వూహాన్ లో 11 వారాల తర్వాత.. ఇండియాలో ఎప్పుడో?

కరోనా మహమ్మారికి పుట్టినిల్లు వూహాన్ లో 11 వారాల తర్వాత లాక్ డౌన్ పూర్తిగా ఎత్తివేశారు. దీంతో వూహాన్ వాసులు ఊపిరి పీల్చుకున్నారు. 76 రోజుల గృహ నిర్బంధం బుధవారం బయటి ప్రపంచాన్ని చూశారు. చైనా ప్రభుత్వం వారి ప్రయాణాలకు కూడా అనుమతి ఇవ్వడంతో రైళ్లు, ఇతర రవాణా వాహనాలు కిటకిటలాడాయి. దుకాణాలు, వ్యాపార సముదాయాలు తెరుచుకోవడంతో సాధారణ పరిస్థితి కనిపించింది.

వూహాన్ లో కరోనా సృష్టించిన కరాళ నృత్యంతో జనవరి 23న అక్కడ లాక్ డౌన్ విధించారు. దేశంలోని మిగతా ప్రాంతాలతో అన్ని సంబంధాలూ కట్ చేశారు. లాక్ డౌన్ ను పక్కాగా అమలు చేశారు. వైరస్ అక్కడే మొదలైన నేపథ్యంలో కరోనా కేసులు, మరణాలు వూహాన్ లో ఎక్కువగా నమోదయ్యాయి.

ఈ నేపథ్యంలో 11 వారాల తర్వాత కొత్తగా ఒక్క కేసు కూడా నమోదు కాకపోవడంతో లాక్ డౌన్ ఎత్తివేశారు. ఇక ఇండియా విషయానికి వస్తే.. ప్రస్తుతం దేశవ్యాప్తంగా మూడు వారాల లాక్ డౌన్ అమల్లో ఉంది. ఇప్పటివరకు 5,199 కేసులు నమోదు కాగా, 149 మంది ప్రాణాలు కోల్పోయారు. మన దేశ జనాభాతో పోల్చినా.. ఇతర దేశాల్లో ఈ వైరస్ వ్యాప్తితో పోల్చినా ఇండియాలో ఇప్పటికీ పరిస్థితి అదుపులోనే ఉందని చెబుతున్నారు.

ఢిల్లీ జమాత్ కేసులు లేకపోయి ఉంటే, ఇన్ని ఎక్కువగా నమోదై ఉండేవి కావు. ఈ నేపథ్యంలో మరిన్ని కేసులు నమోదు కాకుండా ప్రభుత్వాలు కట్టుదిట్టమైన చర్యలు తీసుకుంటున్నాయి. ఇందులో భాగంగానే మార్చి 14 తర్వాత కూడా లాక్ డౌన్ పొడిగించాలని పలు రాష్ట్రాలు కేంద్రానికి సూచిస్తున్నాయి. కేంద్రం కూడా ఇందుకు సానుకూలంగానే ఉన్నట్టు తెలుస్తోంది. రాబోయే నాలుగు రోజుల్లో కేసుల నమోదను బట్టి దీనిపై నిర్ణయం తీసుకునే అవకాశం ఉంది.

పరిస్థితి అదుపులో ఉన్న, అసలు కేసులు లేని ప్రాంతాల్లో లాక్ డౌన్ ఎత్తివేసి, మిగిలిన ప్రాంతాల్లో కొనసాగించే అంశాన్ని పరిశీలిస్తున్నట్టు సమాచారం. కరోనాకు తీవ్రంగా కుదేలైన వూహాన్ లో 11 వారాల తర్వాత లాక్ డౌన్ ఎత్తివేసినందును మన దేశంలో నాలుగు లేదా ఐదు వారాల సమయం సరిపోతుందని అంచనా వేస్తున్నారు. మూడు వారాల లాక్ డౌన్ ఏప్రిల్ 14తో ముగియనుంది. అనంతరం మరో వారం పది రోజులు పొడిగించే అవకాశం ఉందని చెబుతున్నారు. దీనిపై రెండు మూడు రోజుల్లో స్పష్టత రానుంది.