జగన్ హిందువే.. డిక్లరేషన్ అడగడానికి చంద్రబాబు ఎవరు?: లక్ష్మీపార్వతి

ప్రస్తుతం రాష్ట్రం అత్యంత ప్రతికూల పరిస్థితుల్లో ఉంది. టీటీడీ డిక్లరేషన్ అంశం రాజకీయంగా హీటెక్కిస్తోంది. అధికార, విపక్ష నేతల మధ్య మాటల యుధ్దం జరుగుతోంది. దీనిపై తెలుగు అకాడమీ చైర్ పర్సన్ లక్ష్మీపార్వతి స్పందించారు. ‘ప్రతిపక్షం టీటీడీ డిక్లరేషన్ పై అనవసర రాద్ధాంతం చేస్తోంది. ముఖ్యమంత్రికి డిక్లరేషన్ వర్తిస్తుందా? సోనియా గాంధీ తిరుమల వచ్చినప్పుడు చంద్రబాబు డిక్లరేషన్ అడిగారా? చంద్రబాబు ఎప్పుడైనా డిక్లరేషన్ ఇచ్చారా? జగన్ గత ఏడాది కూడా స్వామికి పట్టు వస్త్రాలు సమర్పించారు. అప్పుడు లేని డిక్లరేషన్ ఇప్పుడు ఎందుకు?’ అని అన్నారు.

జగన్ గంగా నదిలో మూడు మునకలు మునిగి హిందువుగా మారారు. జగన్ తో స్వరూపానంద పూజలు చేయించారు. కొందరు స్వామీజీలు కాషాయం ముసుగులో రాజకీయాలు చేస్తున్నారు. ముస్లింగా ఉన్న కరీందాసు, బిబి నాంచారి ఎవరో స్వామిజీలకు తెలీదా? మత విద్వేషాలతో మళ్లీ మధ్య యుగంలోకి నెడతారా? ప్రస్తుతం విద్య, వైద్యం కావాలి.. మతం, కులం కాదు. డిక్లరేషన్‌పై బహిరంగ చర్చకు సిద్ధం. హిందూ సంప్రదాయం, పురాణలపై నాకు అవగాహన ఉంది. నేను ఖురాన్, బైబిల్, భగవద్గీత చదివాను’ అని లక్ష్మీపార్వతి అన్నారు.

‘1989-1994 చెన్నారెడ్డి హయాంలో పాతబస్తీలో కాంగ్రెస్ నేతలు మత ఘర్షణలు సృష్టించినట్టే ఇప్పడు ప్రతిపక్షం. కాంగ్రెస్ నుంచి వచ్చిన చంద్రబాబుకు ఆ కల్చర్ పోలేదు. చంద్రబాబు హిందూ సంప్రదాయం పాటించారా? తిరుమలలో అన్యమత ప్రచారం జరుగుతోందనేది అవాస్తవం. కాషాయం వేసిన మూర్ఖులు అంతా ఒక చోట చేరారు. హిందూ ఒక మతం కాదు.. ఒక ధర్మం. లోకేశ్ ని ముఖ్యమంత్రిని చేయడం కోసం భువనేశ్వరి క్షుద్ర పూజలు చేసింది. బీజేపీ వాటి గురించి అడగాలి. టీడీపీ నేతల్లానే బీజేపీ, జనసేన నేతలు మాట్లాడుతున్నారు’ అని మండిపడ్డారు.