లాక్‌డౌన్‌ సడలింపుతో పొంచి వున్న పెను ముప్పు.!

దేశంలో కరోనా వైరస్‌ (కోవిడ్‌ 19) తీవ్రత రోజురోజుకీ పెరిగిపోతోందని రోజువారీ గణాంకాలు చెబుతున్నాయి. కానీ, రేపటి నుంచి దేశంలో లాక్‌డౌన్‌ నుంచి కొంత సడలింపు అమల్లోకి రాబోతోంది. ఈ నేపథ్యంలో ఇ-కామర్స్‌కి ముందు ఇచ్చిన అనుమతుల్ని (టీవీలు, మొబైల్‌ ఫోన్ల వంటి వస్తువుల విక్రయాలకు సంబంధించి) రద్దు చేసింది కేంద్రం. అయినాసరే, సడలింపులు ప్రమాదకరం.. అంటున్నాయి పలు రాష్ట్రాలు.

ఇప్పటికే ఢిల్లీ తదితర రాష్ట్రాలు, ‘లాక్‌డౌన్‌ని మే 3 వరకూ ఎలాంటి సడలింపులు లేకుండా కొనసాగిస్తాం.. ప్రజారోగ్యమే ముఖ్యం..’ అంటూ తేల్చి చెబుతున్నాయి. నిజానికి, ఇప్పుడే మరింత జాగ్రత్తగా వుండాల్సిన పరిస్థితి. కరోనా వైరస్‌, రెండో దశ నుంచి మూడో దశకి.. (అంటే ఎవరి ద్వారా సోకిందో అంతకు చిక్కకుండా చాలామందికి సోకడం) చేరుకున్నా, ఆ విషయాన్ని స్పష్టంగా ప్రకటించేందుకు కేంద్రం, రాష్ట్రాలు మీనమేషాల్లెక్కెడుతున్నాయి.

హాట్‌ స్పాట్స్‌కి సంబంధించి కేంద్రం ఆలోచనలు, రాష్ట్రాల ఆలోచనల మధ్య పొంతన కుదరడంలేదన్న చర్చ జరుగుతోంది. హాట్‌ స్పాట్‌ అంటే కేవలం కొంత ప్రాంతానికే పరిమితమని ఆంధ్రప్రదేశ్‌ చెబుతోంది. కానీ, జిల్లా వ్యాప్తంగా హాట్‌ స్పాట్‌ ప్రకటించాలనే డిమాండ్‌ తెరపైకొస్తోంది. లాక్‌ డౌన్‌ నుంచి ప్రజలకు కొంత వెసులుబాటు కల్పించాలన్న ఆలోచన సబబే. కానీ, ప్రస్తుత పరిస్థితి ఏంటి.? కరోనా వైరస్‌ ఎట్నుంచి ఎలా ఎవర్ని ముంచేస్తుందో తెలియని పరిస్థితి.

దాంతో, ఇప్పుడు ఏ మాత్రం వెసులుబాటు కల్పించినా.. ప్రమాదంలోకి తెలిసి దూకుతున్నట్లే లెక్క. లాక్‌డౌన్‌ కొనసాగిస్తే అనూహ్యమైన పరిణామాలు చోటు చేసుకుంటాయనీ, దేశంలో కరోనా వైరస్‌ని అస్సలేమాత్రం అదుపు చేయలేని పరిస్థితి వస్తుందని నిపుణులు హెచ్చరిస్తున్నారు. మొత్తమ్మీద, ‘సడలింపు’కి కొద్ది గంటలు మాత్రమే వున్న దరిమిలా.. కేంద్రం చివరి నిమిషంలో కీలక నిర్ణయం తీసుకుంటుందా.? వేచి చూడాల్సిందే.