మెగాస్టార్ బర్త్ డే స్పెషల్స్: చిరంజీవి ఇమేజ్ ను ఎవరెస్ట్ ఎత్తుకు తీసుకెళ్లిన ‘గ్యాంగ్ లీడర్’

‘మెగాస్టార్’ అనేది చాలా పెద్ద ట్యాగ్. చిరంజీవి అభిమానులే కాదు, ప్రేక్షకులు, విమర్శకులు, ట్రేడ్, పరిశ్రమ మొత్తం చెప్పే మాట. చిరంజీవి తన కష్టంతో, సినిమాపై ఇష్టంతో సాధించిన ఆభరణమే మెగాస్టార్. డైనమిక్ హీరో, సుప్రీం హీరో ట్యాగ్స్ తర్వాత మెగాస్టార్ గా చిరంజీవిని తొలిసారి మరణమృదంగం సినిమాలో ఈ ట్యాగ్ వేశారు. ఆ తర్వాత ఎన్నో సూపర్ హిట్స్ ఇచ్చినా.. మెగాస్టార్ హోదా, నెంబర్ వన్ హీరోగా చిరంజీవికి తిరుగులేని స్థానం కల్పించిన సినిమా మాత్రం ‘గ్యాంగ్ లీడర్’ అని చెప్పాలి. చిరంజీవి కెరీర్లో ఈ సినిమా చాలా ప్రత్యేకం. ఆయన అభిమానులకు హాట్ ఫేవరేట్. మాస్ సినిమాకు సరైన అర్ధం. కమర్షియల్ సక్సెస్ కు సరైన నిదర్శనం. గ్యాంగ్ లీడర్ గా చిరంజీవి సృష్టించిన ప్రభంజనం, సాధించిన ఇమేజ్ ఎంత చెప్పుకున్నా తక్కువే.

చిరంజీవి రిజెక్ట్ చేసిన కథ..

ముగ్గురు అన్నదమ్ములు, ఫ్యామిలీ, ఫ్రెండ్స్ కంటెంట్ ఉన్న కథ ఓ ప్రభంజనం సృష్టిస్తుందని మొదట చిరంజీవి భావించలేదు. కథను చిరంజీవి తిరస్కరించారని.. కథపై నమ్మకం ఉందని పరుచూరి సోదరులతో నిర్మాత చెప్పారు. మూడు రోజులు సమయం తీసుకుని మళ్లీ కథను రీడిజైన్ చేసి చిరంజీవికి చెప్తే జరిగిన అద్భుతమే గ్యాంగ్ లీడర్. సినిమాలో చిరంజీవి మాస్ మూల విరాట్ అవతారమే ఎత్తారు. నున్నటి గెడ్డం, చురకత్తి చూపులు, డ్రెస్సింగ్, మేకోవర్.. గ్యాంగ్ లీడర్ గా చిరంజీవిని చాలా రఫ్ గా చూపాయి. ‘చెయ్ చూడు.. ఎంత రఫ్ గా ఉందో.. రఫ్పాడించేస్తాను’ డైలాగ్ మోగిపోయింది. ఒక్కో రౌడీకీ ఒక్క దెబ్బ మాత్రమే కొట్టే ఫైట్, లారీడు రౌడీల్ని కొట్టే సన్నివేశం, క్లైమాక్స్ ఫైట్స్ ఫ్యాన్స్ కు పూనకాలే తెప్పించాయి.

మాస్ కు సరైన నిర్వచనం..

సినిమాకు ప్రాణం అంటే బప్పీలహరి సంగీతం. పాటలన్నీ ఆంధ్రప్రదేశ్ ను హోరెత్తించాయి. టైటిల్ సాంగ్ లో చిరంజీవి స్టెప్పులకు ఫ్యాన్స్ ఊగిపోయారు. విజయశాంతితో కామెడీ సన్నివేశాలు, పాటలు ప్రేక్షకుల్ని అలరించాయి. ఇంటర్వెల్ లో చిరంజీవి గోడను బద్దలకొట్టే సీన్ సినిమాలో చిరంజీవి క్యారెక్టర్ ను ప్రతిబింబిస్తుంది. ఫ్రెండ్స్ చనిపోయాక చిరంజీవి రెచ్చిపోయి నటించారని చెప్పాలి. మొత్తంగా చిరంజీవి అసలు సిసలు వన్ మ్యాన్ షో గ్యాంగ్ లీడర్. శ్యామ్ ప్రసాద్ ఆర్ట్స్ బ్యానర్ పై మాగంటి రవీంద్రనాధ్ చౌదరి నిర్మాణంలో విజయబాపినీడు దర్శకత్వంలో సినిమా తెరకెక్కింది. 1991 మే 9న విడుదలైన గ్యాంగ్ లీడర్ 55 కేంద్రాలో 100 రోజులు ఆడి ఇండస్ట్రీ హిట్ గా నిలిచింది. సినిమా శతదినోత్సవ వేడుక తెలుగు చలన చిత్ర చరిత్రలో ఓ సంచలనం. చిరంజీవి పుట్టినరోజున జరిపిన వేడుకలు ఒకే రోజున నాలుగు కేంద్రాల్లో (హైదరాబాద్, తిరుపతి, ఏలూరు, విజయవాడ) నిర్వహించడం ఇప్పటికీ.. ఎప్పటికీ చెరిగిపోని రికార్డుగా మిగిలిపోయింది.