మ్యాన్ ఆఫ్ మాసెస్.. రామ్ చరణ్ నటనా కౌశలానికి నిదర్శనాలివే..

సినిమాల్లో హీరోగా గుర్తింపు కంటే స్టార్ స్టేటస్ ఎంతో ముఖ్యం. డ్యాన్స్, ఫైట్స్, కామెడీ, యాక్షన్.. లో ప్రత్యేకత చూపి ప్రేక్షకుల్ని మెప్పించాలి. చిరంజీవి తనయుడిగా సినిమాల్లోకి ఎంట్రీ ఇచ్చిన రామ్ చరణ్ రెండో సినిమాతోనే ఈ ఫార్ములాను చేసి చూపించాడు. తొలి సినిమా చిరుతతో సక్సెస్ అయినా.. రెండో సినిమా మగధీరలో నట విశ్వరూపాన్ని ప్రదర్శించాడు. అప్పటికి 79 ఏళ్ల తెలుగు చలన చిత్ర చరిత్రలోనే కాదు.. దక్షిణ భారత సినీ పరిశ్రమలోనే అత్యధిక కలెక్షన్లు సాధించిన సినిమాగా నిలిచించి మగధీర. సైనికుడిగా, ప్రేమికుడిగా రామ్ చరణ్ నటనకు ప్రేక్షకులు నీరాజనాలు పట్టారు. ముఖ్యంగా రామ్ చరణ్ గుర్రపు స్వారీ విన్యాసాలకు ముగ్దులైపోయారు. దర్శకుడు రాజమౌళి చెప్పినట్టు సినిమా ప్రారంభంలో రామ్ చరణ్ ప్రదర్శించిన హావభావాలు తన నటనా స్థాయిని తెలియచెప్పిందని చెప్పాలి.

రామ్ చరణ్ నట విశ్వరూపం..

రెండో సినిమాతోనే సంచలనాలు నమోదు చేసి స్టార్ హీరో అయిన రామ్ చరణ్.. మళ్లీ ఆస్థాయిలో హిట్ అందుకున్న సినిమా రంగస్థలం. దర్శకుడు సుకుమార్ రాసుకున్న చిట్టిబాబు.. చెవిటితనం ఉన్న పాత్రలో రామ్ చరణ్ ఒదిగిన తీరు తన నటనా పరిణితికి నిదర్శనంగా నిలిచింది. ప్రేక్షకులకు రామ్ చరణ్ కాకుండా చిట్టిబాబే కనిపించాడంటే అతిశయోక్తి కాదు. నటనలో రామ్ చరణ్ ను ఉన్నతస్థానంలో నిలిపింది.

కలెక్షన్ల ప్రభంజనం సృష్టించిన రంగస్థలం సినిమాతో నాన్ బాహుబలి కేటగిరీ హిట్ సాధించాడు. తన సమకాలీకుల్లో అప్పటికి రెండు ఇండస్ట్రీ హిట్స్ సాధించిన రెండో హీరోగా నిలిచాడు. డ్యాన్సులు, ఫైట్లతో అలరించే రామ్ చరణ్ లో ఇంతటి నటన చూసి విమర్శకులు సైతం ఫిదా అయిపోయారు. మగధీరతో తొలి 100 కోట్ల క్లబ్ హీరో అనిపించుకున్న రామ్ చరణ్.. నాన్ బాహుబలి కేటగిరీలో తొలి 200 కోట్ల కలెక్షన్ల హీరో అనిపించుకున్నాడు. సినిమా మొత్తం రామ్ చరణ్ ఒన్ మ్యాన్ షో నడిచిందనే చెప్పాలి.

జాతీయస్థాయిలో కీర్తి..

స్టార్ హీరో ఇమేజ్ తో ఉన్న రామ్ చరణ్ తో మల్టీస్టారర్ చేయాలంటే అందుకు తగ్గ కథ.. సమకాలీకుడు.. సినిమాను నడిపించే దమ్మున్న దర్శకుడు ఉండాలి. ఇంతటి మ్యాజిక్ ను చేసి చూపించాడు దర్శకుడు రాజమౌళి. జూ.ఎన్టీఆర్ తో రామ్ చరణ్ చేసిన ఆర్ఆర్ఆర్ భారతీయ బాక్సాఫీస్ లెక్కల్నే మార్చేసింది. దేశీయంగా 1150 కోట్ల కలెక్షన్లు సాధించింది.

పోలీసు, అల్లూరి సీతారామరాజుగా, బ్రిటిషర్లపై పోరాడే దేశభక్తి ఉన్న వీరుడిగా విభిన్న పార్శ్వాలున్న పాత్రలో రామ్ చరణ్ పరకాయ ప్రవేశమే చేశాడు. ఎంట్రీ సీన్లో భారీ ఫైట్ తోపాటు నటనతో కూడా మెప్పించాడు. రామ్ చరణ్ కు కొన్ని సన్నివేశాల్లో డైలాగులు కంటే హావభావాలు, నటనే ప్రదర్శించే అవకాశం దక్కింది. వీటిని సద్వినియోగం చేసుకున్న రామ్ చరణ్ తన నటనా పరాక్రమాన్ని చూపించి భారతీయ సినీ అభిమానులతో శెభాష్ అనిపించుకున్నాడు.