మెగాస్టార్ బర్త్ డే స్పెషల్స్: తుఫాను హోరులో కలెక్షన్ల వర్షం కురిపించిన ‘జగదేకవీరుడు అతిలోక సుందరి’

సినిమాల్లో రెగ్యులర్ గా చేసే మాస్, క్లాస్, ఫ్యామిలీ, లవ్, హార్రర్, యాక్షన్, భక్తి, సంగీతం.. సినిమాలకు భిన్నంగా కొత్త కాన్సెప్టులు ప్రేక్షకులను ఆకట్టుకునేలా తీస్తే ప్రేక్షకులు ఎప్పుడూ ఆదరిస్తారు. కొన్నిసార్లు సక్సెస్ అయితే.. మరికొన్నిసార్లు ప్రయోగాలుగా మిగిలిపోతాయి. ఆ తరహాలో మెగాస్టార్ చిరంజీవి తన అప్రతిహత క్రేజ్ జత చేసి చేసిన సినిమా తిరుగులేని ఇండస్ట్రీ హిట్ గా మాత్రమే కాకుండా తెలుగు సినిమా చరిత్రలో ఓ క్లాసిక్ గా నిలిచిపోయింది. ఆ సినిమానే ‘జగదేకవీరుడు అతిలోక సుందరి’. ప్రేక్షకులను కొత్త లోకంలో విహరించేలా చేసిన ఈ సినిమా తెలుగు సినిమాల్లో ఒక అద్భుతం. సోషియో ఫాంటసీ కథాంశంతో తెరకెక్కిన జగదేకవీరుడు అతిలోక సుందరి చిరంజీవి కెరీర్లో ఓ మేలిమి బంగారంలా.. శ్రీదేవి సిగలో ఓ మణిమకుటంలా నిలిచిపోయింది.

భారీ హంగులతో అద్భుతం..

కథలోని భారీతనానికి తగ్గ స్క్రీన్ ప్లే, దర్శకత్వం, సంగీతం, కళ.. అద్భుతమైన టెక్నీషియన్స్ తోడైతే దక్కే అపురూప విజయమే ఈ సినిమాకు దక్కింది. అప్పటివరకూ ఉన్న ఫాంటసీ కథలకు భిన్నంగా చిరంజీవి సూచన మేరకు ఓ దేవకన్య భూమి మీదకు వచ్చేలా కథ డిజైన్ చేయమని చెప్పడంతో ఈ సినిమా రూపుదిద్దుకుంది. ఇంతటి భారీ స్కేల్ సినిమా బాధ్యతను దర్శకేంద్రుడు కె.రాఘవేంద్రరావుపై పెట్టారు చిరంజీవి. సాక్షాత్తూ దేవకన్యే దివి నుంచి దిగివచ్చిన్నట్టు హీరోయిన్ శ్రీదేవి మరిపించారు. అమ్రీష్ పూరి విలనిజం సినిమా గ్రాండియర్ పెంచింది. ఇళయరాజా సంగీతం, బ్యాక్ గ్రౌండ్ స్కోర్ సినిమాకు ప్రాణం. అబ్బనీ తియ్యనీ దెబ్బ పాటకు తెరపై డబ్బులే విసిరారు. మానస సరోవరం సెట్ వేసి ప్రేక్షకులు నిజంగా అక్కడికి వెళ్లామనే అనుభూతి కల్పించారు. అజయ్ విన్సెంట్ కెమెరా పనితనం అద్భుతం.

చిరంజీవి కోసం ఓసారి.. శ్రీదవి కోసం మరోసారి..

దర్శకుడు రాఘవేంద్రరావు తన మాయాజాలంతో సినిమాను క్లాసిక్ చేశారు. జంధ్యాల రాసిన ‘మానవా.. అని శ్రీదేవి.. ఆ పిలుపు మానవా..’ అని చిరంజీవి డైలాగులు అలరించాయి. 1990 మే 9న విడుదలైన ఈ సినిమా చిరంజీవికి వరుసగా నాలుగో ఇండస్ట్రీ హిట్ గా నిలిచింది. సినిమా రిలీజైనప్పుడు ఆంధ్రప్రదేశ్ లో భీకర తుఫాను అల్లకల్లోలం చేస్తోంది. రెండు రోజులు సినిమా ఆపేసినా ఐదో రోజు నుంచి ధియేటర్ల వద్ద క్యూలు పెరిగిపోయాయి. తుఫానులో కూడా కలెక్షన్ల తుఫాను సృష్టించిన సినిమాగా నిలిచింది. 46 కేంద్రాల్లో 100, విజయవాడ అప్సర ధియేటర్లో 200, షిఫ్టులతో 365 రోజులు ఆడింది. హైదరాబాద్ లాల్ బహదూర్ స్టేడియంలో అనిల్ కపూర్ ముఖ్య అతిధిగా శతదినోత్సవ వేడుకలు నిర్వహించారు. చిరంజీవి కోసం ఓసారి, శ్రీదేవి కోసం ఓసారి.. సినిమా కోసం మరోసారి చూడాలనే ప్రశంస మర్చిపోలేనిదని కె.రాఘవేంద్రరావు పేర్కొనడం విశేషం.