లాక్‌డౌన్‌ సడలింపు: మోడీ మనసులో ఏముంది.?

దేశమంతా ఇప్పుడు మే 17వ తేదీ గురించి ఆసక్తిగా ఎదురుచూస్తోంది. ఆ తేదీతో మూడో దఫా లాక్‌డౌన్‌ ముగుస్తుంది. మరి, మే 18 తర్వాత ఏం జరగబోతోంది.? అప్పటిదాకా ఎందుకు, రేపో మాపో కేంద్రం నుంచి ఓ ప్రకటన రాబోతోంది. మొన్నామధ్య వచ్చింది కదా.. అచ్చం అలాంటి ప్రకటనే. రాష్ట్రాల ముఖ్యమంత్రులతో ప్రధాని నరేంద్ర మోడీ ఈ రోజు వీడియో కాన్పరెన్స్‌ నిర్వహించారు. వివిధ రాష్ట్రాల్లో పరిస్థితుల్ని అడిగి తెలుసుకున్నారు.

లాక్‌డౌన్‌ సడలింపులకు సంబంధించి రాష్ట్రాలు తమ తమ అభిప్రాయాల్ని ప్రధాని దృష్టికి తీసుకెళ్ళాయి. లాక్‌డౌన్‌ని పొడిగించాలని కొన్ని రాష్ట్రాలు, లాక్‌డౌన్‌ని సడలించాలని కొన్ని రాష్ట్రాలూ ప్రధానికి విజ్ఞప్తి చేశాయి. ‘రాష్ట్రాల చర్యలతోనే కరోనాపై ఈ స్థాయి విజయం సాధించగలిగాం. ప్రపంచమంతా మన వైపు ఆసక్తిగా ఎదురుచూస్తోంది..’ అంటూ ఆయా రాష్ట్రాల ముఖ్యమంత్రులతో చెప్పిన ప్రధాని, కొన్ని చోట్ల జరిగిన చిన్న చిన్న పొరపాట్లతో ఆయా రాష్ట్రాల్లో కేసులు ఎక్కువగా నమోదవుతున్నాయని అన్నారట.

అసలు సమస్య ఇప్పుడే మొదలవబోతోందనీ, లాక్‌డౌన్‌ సడలింపుల తర్వాత అగ్ని పరీక్షను ఎదుర్కోబోతున్నామనీ ప్రధాని సెలవిచ్చారట. నిజమే, లాక్‌డౌన్‌ సంగతెలా వున్నా.. దేశంలో కరోనా పాజిటివ్‌ కేసుల సంఖ్య క్రమక్రమంగా పెరిగిపోతోంది. నిన్న ఒక్కరోజే దేశంలో 4వేల పై చిలుకు కేసులు నమోదయ్యాయి. నేడు కూడా పరిస్థితి దాదాపుగా అలానే వుండబోతోంది. మరి, లాక్‌డౌన్‌ కారణంగా కరోనా అదుపులోకి వచ్చినట్లా.? రానట్లా.? మద్యం దుకాణాలు తెరిచాక, ఆ ఎఫెక్ట్‌ అంత తొందరగా బయటపడకపోవచ్చు. వచ్చేవారం నుంచి ఆ కేసులు అదనంగా నమోదవుతాయి.

సో, ముందున్నది అత్యంత భయంకరమైన కాలమని తాజా పరిణామాలతో అర్థమవుతోంది. మరి, లాక్‌డౌన్‌ సడలింపులతో ఒరిగేదేంటి.? ఆర్థిక కార్యకలాపాలు షురూ అవుతాయి.. తద్వారా రాష్ట్రాలు, దేశం ఆర్థిక ఇబ్బందుల నుంచి గట్టెక్కుతుంది. కానీ, జనం మాటేమిటి.? ఆ ఒక్కటీ అడక్కూడదంతే.!