Mega Family: ఏ రంగంలో ఉన్నామన్నది కాదు.. ఎంత విజయం సాధించామన్నది కాదు.. ఏస్థాయి గుర్తింపు తెచ్చుకున్నామన్నది కాదు. మన ప్రవర్తన, నడవడిక, ఇచ్చే గౌరవం, ఒద్దిక ఎంతన్నదే అసలైన విజయం, గుర్తింపు. దీనికి పర్ఫెక్ట్ ఎగ్జాంపుల్ మెగా ఫ్యామిలీ. చిరంజీవి, పవన్ కల్యాణ్, రామ్ చరణ్. ఒక కుటుంబం నుంచి వచ్చి తెలుగు సినిమాపై చెరగని ముద్ర వేశారు. ఒక్కడిగా అంత పెద్ద పరిశ్రమలోకి వచ్చి చిరంజీవిగా అడుగుపెట్టి ఒక్కో విజయం సాధిస్తూ మెగాస్టార్ అనే కీర్తి కిరీటం దక్కించుకున్నా.. ఇప్పటికీ ఆయనది సామాన్యుడి మనస్తత్వం.. అదే వినయం. అందుకే.. నేటికీ సినిమాల్లోకి వచ్చే ప్రతి ఒక్కరూ చిరంజీవి అంటే చెప్పేది ఇన్ స్పిరేషన్ అనే. ఎలా ఎదగాలో నేర్పిన వ్యక్తి.
పవన్ కల్యాణ్.. విభిన్నమైన మనస్తత్వం ఉన్న వ్యక్తి. ఆడంబరాలకు దూరం. పుస్తక పఠనం ఇష్టం. సమాజానికి సేవ చేయాలనే ధృఢ సంకల్పం. అయినా.. ఏం చేయాలో తెలీని పరిస్థితి నుంచి చిరంజీవి తమ్ముడిగా హీరో ఎంట్రీ ఇచ్చి తనదైన సామ్రాజ్యాన్నే సృష్టించుకున్నారు. ఏం మాట్లాడాలో, ఎలా మాట్లాడాలో, ఎక్కడ ఎంత మాట్లాడాలో తెలిసిన వ్యక్తి. తానేం చేయగలనో పూర్తి స్పష్టత ఉన్న వ్యక్తి. తనతోటి హీరోలు ఇమేజ్ కాపాడుకుంటూ.. ఇంకా పెంచుకుంటుంటే పవన్ కు అవేమీ పట్టవు. సమాజం, ప్రజలు. ఆ రంగంలోనే పయనించారు. జనసేన పెట్టారు. 10ఏళ్లు పోరాడారు.. నేడు రాష్ట్ర ఉపముఖ్యమంత్రి హోదాలో ఉన్నారు. ఎక్కడ తగ్గాలో తెలుసుకుని ఆయన సాధించిన విజయం ఓ పాఠం.
రామ్ చరణ్.. తెలుగు సినిమాను దశాబ్దాలుగా నెంబర్ వన్ హీరోగా ఏలేసిన మెగాస్టార్ చిరంజీవి తనయుడు. తనకేం కావాలో అవన్నీ వచ్చేస్తాయి. బోర్న్ విత్ సిల్వర్ స్పూన్. అయినా.. ఆయనెప్పుడూ తండ్రి మెగాస్టార్ హోదా చూసి ప్రవర్తించలేదు. చిరంజీవి కొడుకుగానే నిరాడంబరంగా, ఉన్నత విలువలతో పెరిగారు. తండ్రి అండతో హీరో అయ్యారు. కానీ.. తానేం చేయగలనో నిరూపించి ప్రేక్షకుల్ని మెప్పించారు. స్టార్ హీరో అయిపోయారు. చిరంజీవి కొడుకు.. అనే స్థాయి నుంచి రామ్ చరణ్ తండ్రి చిరంజీవి అనేస్థాయికి వెళ్లి తండ్రి గర్వపడేలా చేశారు. అయినా.. ఆయనలో కానరాని గర్వం. సింప్లిసిటీకే ఆయన ప్రాధాన్యం. దైవ చింతన ఎక్కువ. ఎదుటివారికి గౌరవం ఇవ్వడంలో రాజీలేని మనస్తత్వం.
ఇప్పుడిదంతా ఎందుకంటే.. ఇంత పెద్ద పరిశ్రమ ఎందరికో ఉపాధిని ఇస్తోంది. మెగా ఫ్యామిలీగా వీరి పాత్రా ఎక్కువే. కానీ.. అంతా మేమే, మావల్లే ఇదంతా అనేట్టు ఏనాడూ ప్రవర్తించలేదు. ఒకటి రెండు హిట్లు రాగానే నేనే అంతా అనేట్టూ బిహేవ్ చేయలేదు. ఎంత ఎదిగినా ఒదిగి ఉన్నారు. విమర్శలు వస్తే స్వీకరించారు. అపజయాలు వస్తే తట్టుకున్నారు. మరో విజయం కోసం కష్టపడ్డారు. చిరంజీవి.. తాను పెరిగిన మధ్యతరగతి మూలాలు మరువలేదు. పవన్ కల్యాణ్.. అన్న చూపిన దారిని మర్చిపోలేదు. రామ్ చరణ్.. అంత పెద్ద కుటుంబమైనా ఉన్నత విలువలతో పెంచిన చిరంజీవి పెంపకాన్నీ మర్చిపోలేదు. ముగ్గురూ చేసే పని సినిమాల్లో హీరోగా. కానీ.. నిజజీవితంలో సామాన్యులుగా జీవితం.