Mega 157: మెగాస్టార్ చిరంజీవి హీరోగా అనిల్ రావిపూడి దర్శకత్వంలో ఓ సినిమా తెరకెక్కుతున్న సంగతి తెలిసిందే. నయనతార హీరోయిన్ గా నటిస్తున్నారు. ఇటివలే ఓ షెడ్యూల్ కూడా పూర్తి చేసుకున్న సినిమా మరో షెడ్యూల్ ముస్సోరిలో నేటి నుంచి ప్రారంభమైంది. దీనిపై టీమ్ ఇచ్చిన అప్డేట్ అభిమానులను ఉత్సాహంలో ముంచెత్తుతోంది.
స్కూల్లో చిన్నారులు పరిగెత్తుకుంటూ వస్తూండగా మెగాస్టార్ ఎంతో స్టయిల్ గా వెనక నుంచి చేయి ఊపుతూ ఉన్న వీడియో సినిమాపై ఆసక్తి పెంచుతోంది. చిరంజీవిలోని అసలైన మ్యాజిక్ మరోసారి సినిమాలో చూపించబోతున్నారనే సంకేతాలు ఇస్తోంది. వీడియోకు భీమ్స్ అందించిన సంగీతం కూడా అలరిస్తోంది. పది రోజులపాటు షెడ్యూల్ జరుగనుంది.
మరోవైపు.. దర్శకుడు అనిల్ రావిపూడి ఎప్పటికప్పుడు ప్రమోషన్ కంటెంట్ ఇస్తూ అభిమానుల్లో, ట్రేడ్ లో ఆసక్తి రేకెత్తిస్తున్నారు. ఇదికదా చిరంజీవి సినిమాకు కావాల్సింది అంటూ ఫ్యాన్స్ సోషల్ మీడియాలో సంతోషం వ్యక్తం చేస్తున్నారు. వచ్చే సంక్రాంతి కానుకగా విడుదలవుతున్న సినిమాను సాహు గారపాటి, సుస్మిత కొణిదెల నిర్మిస్తున్నారు.