నటీనటులు : ప్రియదర్శి , అనన్య, ఝాన్సీ తదితరులు ..
రేటింగ్ : 2. 5 / 5
నిర్మాత, దర్శకత్వం : రాజ్ ఆర్
సంగీతం : మార్క్ కె రాబిన్
కెమెరా : బాలు. ఎస్
ఎడిటింగ్ : రాఘవేందర్
నేత కార్మికుల కష్ఠాలు తగ్గించాలని అషు యంత్రాన్ని కనుగొని .. అందరి దృష్టిని ఆకర్షించాడు మల్లేశం. అయన ప్రభిభకు మెచ్చి పద్మశ్రీ అవార్డుతో సత్కరించింది ప్రభుత్వం. ఎంతో మందికి స్ఫూర్తి కలిగించేలా మల్లేశం జీవితం సాగడంతో అతని కథపై ఆసక్తి పెంచుకున్న దర్శకుడు ఆర్ రాజ్ మల్లేశం జీవిత కథతో సినిమా చేయాలనీ ప్లాన్ చేసాడు. దాంతో మల్లేశంను కలుసుకుని అయన జీవిత విశేషాలను తెలుసుకుని మల్లేశం పేరుతోనే సినిమాగా తెరకెక్కించాడు. చింతకింది మల్లేశం బయోపిక్ గా తెరకెక్కిన ఈ సినిమాలో మల్లేశం పాత్రలో కమెడియన్ ప్రియదర్శి నటించాడు. మరి మల్లేశం ఎవరు .. అతని కథ ఏమిటి ? అన్నది తెలియాలంటే కథలోకి వెళ్లాల్సిందే ..
కథ :
మల్లేశం.. ( ప్రియదర్శి ) నేత కార్మికుల కుటుంబంలో పుట్టిన యువకుడు. అతని తాతముత్తాల కాలమునుండి నేత పనినే ఆధారం చేసుకుని జీవితం గడుపుతుంటారు. అయితే ఆ నేత పనివల్ల ఆర్థికపరమైన ఇబ్బందులతో ఎన్నో కష్ఠాలు పడుతూ ఉంటారు. నేత పనివల్ల చేలా మంది అనారోగ్యం పాలవుతారు. తన తల్లి ( ఝాన్సీ ) పడుతున్న కష్టాన్ని చూసి తన తల్లిలా ఇంకెవరు కష్టపడకూడదని ఆశు యంత్రాన్ని కనుగొనాలని ఎన్నో ప్రయత్నాలు చేస్తాడు. అయితే ఆ ప్రయత్నాల్లో మల్లేశం ఎన్నో అడ్డంకులు ఎదుర్కొంటాడు. ఆ క్రమంలో తన తండ్రి తో పాటు ఊరందరిచే ఎగతాళి చేయబడతాడు. అయినా పట్టు వదలకుండా ఆ ప్రయత్నం చేస్తుంటాడు. ఆ తరువాత కొన్ని నాటకీయ పరిణామాల మధ్య మల్లేశం ఆ యంత్రాన్ని తయారు చేశాడా లేదా అన్నది మిగతా కథ.
నటీనటుల ప్రతిభ :
చేనేత కార్మికులు పడుతున్న సమస్యలను కళ్ళకు కట్టినట్టు చూపించాడు దర్శకుడు. చేనేత పనివాళ్ళ కష్ఠాలు .. వాళ్ళ జీవితాలు ఇలా ప్రతి విషయాన్నీ దగ్గరగా చూపించే ప్రయత్నం చేసాడు. 90 కాలం నాటి కథతో సాగె ఈ సినిమా ఆద్యంతం ఆసక్తికరంగా సాగుతుంది. మల్లేశం పాత్రలో ప్రియదర్శి ఆకట్టుకున్నాడు. నిజంగా మల్లేశం గానే కనిపించే ప్రయత్నం చేసాడు. ఈ సినిమా చూస్తున్నంతసేపు .. ఇది సినిమా అన్న భావన మర్చిపోయేలా ఉంటుంది. నిజంగా ఆ పరిసరాల్లో మనం తిరుగుతున్నామా అన్న భావన కలుగుతుంది. ప్రియదర్శి విషయంలో ఎలాంటి సందేహాలు లేవు .. తన పాత్రను చక్కగా పోషించి మంచి మార్కులు కొట్టేసాడు. ముఖ్యంగా అతని మాటల్లో చేతల్లో నేటివిటీ బాగా కనిపిస్తుంది. ఇక నటిగా ఇప్పటికే మంచి క్రేజ్ తెచ్చుకున్న ఝాన్సీ తల్లి పాత్రలో మరోసారి ఆకట్టుకుంది. ఇక హీరోయిన్ అనన్య కూడా ఉన్నంతలో చక్కగా చేసింది. ఇమా మిగతా నటీనటులు వారి వారి పాత్రలకు న్యాయం చేసే ప్రయత్నం చేశారు. ముఖ్యంగా చేనేత కార్మికుల కష్టాలు , కడగళ్ళను వారి హావభావాల్లో వ్యక్తపరిచేలా నటించి ఆకట్టుకున్నారు.
