సినిమా రివ్యూ : దొరసాని

నటీనటులు : ఆనంద్ దేవరకొండ, శివాత్మిక, వినయ్ వర్మ, కిషోర్, శరణ్య, వంశీకృష్ణ తదితరులు ..
రేటింగ్ : 2. 75 / 5
సమర్పణ : డి సురేష్ బాబు
సంగీతం : ప్రశాంత్ విహారి
ఎడిటింగ్ : నవీన్ నూలి
కెమెరా : సన్నీ కూరపాటి
దర్శకత్వం : కెవిఆర్ మహేంద్ర
నిర్మాతలు : మధుర శ్రీధర్, యాష్ రేంగినేని

ప్రేమకథలు ఎప్పుడు కొత్తగానే ఉంటాయి … కథలు పాతవైనప్పటికీ ప్రేమ మాత్రం ఎప్పుడు కొత్తదే. ప్రేమ కావ్యాలంటే ప్రేక్షకులకు ఉండే ఆసక్తి వేరు. అందుకే వెండి తెరపై ఎప్పుడూ ప్రేమకథలు వస్తూనే ఉంటాయి. ప్రేమ కథలకు మరణం లేదు. అందుకే తాజాగా ఓ సరికొత్త ప్రేమకథను ప్రేక్షకులకు పరిచయం చేసే ప్రయత్నం చేసాడు కొత్త దర్శకుడు కెవిఆర్ మహేంద్ర. తెలంగాణ ప్రాంతంలో దొరలూ, దొరల ఘడీల నేపథ్యంలో ఈ కథను తీసుకున్నాడు. విజయ్ దేవరకొండ తమ్ముడు ఆనంద్ దేవరకొండ ను హీరోగా, హీరో రాజ శేఖర్ , జీవితల రెండో కుమార్తె శివాత్మికను హీరోయిన్ గా పరిచయం చేస్తూ తెరకెక్కిన చిత్రం దొరసాని. ఇప్పటికే టీజర్ ట్రైలర్లతో ప్రేక్షకుల్లో భారీ అంచనాలు పెంచేసాయి. మరి దొరసాని ఆ ప్రేక్షకుల అంచనాలను అందుకుందా లేదా అన్నది తెలియాలంటే కథలోకి వెళ్లాల్సిందే.

కథ :

నక్సలైట్ లీడర్ శివన్న ( కిషోర్ ) 30 ఏళ్లుగా జైలు జీవితం అనుభవించి విడుదల అవుతాడు. విడుదలైన శివన్న రాజు అనే తన పాత స్నేహితుడికోసం జయగిరి అనే గ్రామానికి వస్తాడు. అక్కడ రాజు గురించి వాకబు చేస్తాడు, కానీ రాజు ఎవరో తెలియదని అక్కడి వాళ్ళు చెప్పడంతో పక్కనే ఉన్న ఘడి దగ్గరకు వెళ్తాడు. ఆయన్నే అనుసరించి వచ్చిన మరో వ్యక్తి రాజు గురించి తనకు తెలుసనీ అసలు కథ చెబుతాడు. రాజు ( ఆనంద్ దేవరకొండ ) జయగిరిలో ఐదో తరగతి వరకు చదువుకుని ఆ తరువాత పై చదువుల కోసం వాళ్ళ అమ్మమ్మ ఊరిలో ఉండి చదువుకునే కుర్రాడు. సెలవులకు తన ఊరికి వచ్చి వెళుతుంటాడు. తన స్నేహితులతో జాలీగా ఉన్న ఆ కుర్రాడికి ఊరిలో బతుకమ్మ పండగ సందర్బంగా ఆ ఊరి దొర ( వినయ్ వర్మ ) కూతురు చిన్న దొరసాని అలియాస్ దేవకీ ( శివాత్మిక ) ని చూస్తాడు. మొదటి చూపులోనే ఆమెను ప్రేమిస్తాడు. అతని పట్ల దొరసాని కూడా ఆకర్షితురాలు అవుతుంది. ఆ తరువాత ఇద్దరు ప్రేమలో పడతారు. అయితే తమ ప్రేమకు అంతస్తులు, కులం అడ్డొస్తుంది. ఆ అడ్డంకులు వచ్చినా కూడా ప్రేమలో ఒక్కటయ్యేందుకు సిద్ధమవుతారు. ఈ విషయం దొర కు తెలుస్తుంది. ఆ తరువాత జరిగిన పరిస్థితులు ఏమిటి ? దొర రాజుని ఎం చేసాడు? వీరిద్దరు ఒకటయ్యారా లేదా అన్నది మిగతా కథ.

