మొగల్తూరు రాజకీయం.! ప్రభాస్, చిరంజీవి.. అసహనం వ్యక్తం చేసిన వేళ.!

‘మరీ ఇంత నీఛానికి దిగజారుతారా.?’ అన్న చర్చ సినీ పరిశ్రమలో చాలామంది ప్రముఖుల మధ్య జరుగుతోంది. సినీ నటుడు, మాజీ కేంద్ర మంత్రి, దివంగత కృష్ణంరాజు సంస్మరణ కార్యక్రమం ఆయన సొంతూరులో నిర్వహించిన విషయం విదితమే. ఆ భోజనాలు, ఆ పద్ధతి.. తెలుగు రాష్ట్రాల్లో హాట్ టాపిక్ అయ్యింది.

కృష్ణంరాజు భోజన ప్రియుడు గనుక, ఆయన మెచ్చే భోజనాన్ని లక్ష మందికి పెట్టడం ద్వారా ఆయన ఆత్మకు శాంతి చేకూరుతుందని ఆయన కుటుంబ సభ్యులు భావించడాన్ని ఎలా తప్పు పట్టగలం.? పైగా, లక్ష మందికి భోజనం పెట్టిన గొప్ప కార్యక్రమాన్ని ఎవరైనా అభినందించి తీరాల్సిందే. కానీ, ఇందులోకి రాజకీయం చొరబడింది. మొగల్తూరు వేదికగా కుళ్ళు రాజకీయాలు తెరపైకొచ్చాయి.

చిరంజీవిని టార్గెట్ చేస్తూ, ప్రభాస్ అభిమానుల పేరుతో కొందరు జుగుప్సాకరమైన చర్చకు తెరలేపారు. ఆ అవసరం ఎవరికి వుంది.? అన్న కోణంలో అటు కృష్ణంరాజు కుటుంబ సభ్యులు, ఇటు మెగా క్యాంప్ ఆరా తీయకుండా వుంటుందా.? నిజానికి, ఇది పట్టించుకునేంత పెద్ద విషయం కాదు. కాకపోతే, కృష్ణంరాజు – చిరంజీవి అత్యంత సన్నిహితులుగా వుండేవారు. ‘నా సోదర సమానుడు’ అని ఆప్యాయంగా మాట్లాడేవారు కృష్ణంరాజు. అనారోగ్యంతో కృష్ణంరాజు బాధపడుతున్న సమయంలో, ఆయనకు మెరుగైన వైద్యం అందించేందుకు చిరంజీవి, అపోలో ఆసుపత్రి ద్వారా చేసిన ప్రయత్నాలు అన్నీ ఇన్నీ కావు.

ఇక, ప్రభాస్‌ని చిరంజీవి.. తన కుమారుడు చరణ్‌తో సమానంగానే చూస్తారు. ఇదీ అందరికీ తెలిసిన విషయమే. తెలుగు సినీ పరిశ్రమ ఎదుర్కొంటున్న సమస్యల విషయమై ఏపీ ప్రభుత్వంలో చర్చలు జరిపిన బృందానికి చిరంజీవి నేతృత్వం వహిస్తే, ఆ బృందంలో ప్రభాస్ కూడా వున్నాడు.

ప్రధానంగా వైసీపీ మీదనే మొగల్తూరు రాజకీయానికి సంబంధించి ఆరోపణలు వినిపిస్తున్నాయి. అయితే, ఈ వ్యవహారంపై స్పందించాలా.? వద్దా.? అన్నదానిపై అటు ప్రభాస్ తరఫున, ఇటు చిరంజీవి తరఫున.. ఒకింత సంయమనం పాటిస్తున్నట్లు తెలుస్తోంది. స్పందించి, అనవసర రాజకీయ రచ్చకు తెరలేపాలా.? స్థానికంగా పరిస్థితులు అందరికీ తెలుసు గనుక, మాట్లాడకపోవడమే మంచిదన్న కోణంలోనూ ఇరు కుటుంబాలూ ఆలోచన చేస్తున్నాయట.

కాదేదీ రాజకీయానికి అనర్హం.. అన్న కోణంలో రెండు సామాజిక వర్గాల మధ్య చిచ్చు పెట్టేందుకు జరిగిన ‘బులుగు ప్రయత్నం’ ఉభయ గోదావరి జిల్లాల్లోనే కాదు, రెండు తెలుగు రాష్ట్రాల్లోనూ హాట్ టాపిక్ అవుతోంది.