శాసన మండలి దండగన్నారుగా.. ఎన్నికలెందుకు చెప్మా.?

ఆంధ్రప్రదేశ్, తెలంగాణ రాష్ట్రాల్లో ఎమ్మెల్యే కోటా ఎమ్మెల్సీ ఎన్నికలకు రంగం సిద్ధమవుతున్న విషయం విదితమే. తెలంగాణ సంగతి పక్కన పెడితే, ఆంధ్రప్రదేశ్ ప్రభుత్వం శాసన మండలి రద్దు దిశగా ఇప్పటికే నిర్ణయం తీసుకుంది. రాష్ట్ర శాసన సభలో శాసన మండలి రద్దు దిశగా తీర్మానం చేసి, కేంద్రానికి పంపేశారు కూడా.

శాసన మండలి అంటే ఖర్చు దండగ వ్యవహారమని వైఎస్ జగన్ సర్కార్ తేల్చేసింది. మూడు రాజధానులు సహా పలు కీలక బిల్లుల విషయమై శాసన మండలిలో తమకు ఇబ్బందులు తలెత్తుతుండడాన్ని జీర్ణించుకోలేకపోయిన జగన్ సర్కార్, చిత్రంగా శాసన మండలి రద్దు అంశాన్ని తెరపైకి తెచ్చింది.

అయితే, శాసన మండలి రద్దు దిశగా చిత్తశుద్ధితో తీర్మానమైతే చేసిందిగానీ, జగన్ సర్కారు.. ఆ తీర్మానానికి కట్టుబడి వ్యవహరించడంలేదు. పలువురు ఆశావహులకు ఎప్పటికప్పుడు శాసన మంలి సభ్యత్వాన్ని ఆఫర్ చేస్తున్నారు ముఖ్యమంత్రి వైఎస్ జగన్ మోహన్ రెడ్డి.

ఇప్పుడేమో ఎమ్మెల్యే కోటా ఎమ్మెల్సీ ఎన్నికలకు రంగం సిద్ధమయ్యిందాయె. ఆశావహులు మళ్ళీ ముఖ్యమంత్రి చుట్టూ తిరగడం మామూలే. రాష్ట్ర ప్రభుత్వం తమకు శాసన మండలి వద్దు మొర్రో.. అని కేంద్రానికి చెప్పేశాక, కేంద్రం ఈ విషయమై కీలక నిర్ణయం తీసుకోవాల్సి వుంది.
రాష్ట్రమే శాసన మండలి వద్దనేశాక, కేంద్రం ఎందుకు రద్దు విషయంలో జాప్యం చేస్తోందట.? ఎటూ ఖర్చు దండగ వ్యవహారమనేశారు గనుక, అధికార వైసీపీ.. తమ అభ్యర్థుల్ని బరిలోకి దించకపోతే.. తమ చిత్తశుద్ధిని చాటుకున్నట్లవుతుంది.

ఇంకా నయం.. అప్పట్లో ఏదో ఆవేశానికి పోయి.. పంతానికి పోయి.. శాసన మండలి రద్దు అన్నారుగానీ.. శాసన మండలి రాజకీయ పార్టీలకు ఎంత ఉపయోగకరమో తెలుసా.? కోట్లు వెచ్చించి, పదవులు కొనుక్కోడానికి చాలామంది సిద్ధంగా వుంటారాయె.. అలా శాసన మండలి పదవుల్ని సొమ్ము చేసుకోవడానికి అలవాటుపడిపోయిన రాజకీయ పార్టీలు.. అత్యద్భుతమైన అవకాశాల్ని వదులుకుంటాయా.? ఛాన్సే లేదు.