నిడమర్రు ఆర్వోబీకి శంకుస్థాపన:
మంగళగిరి ప్రజలు ఎన్నో ఏళ్లుగా ఎదురుచూస్తున్న నిడమర్రు రైల్వే ఓవర్ బ్రిడ్జి (ఆర్వోబీ) నిర్మాణానికి మంత్రి నారా లోకేష్ శంకుస్థాపన చేశారు. నంబూరు-మంగళగిరి రైల్వే సెక్షన్లోని 14వ నెంబర్ లెవల్ క్రాసింగ్ వద్ద రూ.142 కోట్ల వ్యయంతో ఈ వంతెన నిర్మించనున్నారు.
మంగళగిరి, తాడికొండ, అమరావతి ప్రాంతాలను అనుసంధానించే ఈ మార్గంలో రైల్వే గేటు కారణంగా ప్రజలు రోజూ తీవ్ర ఇబ్బందులు ఎదుర్కొంటున్నారు. రోజుకు సుమారు 60 రైళ్లు ప్రయాణించే ఈ మార్గంలో గేటు మూసివేత వల్ల ఎనిమిది నుంచి పది గంటల వరకు ట్రాఫిక్ అంతరాయం ఏర్పడుతోంది. వంతెన నిర్మాణం పూర్తయిన తర్వాత ఈ సమస్యకు శాశ్వత పరిష్కారం లభించనుంది.
767.5 మీటర్ల పొడవుతో, నాలుగు లేన్ల రహదారితో నిర్మించే ఈ ఆర్వోబీపై 15 మీటర్ల వెడల్పు క్యారేజ్ వే ఉండనుంది. రెండు వైపులా సర్వీస్ రోడ్లు, భద్రతా ఏర్పాట్లు కూడా కల్పించనున్నారు. దీంతో అమరావతి, మంగళగిరి మధ్య ప్రయాణ సమయం తగ్గడంతో పాటు భవిష్యత్ పట్టణీకరణకు కూడా ఊతమివ్వనుంది.
కాజ ఈస్ట్ లేక్ పార్క్ ప్రారంభం:
మంగళగిరి మండలం కాజ గ్రామంలో రూ.3.3 కోట్ల వ్యయంతో అభివృద్ధి చేసిన కాజ ఈస్ట్ లేక్ పార్క్ను మంత్రి నారా లోకేష్ ప్రారంభించారు. సెల్కాన్ సంస్థ సీఎస్ఆర్ నిధులతో అభివృద్ధి చేసిన ఈ పార్క్ ప్రజలకు ఆరోగ్యకరమైన, పర్యావరణహిత జీవనశైలిని అందించాలనే లక్ష్యంతో రూపొందించబడింది.
17.18 ఎకరాల విస్తీర్ణంలో ఉన్న చెరువు చుట్టూ పార్క్ను ఆధునిక హంగులతో తీర్చిదిద్దారు. 1.7 కిలోమీటర్ల పొడవైన వాకింగ్ ట్రాక్, ఓపెన్ జిమ్, చిన్నారుల కోసం ప్రత్యేక ఆట స్థలం, లైటింగ్ వ్యవస్థ, భద్రతా ఫెన్సింగ్ వంటి సదుపాయాలు ఏర్పాటు చేశారు.
పార్క్లో 42 రకాల జాతులకు చెందిన 12,800 మొక్కలను నాటడం విశేషం. ప్రారంభోత్సవం సందర్భంగా మంత్రి లోకేష్ మొక్కను నాటి, పార్క్లోని వసతులను పరిశీలించారు.
రూ.1,167 కోట్ల భూగర్భ డ్రైనేజీ ప్రాజెక్టుకు శ్రీకారం:
మంగళగిరి-తాడేపల్లి మున్సిపల్ కార్పొరేషన్ పరిధిలో భూగర్భ మురుగునీటి పారుదల వ్యవస్థ నిర్మాణానికి మంత్రి లోకేష్ శంకుస్థాపన చేశారు. ఎన్నికల సమయంలో ఇచ్చిన హామీ మేరకు చేపట్టిన ఈ ప్రాజెక్ట్కు మొత్తం రూ.1,167.50 కోట్ల వ్యయం అంచనా వేశారు.
రెండు దశల్లో అమలు కానున్న ఈ ప్రాజెక్టులో మొత్తం 531 కిలోమీటర్ల యూజీడీ నెట్వర్క్ నిర్మించనున్నారు. అలాగే 20 మురుగునీటి శుద్ధి కేంద్రాలు (ఎస్టీపీలు), 18 లిఫ్ట్ స్టేషన్లు ఏర్పాటు చేయనున్నారు.
మొదటి దశలో రూ.604.32 కోట్లు, రెండో దశలో రూ.563.18 కోట్లు వెచ్చించనున్నారు. ప్రాజెక్ట్ పూర్తయిన తర్వాత మంగళగిరి, తాడేపల్లి ప్రాంతాల్లో దశాబ్దాలుగా కొనసాగుతున్న మురుగునీటి సమస్యకు శాశ్వత పరిష్కారం లభించనుంది. పట్టణ పరిశుభ్రత, ప్రజారోగ్య ప్రమాణాలు గణనీయంగా మెరుగుపడనున్నాయి.
వైకుంఠ మహాప్రస్థానం ఆధునీకరణ:
మంగళగిరిలో ఆధునిక సదుపాయాలతో అభివృద్ధి చేసిన వైకుంఠ మహాప్రస్థానాన్ని కూడా మంత్రి లోకేష్ సందర్శించారు. బిట్రావారి వీధి సమీపంలోని 2.90 ఎకరాల విస్తీర్ణంలో ఈ ప్రాజెక్టును అభివృద్ధి చేశారు.
ఫీనిక్స్ ఫౌండేషన్ సీఎస్ఆర్ నిధులు, ఇతర సహకారంతో రూ.3.25 కోట్ల వ్యయంతో నిర్మించిన ఈ కేంద్రంలో నాలుగు ఆధునిక దహన వేదికలు, నిరీక్షణ మందిరాలు, భోజనశాల, కార్యాలయం, అస్థికల భద్రతా గది, ఆచార గదులు, క్షౌరశాల, మరుగుదొడ్లు, కలప నిల్వ షెడ్, మార్చురీ బాక్స్లు వంటి సదుపాయాలు ఏర్పాటు చేశారు.
అదనంగా సౌర విద్యుత్ దీపాలు, సుందరీకరణ పనులు, శిల్పాలు, జనరేటర్ సౌకర్యం కల్పించడం ద్వారా అంత్యక్రియల కోసం వచ్చే కుటుంబాలకు మెరుగైన వాతావరణాన్ని అందుబాటులోకి తీసుకువచ్చారు.
మంగళగిరి నియోజకవర్గంలో రవాణా, పర్యావరణం, పారిశుద్ధ్యం, సామాజిక మౌలిక వసతుల అభివృద్ధికి సంబంధించిన ఈ నాలుగు ప్రాజెక్టులు ప్రాంత భవిష్యత్ అభివృద్ధికి కీలకంగా మారనున్నాయని అధికారులు పేర్కొంటున్నారు.
