మెగాస్టార్ బర్త్ డే స్పెషల్స్; చిరంజీవికి మదర్ సెంటిమెంట్ తో బ్లాక్ బస్టర్.. ‘రాక్షసుడు’

సినిమాలు తీసేందుకు కొన్ని ఫార్ములాలు ఉంటాయి. యాక్షన్, థ్రిల్లర్, ప్రేమ, ఫ్యామిలీ డ్రామా.. ఇలా కొన్ని ఫార్ములాలతోనే ఏ కథైనా సినిమాగా తెరకెక్కుతుంది. ఇందులో తల్లి సెంటిమెంట్ ఒకటి. హీరో-తల్లి సెంటిమెంట్ తో ఎన్నో హిట్స్ ఉన్నాయి. చిరంజీవి హీరోగా వచ్చిన సినిమాల్లో కూడా తల్లి సెంటిమెంట్ తో వచ్చి సూపర్ హిట్లు అయిన సినిమాలు ఉన్నాయి. వీటిలో ప్రముఖమైంది ‘రాక్షసుడు’. యాక్షన్, మదర్ సెంటిమెంట్ ప్రధానంగా తెరకెక్కిన ఈ సినిమా అప్పట్లో బ్లాక్ బస్టర్ హిట్ అయింది. సహజంగానే చిరంజీవి యాక్షన్ కు భారీ క్రేజ్. దీంతోపాటు సినిమాలో తల్లి సెంటిమెంట్ ప్రేక్షకులను మెప్పించింది. సెంటిమెంట్ సీన్లలో చిరంజీవి నటన మహిళా ప్రేక్షకులను ఆకట్టుకుంది. చిరంజీవి స్టైల్, డ్రెస్సింగ్, డ్యాన్సులు, ఫైట్లు స్పెషల్ గా నిలిచాయి.

తల్లి సెంటిమెంట్..

‘రాక్షసుడు’ అనే టైటిల్ లోనే సినిమాకు సంబంధించిన అర్ధం ఉంటుంది. తనతోపాటు మరికొందరిని బాల కార్మికులుగా ఓ దీవికి తీసుకెళ్లి కొన్నేళ్లపాటు బయటి ప్రపంచానికి తెలీకుండా ఉంచడంతో విలన్ల పట్ల రాక్షసుడు అవుతారు చిరంజీవి. తల్లికి దూరమై.. ఆమె కోసం వెతికే ప్రయత్నంలో తనకు అడ్డుపడేవారి పట్ల రాక్షసంగానే వ్యవహరిస్తారు చిరంజీవి. ఇన్ని షేడ్స్ తో తెరకెక్కిన సినిమా చిరంజీవి ఫ్యాన్స్ తోపాటు ప్రేక్షకుల్ని కూడా కట్టి పడేసింది. తన తల్లి గురించి చెప్పిన సందర్భంలో.. ఆమె తన తల్లి కాదు అని విలన్ చెప్పిన సందర్భంలో రెండు విధాలుగా చిరంజీవి నటన అద్భుతమనే చెప్పాలి. ఇక్కడ సెంటిమెంట్ పండుతుంది. తాను దీవిలో ఉన్నప్పుడు ఓ మహిళ మోజు పడిన సందర్భంలో.. తల్లి ప్రేమ గురించి వివరించే సన్నివేశం చిరంజీవి ఆ పాత్రలో జీవించారని చెప్పాలి.

పాటల మ్యాజిక్కు..

సినిమాకు మరో మేజర్ ఎస్సెట్ ఇళయరాజా సంగీతం. అద్భుతమైన బాణీలతో వీనులవిందైన పాటలు అందించారు. వీటిని మరింత అందంగా చిరంజీవి మాయాజాలమే చేశారు. పాటల్లో చిరంజీవి స్టైల్, ఫుల్ హ్యాండ్ టీషర్ట్స్, డ్యాన్సులు పాటలను మరో ఎత్తుకు తీసుకెళ్లారు. ‘అచా.. అచ్చా.. బచా.. బచ్చా..’ అనే పాట సినిమాకే హైలైట్. భవనం చుట్టూ తిరుగుతూ ఆ పాటలో చిరంజీవి చేసిన స్టైలిష్ డ్యాన్సులు, ఎక్స్ ప్రెషన్స్ కు ప్రేక్షకులు మెస్మరైజ్ అయ్యారు. చిరంజీవి సరసన రాధ, సుహాసిని హీరోయిన్లుగా నటించారు. పాటల్లో చిరంజీవి-రాథ మధ్య కెమిస్ట్రీ మరోసారి మ్యాజిక్కే చేసింది. మెగా బ్రదర్ నాగబాబు సినిమాల్లోకి ఎంట్రీ ఈ సినిమా ద్వారానే ఇచ్చారు.

హ్యాట్రిక్ హిట్లు..

క్రియేటివ్ కమర్షియల్స్ బ్యానర్ పై కెఎస్. రామారావు ఈ సినిమా నిర్మించారు. ప్రముఖ నవలా రచయిత యండమూరి వీరేంద్రనాధ్ నవల రాక్షసుడు ఆధారంగా అదే టైటిల్ తో చిరంజీవికి లక్కీ డైరక్టర్ ఎ.కోదండరామిరెడ్డి దర్శకత్వంలో సినిమా తెరకెక్కించారు. అప్పటికే అభిలాష, చాలెంజ్ సినిమాలతో వరుస హిట్లు ఇచ్చిన ఈ కాంబినేషన్ రాక్షసుడుతో హ్యాట్రిక్ సాధించారు. 1986 అక్టోబర్ 2న విడుదలైన రాక్షసుడు ఘన విజయం సాధించింది. 26 కేంద్రాల్లో శతదినోత్సవం జరుపుకున్న ఈ సినిమా చిరంజీవిని మరో మెట్టు ఎక్కించింది. రజినీకాంత్ ముఖ్య అతిధిగా చెన్నైలో శతదినోత్సవ వేడుకలు నిర్వహించారు.