మెగాస్టార్ బర్త్ డే స్పెషల్స్: ఊరమాస్ పాత్రలో చిరంజీవికి సూపర్ హిట్ ‘దొంగ మొగుడు’

హీరోలకు మాస్ ఇమేజ్ రావడం ఓ వరం. ఇందుకు తగ్గ కథలని ఎంపిక చేసుకుని సినిమాలు చేస్తారు. మాస్ ఇమేజ్ ఇచ్చే కిక్కు అది. క్లాస్ పాత్రలకు కొన్ని కొలమానాలు ఉంటాయి. మాస్ పాత్రల్లో ఎంత చేస్తే అంత. ఫ్యాన్స్ పెరుగుతారు.. ప్రేక్షకాభిమానం పెరుగుతుంది. నటుడిగా స్థిరపడటం వేరు.. మాస్ హీరోగా నిలదొక్కుకోవడం వేరు. దీనిని బాగా ఒడిసి పట్టిన హీరో చిరంజీవి. సహజ నటన, మేనరిజమ్స్, డైలాగ్ డెలివరీ, హావభావాలతో 80వ దశకంలో మాస్ ప్రేక్షకుల్ని పూర్తిగా తనవైపుకు తిప్పుకున్నారు. తనకు పెరిగిన మాస్ ఇమేజ్ తో ఫ్యాన్స్ కోసమే ఆ జోనర్లో సినిమాలు చేశానని ఇటివల చిరంజీవే స్వయంగా చెప్పారు. అలా ఆయనలోని మాస్ యాంగిల్ ను తొలిసారి వెలికితీసిన సినిమా ‘దొంగమొగుడు’.

ఊరమాస్ పాత్రలో..

ఈ సినిమాలో చిరంజీవి ద్విపాత్రాభినయం చేశారు. సహజంగా క్లాస్ రోల్ లో ఓ పద్ధతిగా నటిస్తే.. మాస్ పాత్రలో చెలరేగిపోతారు. దొంగమొగుడులో చిరంజీవి చేసిన పని అదే. టెక్స్ టైల్ ఫ్యాక్టరీ యజమాని రవితేజ పాత్రలో అమాయకంగా, హుందాగా నటిస్తే.. స్టంట్ మాస్టర్ నాగరాజుగా ఊరమాస్ పాత్ర చేశారు. ధియేటర్ల వద్ద బ్లాక్ టికెట్లు అమ్మకం, రౌడీలతో ఫైట్లు, మాస్ పాత్రే చేసిన ఇద్దరు హీరోయిన్లలో ఒకరైన రాధికతో కామెడీ సన్నివేశాల్లో చిరంజీవి మాస్ నటనా విశ్వరూపాన్నే చూపిస్తారు. రవితేజలా ఆయన ఇంట్లో ఆఫీసులో చిరంజీవి చేసిన ఊరమాస్ నటన ప్రేక్షకుల్ని చక్కిలిగింతలు పెట్టింది. ప్రతి సీనులో ఆయన డైలాగ్ డెలివరీ, నటన, హావభావాలు దొంగమొగుడు సినిమాను ఇప్పటికీ ఫ్రెష్ గా ఉంచాయంటే అతిశయోక్తి కాదు.

పాటలన్నీ చార్ట్ బస్టర్లే..

సినిమాలో చిరంజీవికి ముగ్గురు హీరోయిన్లుగా మాధవి, రాధిక, భానుప్రియ నటించారు. ఎవరి పాత్ర ప్రాధాన్యం వారిదే. రాధికలోని మాస్ యాక్టింగ్ స్కిల్స్ ను సినిమాలో చూడొచ్చు. చిరంజీవి-రాధిక మధ్య వచ్చే సన్నివేశాలు అలరిస్తాయి. రవితేజ ఇంట్లోని వారికి బుద్ధి వచ్చేలా చేసే సమయంలో చిరంజీవి నటన అద్భుతమనే చెప్పాలి. చక్రవర్తి మరోసారి సినిమాకు తన సంగీతంలో మాయాజాలమే చేశారు. ప్రతి పాటా హిట్టే. ‘నల్లంచు తెల్ల చీర..’ పాటలో చిరంజీవి సిగరెట్ వెలిగించి చేసే డ్యాన్స్ స్టయిల్ ఆయనకు ఆయనే సాటి అనేలా ఉంటుంది. తన మార్క్ గ్రేస్ స్టెప్స్, హావభావాలతో పాటలన్నింటినీ ధియేటర్లో విజిల్స్ పడేలా చేశారు. పూర్తిస్థాయి ఎంటర్ టైనర్ గా పక్కా కమర్షియల్ హంగులతో సినిమా తెరకెక్కించారు.

ఈ సినిమానే మూలం..

మహేశ్వరి మూవీస్ బ్యానర్ పై ఎస్పీ వెంకన్నబాబు సినిమా నిర్మించారు. ఎ.కోదండరామిరెడ్డి మరోసారి చిరంజీవితో ష్యూర్ షాట్ హిట్ కొట్టారు. ప్రముఖ నవలా రచయిత యండమూరి వీరేంద్రనాధ్ రచన ‘నల్లంచు తెల్లచీర’ నవల ఆధారంగా సినిమా తీశారు. అప్పటికే యండమూరి నవలలు సినిమాలుగా చేస్తున్నారు చిరంజీవి. 1987 జనవరి 9న సంక్రాంతి సందర్భంగా విడుదలైన దొంగమొగుడు సూపర్ హిట్ అయి కలెక్షన్ల కనకవర్షంతో శతదినోత్సవ సినిమాగా నిలిచింది. ఈ సినిమా తర్వాత చిరంజీవి అనేక మాస్ పాత్రలు చేశారు. వీటికి దొంగమొగుడు సినిమాలో స్టంట్ మాస్టర్ నాగరాజు పాత్ర ఒక మలుపుగా చెప్పాలి.