NTR 100 Years: సినిమా గురించి మాట్లాడాలంటే, స్వర్గీయ ఎన్టీయార్ ప్రస్తావన తప్పనిసరి.! రాజకీయాల ప్రస్తావన రావాలన్నా, ఆ స్వర్గీయ ఎన్టీయార్ ప్రస్తావన రాకుండా వుండదు.! దటీజ్ ఎన్టీయార్. శక పురుషుడనీ.. యుగ పురుషుడనీ.. ఇంకోటనీ.. ఆ విశ్వ విఖ్యాత నట సార్వభౌముడు, మాజీ ముఖ్యమంత్రి నందమూరి తారక రామారావుని కొనియాడటంలో వింతేముంది.?
తెలుగు జాతి ఆత్మ గౌరవం.. వంటి పొగడ్తల విషయంలో చాలామందికి అభ్యంతరాలున్నాయనుకోండి.. అది వేరే సంగతి. ఎన్టీయార్ జీవితంలో ఆ ‘వెన్నుపోటు’ ఎపిసోడ్‌ని మినహాయిస్తే, ఆయన సంపూర్ణ జీవితాన్ని అత్యంత ఆనందకరంగా అనుభవించారని చెప్పక తప్పదు.
ఆ వెన్నుపోటు అనేది లేకుండా వుంటే, ఏమో.. ఆయన వందేళ్ళు జీవించి వుండేవారేమో.! నేటికీ ఆయన మన మధ్యన వుండేవారేమో.!
స్వర్గీయ ఎన్టీయార్ శత జయంతి వేడుకలు జరుగుతున్నాయ్. ఇంకో వైపు, తెలుగుదేశం పార్టీ మహానాడు జరుగుతోంది. ఎవర్నయితే పార్టీ నుంచి గెంటేశారో, ఆయన విగ్రహాలు పెట్టుకుని తెలుగుదేశం పార్టీ ‘మహానాడు’ నిర్వహిస్తోంది. ఏ ఎన్టీయార్‌ని కుటుంబ సభ్యులే వెన్నుపోటు పొడిచారో.. ఆ ఎన్టీయార్‌ని ఆ కుటుంబ సభ్యులు స్మరించుకుంటున్నారు.
ఆ నడక.. ఆ నడత.. ఆ రూపం.. వాట్ నాట్.! స్వర్గీయ నందమూరి తారక రామారావుకి సాటి ఇంకెవరూ రారు. తెలుగు తెరపై రాముడంటే ఎన్టీయార్, కృష్ణుడంటే ఎన్టీయార్. అలాగే, ఆ కోణంలోనే స్వర్గీయ ఎన్టీయార్ విగ్రహాన్ని కృష్ణుడి రూపంలో ఏర్పాటు చేయదలిస్తే, న్యాయపరమైన చిక్కులు ఎదురయ్యాయ్.
గొప్ప వ్యక్తిని స్మరించుకునే క్రమంలో చేసే అతి, ఆ వ్యక్తి గొప్పతనాన్ని తగ్గించేస్తుందేమో.! కపట ప్రేమ వల్ల కలిగే ఇబ్బంది ఇది.! స్వర్గీయ ఎన్టీయార్‌కి భారత రత్న ఇవ్వాలి.. ఈ డిమాండ్ జయంతికో, వర్ధంతికో మాత్రమే వినిపిస్తుంటుంది.
ఔను, స్వర్గీయ ఎన్టీయార్ అంటే కొందరికి ‘ఉనికి కోసం’ అవసరం. దురదృష్టం.. అలాంటివాళ్ళంతా ఆయనకి అయినవాళ్ళే.! అనుచరులే.! ఆయన్ని నిజంగా అభిమానించేవాళ్ళకి మాత్రం, ఆయన ఎప్పుడూ దేవుడే.! జోహార్ ఎన్టీయార్.!