టెక్నీకల్ హైలెట్స్ :
మల్లేశం సినిమా విషయంలో మొత్తం క్రెడిట్ దర్శకుడీకే ఇవ్వాలి. నిజంగా ఇది సాధారణ కథ .. ఏమాత్రం అటు ఇటు అయినా అది డాక్యూమెంటరీ గా మారిపోయే అవకాశాలు ఉన్నాయి. కానీ దర్శకుడు ఆ విషయంలో చాలా కేర్ తీసుకుని దీనికి సినిమాటిక్ హంగులు అద్దాడు. చేనేత కార్మికుల సమస్యలను కళ్ళకు కట్టినట్టు చూపించి సక్సెస్ అయ్యాడు. సున్నితమైన ప్రేమకథ, భావోద్వేగాలు చక్కగా మిక్స్ చేసాడు. ఇక ఈ సినిమాకు మార్క్ రాబిన్ అందించిన మ్యూజిక్ బాగుంది. కథలోని మూడ్ ని చేరువ చేసేలా ఉంది. అలాగే కెమెరా వర్క్ సూపర్, ఇక ఎడిటింగ్ విషయంలో ఇంకాస్త కేర్ తీసుకుంటే బాగుండేది. కొన్ని బోర్ కొట్టే సన్నివేశాల నిడివి తగ్గిస్తే బాగుండేది. నిర్మాణ విలువలు బాగున్నాయి.
విశ్లేషణ :
ముఖ్యంగా మల్లేశం అనే ఓ సాధారణ వ్యక్తి కథని ఎంచుకున్న దర్శకుడు దాన్ని మొదలు పెట్టె విషయంలో కానీ ఆ పాత్రను నడిపించే విషయంలో ఇంకాస్త కేర్ తీసుకుని ఉండాల్సింది. కేవలం పాత్రలను మాత్రమే పట్టుకున్న దర్శకుడు కథ, కథనం విషయంలో సరైన ఫాలోయింగ్ చేయలేదు. దాంతో కథ మొత్తం చాలా నెమ్మదిగా సాగుతూ బోర్ కొట్టిస్తుంది. ఇక చైల్డ్ ఎపిసోడ్స్ విషయంలో మరోసారి ఆలోచిస్తే బాగుండేదేమో. సినిమా ట్రీట్మెంట్ బాగున్నప్పటికీ స్క్రీన్ ప్లే మాత్రం ఆకట్టుకోదు. కొత్త నటీనటులు వారి వారి పాత్రల్లో బాగానే చేసిన కథనం విషయంలో కన్ఫ్యూజ్ అయ్యాడు దర్శకుడు. దానికి తోడు సినిమాకు కావలసిన కమర్షియల్ అంశాలు ఏమాత్రం లేకపోవడం ప్రేక్షకులను నిరాశకు గురి చేస్తుంది. ప్రియదర్శి, ఝాన్సీ, అనన్య ల నటన .. మ్యూజిక్, కెమెరా విషయాలు మెచ్చుకోవచ్చు. పద్మశ్రీ మల్లేశం జీవిత కథతో తెరకెక్కిన ఈ సినిమాలో చేనేత కార్మికుల కష్టాలను కళ్ళకు కట్టినట్టు చూపిన దర్శకుడు కథ, కథనం విషయాలపై ఇంకాస్త జాగ్రత్త పడితే బాగుండేది.
టాగ్ లైన్ : మల్లేశం .. ఆకట్టుకుంటాడు.