నటీనటుల ప్రతిభ :

దాదాపు ముప్పయేళ్ల క్రితం జరిగిన కథ ఇది. ఓ దొర కూతురిని ఓ కూలివాడి కొడుకు ప్రేమిస్తే ఏమవుతుంది ? అన్న పాయింటును తీసుకుని తెరకేకించిన చిత్రం దొరసాని. ఈ కథలో చివరగా ఏమి జరుగుతుంది అన్నది అందరికి తెలిసిన జవాబే .. కానీ దాన్ని చివరిదాకా తీసుకెళ్లిన విధానం ఆకట్టుంది. ఇక రాజు పాత్రలో ఆనంద్ బాగా చేసాడు. ప్రేమికుడిగా ప్రేమకోసం తపించే పోయే పాత్రలో ఆకట్టుకున్నాడు. అయితే హీరో పాత్రలో ఎలాంటి ఎమోషన్ అన్నది కరక్ట్ గా చూపించే ప్రయత్నం చేయలేదు. ప్రేమించిన వాడు ప్రేమకోసం ఎవ్వరినైనా ఎదిరిస్తాడు అన్న పాయింట్ ని దర్శకుడు మరచిపోయాడు అని అనిపిస్తుంది. ఇక దొరసాని గా శివాత్మిక నటన సూపర్. నిజంగా దొరసాని పాత్రలో ఆమె ఆకట్టుకుంది. తాను కూడా ప్రేమలో పడడం. ప్రేమికుడికోసం ఎదురు చూడడం లాంటివాటిలో బాగా చేసింది. కొన్ని ఎమోషనల్ సీన్స్ విషయంలో ఇంకా బాగా చేయాలి. కెమిస్ట్రీ బాగా కుదిరింది. ఇక దొరగా వినయ్ వర్మ తనదైన ఆహార్యంతో ఆకట్టుకున్నాడు. అలాగే నక్సలైట్ శేఖర్ అన్న గా కిషోర్ బాగా చేసాడు. వినయ్ వర్మ, కిషోర్ ల నటన సినిమాకు ప్రత్యేక ఆకర్షణ అని చెప్పాలి.

టెక్నీకల్ హైలెట్స్ ;

దొరసాని సినిమాకు టెక్నీకల్ అంశాలు హైలెట్ గా నిలిచాయి. నిజంగా సరైన సాంకేతిక నిపుణులు కలిస్తే ఆ మ్యాజిక్ ఎలా ఉంటుందో ఈ సినిమా చూపించింది. ప్రశాంత్ విహారి మ్యూజిక్ సినిమాను మరో స్థాయిలో నిలబెట్టింది. రీ రీకార్డింగ్ తో పాటు పాటలు కథను డ్రైవ్ చేసాయి. ఇక సన్నీ కూరపాటి ఛాయాగ్రహణం మరో హైలెట్. కథను ఆసక్తికరంగా చూపించే విషయంలో కెమెరా వర్క్ సూపర్. ఇక ఎడిటింగ్ విషయంలోనే ఇంకాస్త కేర్ తీసుకుంటే బాగుండేది. కథనం చాలా నెమ్మదించింది. సెకండాఫ్ బోర్ కొట్టేలామారింది. ఇక దర్శకుడు మహేంద్ర ఎంచుకున్న కథ పాతదే అయినా దాన్ని ప్రజెంట్ చేసే విషయంలో చాలా నిజాయితీగా కథను చెప్పే ప్రయత్నం చేసాడు. ఈ సినిమాలో ఏకంగా 30 మందికి పైగా కొత్త నటీనటులను పరిచయం చేస్తూ .. నిజంగా ఆ గ్రామంలో జరిగిందా అన్న విధంగా బాగా తెరకెక్కించాడు. అయితే 30 ఏళ్ళ క్రిందట జరిగిన కథ ను తీసుకున్నప్పటికీ ఆ కథలో ఏమాత్రం కొత్తదనం లేకపోవడం, నెక్స్ట్ ఏమి జరుగుతుందో ఊహించేయడం వంటి విషయాలు మైనస్ గా మారాయి.

విశ్లేషణ :

కథ ముప్పై ఏళ్ల క్రితం జరిగింది కాబట్టి ఆ కథను చెబుతున్నప్పుడు అందులో ఏదైనా విశేషం ఉంటుందా అన్న పాయింట్ లో ప్రేక్షకుడు ఆలోచిస్తాడు. ఊహిస్తాడు. కానీ అలాంటివి ఏమి లేకుండా ఫ్లాట్ గా కథ సాగడం. కథనం మరి స్లో గా నడవడం ప్రేక్షకులకు బోర్ కొట్టేలా చేస్తుంది. నటి నటులు, టెక్నీకల్ అంశాలు బాగున్నప్పటికీ అందులో ఆసక్తి కలిగించే అంశాలే లేవు. తెలంగాణ ప్రాంతం, అప్పటి గ్రామీణ వాతావరణం బాగా చూపించారు. కానీ సగటు ప్రేక్షకుడిని ఎంగేజ్ చేసేలా ఎలాంటి ఆకట్టుకునే అంశం లేకపోవడం దొరసానిలో పెద్ద మైనస్. పెద్దింటి అమ్మాయి .. పేదింటి అబ్బాయి ప్రేమ కథ … ఇది రొటీన్ ఫార్ములా .. కానీ అందులో కొత్తదనం కోసం దర్శకుడు ఎక్కడా ట్రై చేయలేదు.

ట్యాగ్ లైన్ : దొరసాని .. ఊహించిందే !!