Kota Srinivasa Rao: కోట శ్రీనివాసరావు.. తెలుగు చిత్రసీమ మర్చిపోలేని పేరు. విలక్షణమైన నటన అనే పదానికి నూరు శాతం న్యాయం చేసిన నటుడు ఆయన. పాత్రలోకి పరకాయ ప్రవేశం అనే మాటకు న్యాయం చేసిన నటుడు. కమెడియన్, విలన్, తండ్రి, తాత, మావయ్య.. ఇలా ఆయన చేయని పాత్ర లేదు. అన్నింట్లోనూ ప్రత్యేకతే. సినిమాలో కోట కోసం ప్రత్యేకంగా రాసుకున్న పాత్రలు ఉన్నాయి. ఆయనే నటించాలని పట్టుబట్టిన హీరో, దర్శక, నిర్మాతలు ఉన్నారు. అంతటి విలక్షణ నటుడు ఇక నుంచి ‘ఓ జ్ఞాపకం’లా మిగిలిపోవడం జీర్ణించుకోలేనిది. హలో బ్రదర్.. సినిమాలో ఆద్యంతం నవ్వించిన ఆయనే.. మల్లిఖార్జునరావు పాత్ర చనిపోతే తనదైన నటనతో ఏడిపిస్తారు. ‘ఇకనుంచి నా స్పెల్లింగ్ మిస్టేక్స్ ఎవరు కరెక్ట్ చేస్తార్రా’ అని. ఇప్పుడూ పరిశ్రమ, ప్రేక్షకులు అదే అంటున్నారు.. ‘ఇక నుంచి ఎవరు నవ్విస్తారయ్యా’ అని.
ఎస్వీ రంగారావు, గుమ్మడి, రావుగోపాలరావు, సత్యనారాయణ హవా తర్వాత.. క్యారెక్టర్ ఆర్టిస్టుల్లో అంతటి స్థాయిని అందుకున్నారు కోట. కమెడియన్, విలన్, పిసినారి, మధ్యతరగతి తండ్రి.. ఏ పాత్రలోనైనా ఆయన ఒదిగిపోయేవారు. బాబూమోహన్-కోట జంట కామెడీతో తెలుగు సినిమాను ఓ ఊపు ఊపేశారు. మామగారు నుంచి ఓ 50 సినిమాల్లో తమ అల్లరితో నవ్వులు పండించారు. ‘అహనా.. పెళ్లంట’లో బ్రహ్మానందంలో కలిసి పిసినారి సీతాపతి పాత్ర ఇప్పటికీ ప్రతి తెలుగింట్లో చక్కిలిగింతలు పెడుతూనే ఉంటుంది.విలనిజంలోనూ అత్యంత క్రూరంగా నటించేవారు. ‘గాయం’లో.. ‘ఇదైతే నేను ఖండిస్తున్నా’ అని నవ్విస్తూనే విలనిజం రక్తికట్టించారు. ‘గణేశ్’లో వైద్యశాఖ మంత్రిగా ఆయన గాంభీర్యం పీక్స్. రూపంలో ఎంతో పద్దతిగా వార్నింగ్ ఇచ్చే సన్నివేశంలో ప్రేక్షకులు లీనమైపోయారంటే అతిశయోక్తి కాదు.
తెలుగు సినిమాల్లో పరభాషా క్యారెక్టర్ ఆర్టిస్టులు ఎక్కువ. కానీ, తెలుగు నుంచి పరభాషల్లోకి వెళ్లిన క్యారెక్టర్ ఆర్టిస్టు మాత్రం కోట శ్రీనివాసరావు మాత్రమే. హిందీలో అమితాబ్ తో ‘సర్కార్’లో కోటనే కావాలని ఆర్జీవీ పట్టుబట్టి నటించేలా చేశారు. కోట కాల్షీట్లు లేకపోతే ఆయన కోసం షూటింగ్ పోస్ట్ పోన్ చేసి మరీ నటింపజేశారు ఆర్జీవి. తనదైన నటనతో సెల్వన్ మణిగా, హిందీ డైలాగులతో ఒదిగిపోయారు. తమిళంలో సామి, కో, మలయాళంలో ది ట్రెయిన్, కన్నడలో లవ్, నమ్మ బసవ తదితర సినిమాల్లో నటించారు. తెలుగులో ‘ప్రతిఘటన’లో మంత్రి కాశియ్యగా తెలంగాణ యాసలో డైలాగులతో విలనిజంకు కొత్త అర్ధం చెప్పారు. అదే ఏడాది వచ్చిన ‘అహనా.. పెళ్లంట’తో తన కామెడీ యాంగిల్ కూడా చూపించారు. జంధ్యాల, ఈవీవీ, ఆర్జీవి, ఎస్వీ కృష్ణారెడ్డి.. కోటలో కామెడీ యాంగిల్ ని పూర్తి స్థాయిలో ఆవిష్కరించారు.
‘ఆమె’లో ఆయన పిసినారి కామెడీతోపాటు విలనిజం, జంబలకిడిపంబ, మనీ, కనకమహాలక్ష్మీ రికార్డింగ్ డ్యాన్స్ ట్రూప్, చిత్రం భళారే విచిత్రం, అక్కడ అమ్మాయి ఇక్కడ అబ్బాయి.. ఎన్నో సినిమాల్లో కామెడీ చేసిన కోట ‘ఇడియట్’, ‘ఆడువారి మాటలకు అర్ధాలే వేరు’లో మధ్యతరగతి తండ్రి, ‘ఇంట్లో ఇల్లాలు వంటింట్లో ప్రియురాలు’లో తాతగానూ నటించారు. 2010.. ఆయన జీవితంలో చేదు జ్ఞాపకం. కుమారుడు బైక్ ప్రమాదంలో మరణించడం ఆయన్ను తీవ్ర మానసిక వేదనకు గురి చేసింది. జంట కామెడీ నటుడు బాబూమోహన్ కుమారుడు కూడా బైక్ ప్రమాదంలో మరణించడం యాధృచ్చికం. ‘తెలుగు నటులకు కొదవలేదు. తెలుగు నటులకు అవకాశాలివ్వాల’ని ఘంటాపధంగా చెప్పేవారు కోట. తెలుగు భాష ప్రాముఖ్యానికి ఆయనెంతో విలువనిచ్చేవారు. ఇంతటి విలక్షణ నటుడి మృతి తెలుగు పరిశ్రమ, ప్రేక్షకులకి తీరని లోటు.