రఘురామ ఫిర్యాదుపై హోం శాఖను వివరణ కోరిన లోక్ సభ స్పీకర్

వైసీపీ రెబల్ ఎంపీ రఘురామకృష్ణరాజు వ్యవహారంలో లోక్ సభ స్పీకర్ కార్యాలయం, కేంద్ర హోంశాఖ కార్యదర్శి సమగ్ర వివరాలు అందించాలని ఆదేశించింది. ఈ మేరకు స్పీకర్ కార్యలయం కేంద్ర హోం శాఖ కార్యదర్శికి లేఖ రాయడం గమనార్హం. 15 రోజుల్లోనే స్పీకర్ కార్యలయానికి రఘురామ అరెస్టు వ్యవహారానికి సంబంధించి సమగ్ర వివరాలు పంపాల్సి వుంటుంది.

మే 14న తనను ఏపీ సీఐడీ అరెస్టు చేసి, తన మీద థర్డ్ డిగ్రీ టార్చర్ ప్రయోగించిందని రఘురామ ఆరోపిస్తున్నారు. ఈ వ్యవహారంపై లోక్ సభ స్పీకర్ ఓం బిర్లాకు రఘురామ ఫిర్యాదు చేశారు. అదే సమయంలో ఆంధ్రపదేశ్ ముఖ్యమంత్రి, డీజీపీ, సీఐడీ ఏడీజీ, సీఐడీ ఎస్పీలపై ఆయన సభా హక్కుల నోటీసు కూడా ఇవ్వడం గమనార్హం. మరోపక్క, రఘురామ కుమారుడు భరత్ కూడా తన తండ్రిని అక్రమంగా అరెస్టు చేశారంటూ కేంద్ర హోం మంత్రిత్వ శాఖకు ఫిర్యాదు చేసిన విషయం విదితమే.

టీడీపీ ఎంపీలు కనకమేడల రవీంద్ర కుమార్, కింజరాపు రామ్మోహన్ నాయుడు కూడా రఘురామ అరెస్టుపై స్పీకర్ ఓం బిర్లాకు ఫిర్యాదు చేశారు. రాజద్రోహం కేసులో రఘురామని అరెస్టు చేయడం, ఆ తర్వాత పరిణామాలన్నీ అత్యంత నాటకీయంగా మారడం తెలిసిన సంగతులే. రఘురామ తన మీద ఏపీ సీఐడీ థర్డ్ డిగ్రీ ప్రయోగించిందని చెబుతున్నారు. అదంతా అవాస్తవం.. అని అంటోంది ఏపీ సీఐడీ. కానీ, రఘురామ కాలిపై తీవ్రమైన గాయాలు కనిపించాయి. ఆ గాయాలకు సికింద్రాబాద్ ఆర్మీ ఆసుపత్రిలో సుప్రీంకోర్టు ఆదేశాల నేపథ్యంలో వైద్య చికిత్స అందించడం జరిగింది.

మెడికల్ రిపోర్టు విషయంలోనూ ఏపీ సీఐడీ, ఏపీ ప్రభుత్వం (ప్రభుత్వాసుపత్రి ఇచ్చిన నివేదిక.. అంటే ప్రభుత్వ నివేదికలానే భావించాలన్నది నిపుణుల వాదన) తీరు సర్వత్రా విమర్శలకు తావిచ్చింది. రఘురామ ఇప్పటికీ ఇదివరకటిలా నడవలేకపోతున్నారు.. అంతలా ఆయన కాలికి గాయాలయినట్లే తెలుస్తోంది. కానీ, అసలు గాయాలే కాలేదనీ, చర్మ సమస్య కారణంగా ఏర్పడ్డ ఎర్రటి మచ్చల్ని గాయాలుగా రఘురామ చూపిస్తున్నారని ఏపీ సీఐడీ చెబుతోన్న విషయం విదితమే. మొత్తమ్మీద, స్పీకర్ కార్యాలయం కేంద్ర హోంశాఖ నుంచి వివరణ కోరడంతో.. ఆ హోంశాఖ కార్యదర్శి ఎలాంటి వివరాల్ని స్పీకర్ కార్యాలయానికి పంపుతారన్నది చర్చనీయాంశంగా మారింది.