నానిని కలవలేదన్న మారుతి

నాని హీరోగా మారుతి దర్శకత్వంలో భలే భలే మగాడివోయ్‌ చిత్రం వచ్చి మంచి విజయాన్ని సొంతం చేసుకున్న విషయం తెల్సిందే. ఆ సినిమాతో దర్శకుడు మారుతి కమర్షియల్‌ ఎంటర్‌టైన్‌మెంట్‌ చిత్రాలకు బ్రాండ్‌ అంబాసిడర్‌గా నిలిచాడు. తాజాగా ఈయన ప్రతిరోజు పండుగే చిత్రంతో ప్రేక్షకుల ముందుకు వచ్చాడు. ఆ సినిమా సాయి ధరమ్‌ తేజ్‌కు మంచి విజయాన్ని తెచ్చి పెట్టింది. ఆ సినిమా తర్వాత మారుతి చేయబోతున్న సినిమా గురించి మీడియాలో రకరకాలుగా కథనాలు వస్తున్నాయి.

ఇటీవలే ప్రముఖ మీడియా సంస్థ ప్రస్తుతం మారుతి మరోసారి నానితో సినిమా చేసేందుకు స్క్రిప్ట్‌ రెడీ చేస్తున్నాడు అంటూ కథనంను రాయడం జరిగింది. దాంతో సినీ వర్గాల్లో మీడియా వర్గాల్లో ఆ విషయమై తెగ చర్చ జరిగింది. నాని చేస్తున్న రెండు సినిమాలు పూర్తి అయిన వెంటనే మారుతి దర్శకత్వంలో నాని నటిస్తాడంటూ ప్రచారం జరిగింది. కాని అవి పుకార్లే అంటూ మారుతి క్లారిటీ ఇచ్చాడు.

దర్శకుడు మారుతి తాజాగా ఆ విషయమై స్పందిస్తు ప్రస్తుతం తాను తదుపరి చిత్రం స్క్రిప్ట్‌ పనిలో ఉన్నాను. ఇప్పటి వరకు ఆ కథను ఎవరితో చర్చించలేదు. నానితో సినిమా అంటూ వస్తున్న వార్తలు నిజం కాదు. అసలు ఇప్పటి వరకు నానితో నేను చర్చించలేదు. కనీసం నానిని సినిమా విషయమై కలవను కూడా లేదని పేర్కొన్నాడు. మారుతి తదుపరి చిత్రం ఎవరితో ఉంటుందా అనే ఆసక్తి అందరిలో ఉంది. అఖిల్‌ అక్కినేనితో ఉంటుందనే వాదన కూడా కొందరు చేస్తున్నారు.