Mahesh Babu: ఓ చిన్న సినిమా వచ్చింది. ఆ సినిమాకి సూపర్ స్టార్ నుంచి మద్దతు లభించింది. నిజానికి, మంచి విషయమే ఇది. చిన్న సినిమాలకు పెద్ద పెద్ద స్టార్లు ప్రచారం చేస్తే, ఆయా సినిమాలకు మార్కెట్ పెరుగుతుంది. కానీ, అది మంచి సినిమా అయితేనే.. ఆయా స్టార్ హీరోలకూ గౌరవం.
‘మేం ఫేమస్’ సినిమా గురించే చర్చ ఇప్పుడు. సినిమా వచ్చింది. ‘ఛత్.. ఇదేం సినిమా.?’ అని అంతా ముక్కున వేలేసుకుంటున్నారు. యూ ట్యూబ్ షార్ట్ ఫిలిం కంటే దారుణం.. అంటున్నారు.
మరి, సూపర్ స్టార్ మహేష్‌బాబు, ఈ సినిమాని తాను చూశాననీ, చాలా బాగుందనీ ట్విట్టర్ రివ్యూ ఇవ్వడమేంటి.? ఆల్ ది బెస్ట్ చెబుతూ ఓ ట్వీట్ వేస్తే సరిపోయేదానికి, చిన్నపాటి రివ్యూలా ట్వీట్ చేసేశాడు సూపర్ స్టార్ మహేష్. దాంతో, అభిమానులే అవాక్కయ్యారు.
‘మహేషన్నా.. నీ స్థాయి తగ్గించుకోకు..’ అంటూ అభిమానులు, ఆ ట్వీటు చూసి వాపోయారు. జరగాల్సిన నష్టం జరిగిపోయింది. సినిమా తేడా కొట్టేసింది. ‘మహేష్ జడ్జిమెంట్ ఇంత వరస్ట్‌గా వుంటుందా.?’ అని ‘మేం ఫేమస్’ సినిమా చూసినోళ్ళు విమర్శిస్తున్నారు.
‘ఇకపై మహేష్ మాటల్ని నమ్మి ఇలాంటి సినిమాలకు రాకూడదు..’ అని అభిమానులే నిర్మొహమాటంగా చెబుతున్నారు. ఏదో ఆబ్లిగేషన్ వల్ల మహేష్ ఆ ట్వీటు వేసి వుండొచ్చు. కానీ, ట్వీటు వేసే విషయంలో కాస్తంత జాగ్రత్త పడి వుండాల్సింది మహేష్.
అన్నట్టు, ‘వేరే సినిమాని ప్రోత్సహించావ్ సరే.. మీ మద్దతు వుందట కదా.? మీ అన్నయ్య నరేష్ సినిమాకి ఎందుకు అనుకూలంగా ట్వీటెయ్యలేదు.?’ అంటూ ప్రశ్నిస్తున్నారు కొందరు. ‘మళ్ళీ పెళ్ళి’ సినిమాకి రివ్యూ కావాలంటూ విపరీతంగా ట్రోలింగ్ జరుగుతోంది సోషల్ మీడియాలో. పైగా, మహేష్ అభిమానులే ‘మళ్ళీ పెళ్ళి’ సినిమా విషయంలో తమ అభిమాన హీరోని ట్రోల్ చేస్తున్నారు.
సీనియర్ నటుడు నరేష్, సీనియర్ నటి పవిత్ర నటించిన ‘మళ్ళీ పెళ్ళి’ సినిమా కూడా నేడే ప్రేక్షకుల ముందుకొచ్చిన సంగతి తెలిసిందే. ‘మహేష్ మమ్మల్ని అంగీకరించాడు.. మా రిలేషన్ పట్ల సానుకూలంగా స్పందించాడు..’ అని నరేష్, పవిత్ర చెప్పుకున్నారు పలు ఇంటర్వ్యూల్లో.
సూపర్ స్టార్ కృష్ణ రెండో భార్య విజయ నిర్మల తనయుడే సీనియర్ నటుడు నరేష్. విజయ నిర్మలకి మొదటి భర్త ద్వారా కలిగిన సంతానం నరేష్. ఆ నరేష్ విషయంలో మహేష్ అభిమానులెప్పుడూ సానుకూలంగా వుండరు. అలాంటిది. మూడో భార్యతో విడాకుల పంచాయితీ ఓ కొలిక్కి రాకుండానే, పవిత్ర నరేష్‌తో సహజీవనం మొదలు పెట్టిన నరేష్‌ని ఎలా మహేష్ అభిమానులు అంగీకరిస్తారు.? అన్న ప్రశ్న తెరపైకొస్తోంది.
ఆ కారణంగానే మహేష్, ‘మళ్ళీ పెళ్ళి’కి అనుకూలంగా ట్వీటెయ్యలేదా.? అనీ ప్రశ్నిస్తున్నారు మరి.!