వైజాగ్‌ గ్యాస్‌ లీక్‌: నిరసనలు వద్దంటున్న జనసేనాని

జనసేన అధినేత పవన్‌ కళ్యాణ్‌, పార్టీ శ్రేణుల్ని ఉద్దేశించి విశాఖ గ్యాస్‌ లీక్‌ ఘటనపై బాద్యతాయుతమైన ప్రకటన చేశారు. ఎవరూ ఎలాంటి నిరసన కార్యక్రమాల్లో పాల్గొనరాదని జనసైనికులు, జనసేన ముఖ్య నేతలకు సూచించారు పవన్‌ కళ్యాణ్‌. కరోనా వైరస్‌ నేపథ్యంలో నిరసనలు, ఆందోళనలు మంచివి కావంటూ బాధ్యతాయుతమైన ప్రకటన చేసిన జనసేన అధినేత, బాధితుల్ని ఆదుకోవడం కోసం జనసైనికులు ముందుండాలని పిలుపునిచ్చారు.

జరిగిన ఘటన అత్యంత దురదృష్టకరమన్న జనసేనాని, ఈ ఘటనపై విచారణ జరుగుతున్న దరిమిలా, విచారణ సజావుగా సాగి, కారణాలు తెలిసేవరకూ సంయమనం పాటించాలని పిలుపునిచ్చారు. మరోపక్క, విశాఖ గ్యాస్‌ లీక్‌ ఘటనకు సంబంధించి బాధిత కుటుంబాలు, ఈ ఘటనకు కేంద్ర బిందువైన ఎల్జీ పాలిమర్స్‌ సంస్థ ఎదుట ఆందోళనకు దిగాయి. ఘటనలో ప్రాణాలు కోల్పోయినవారి మృతదేహాలతో బాధిత కుటుంబాలు ఆందోళన చేపట్టడంతో ఉద్రిక్త పరిస్థితులు నెలకొన్నాయి. పోలీసులు, ఆందోళనకారుల్ని చెదరగొట్టారు. ఆ సమయంలో రాష్ట్ర డీజీపీ గౌతవ్‌ు సవాంగ్‌, ఎల్జీ పాలిమర్స్‌ ఫ్యాక్టరీలోనే వుండడం గమనార్హం. ఎట్టి పరిస్థితుల్లోనూ ఫ్యాక్టరీ ఈ ప్రాంతంలో కొనసాగడానికి వీల్లేదని బాధిత కుటుంబాలు నినదిస్తున్నాయి. ఘటన జరిగాక సంస్థ యాజమాన్యం తమను పట్టించుకోలేదని బాధితులు వాపోతున్నారు.

ఇదిలా వుంటే, ప్రభుత్వం ప్రకటించిన కోటి రూపాయల ఎక్స్‌గ్రేషియా సహా, పలు అంశాలపై బాధితులు పెదవి విరుస్తుండడం గమనార్హం. ‘మా ప్రాణాల్ని తీస్తోన్న ఈ సంస్థ ఇక్కడ వుండడానికి ఎట్టి పరిస్థితుల్లోనూ ఊరుకునేది లేదు’ అంటూ ఆందోళనకారులు తెగేసి చెబుతున్నారు. మరోపక్క, ప్రభుత్వం, పోలీసులు ఎల్జీ పాలిమర్స్‌ సంస్థకి అనుకూలంగా వ్యవహరిస్తున్నారన్న విమర్శలు వెల్లువెత్తుతున్నాయి. 12 మందికి మరణానికి కారణమైన సంస్థ యాజమాన్యాన్ని అరెస్ట్‌ చేయకుండా, న్యాయం కోసం డిమాండ్‌ చేసిన తమను అరెస్ట్‌ చేయడమేంటని బాధితులు వాపోతున్నారు.