వెంట్రుక కూడా పీకలేరట.. ఎమ్మెల్సీ వాడే భాషేనా ఇది.?

టీడీపీ మాజీ ఎంపీ, వైసీపీ తాజా ఎమ్మెల్సీ పండుల రవీంద్రబాబు.. సంచలన వ్యాఖ్యలకు కేరాఫ్‌ అడ్రస్‌. గతంలో టీడీపీ ఎంపీగా వున్న సమయంలో, సైనిక బలగాలపై వివాదాస్పద వ్యాఖ్యలు చేసి వార్తల్లోకెక్కారు. వివాదం ముదిరి పాకాన పడ్డంతో, ‘అబ్బే నా ఉద్దేశ్యం అది కాదు..’ అంటూ బుకాయించారు. ఇప్పుడు తాజాగా మరోమారు ఆయన పేరు వివాదాల్లోకెక్కింది. ఆ స్థాయిలో వివాదాస్పద వ్యాఖ్యలు చేశారాయన. తనకు ఎమ్మెల్సీ పదవి ఇచ్చిన వైసీపీ అధినేత, ఆంధ్రప్రదేశ్‌ ముఖ్యమంత్రి వైఎస్‌ జగన్‌ పట్ల వీర విధేయత ప్రదర్శించే క్రమంలో జడ్జిలపై వివాదాస్పద వ్యాఖ్యలు చేశారు.

‘చంద్రబాబు కావొచ్చు, జడ్జిలు కావొచ్చు.. ఎవరైనా కావొచ్చు.. వైఎస్‌ జగన్‌ వెంట్రుక కూడా పీకలేరు’ అంటూ పండుల రవీంద్రబాబు చేసిన వ్యాఖ్యలు పెను వివాదానికి తెరలేపాయి. గడచిన ఏడాది కాలంగా వైఎస్‌ జగన్‌ సర్కార్‌ ఎడా పెడా మొట్టికాయలు తినేసింది న్యాయస్థానాల్లో వివిధ అంశాలకు సంబంధించి. ప్రభుత్వ కార్యాలయాలకు వైసీపీ రంగులు కావొచ్చు, ఇతరత్రా వ్యవహారాల్లో కావొచ్చు.. పదే పదే మొట్టికాయలు తినాల్సి వస్తోంది వైఎస్‌ జగన్‌ ప్రభుత్వం.

తాజాగా మూడు రాజధానుల ఎపిసోడ్‌లోనూ ప్రభుత్వానికి హైకోర్టులో చుక్కెదురయిన విషయం విదితమే. మీడియా సమావేశంలోనే పండుల రవీంద్రబాబు, ‘వెంట్రుక కూడా పీకలేరు’ అని వ్యాఖ్యానించడంతో అంతా అవాక్కయ్యారు. అధినేత మెప్పు కోసం ఏ స్థాయికి అయినా దిగజారిపోవడానికి వైసీపీ నేతలు సంశయించట్లేదు. కొద్ది రోజుల క్రితం న్యాయస్థానం ఈ తరహా వ్యాఖ్యలపై తీవ్ర ఆగ్రహం వ్యక్తం చేసిన విషయం విదితమే.

కోర్టులకు, న్యాయమూర్తులకు దురుద్దేశాలు ఆపాదిస్తున్నారంటూ అసహనం వ్యక్తం చేసిన ఉన్నత న్యాయస్థానం, సోషల్‌ మీడియా వేదికగా జుగుప్సాకరమైన వ్యాఖ్యలు చేసిన వైసీపీ మద్దతుదారులైన నెటిజన్లపైనా, నేతలపైనా చర్యలకు ఆదేశించిన విషయం విదితమే. అయినాగానీ, వైసీపీ నేతల్లో మార్పు రాకపోవడం గమనార్హం.