మాట్లాడుతూ.. ‘టాలెంట్ గుర్తించడంలో రవితేజగారు ముందుంటారు. టాలెంట్ ఉన్న హరీశ్ శంకర్ గారిని తెలుగు సినిమాకు దర్శకుడిగా పరిచయం చేశారు. సినిమాను హిట్ చేసి రవితేజ గురుదక్షిణ ఇస్తారని భావిస్తున్నా. ప్రేక్షకులు సినిమాను ఆదరించి పెద్ద హిట్ చేయాలని కోరుకుంటున్నా’నని అన్నారు.