ఓటిటి మూవీ రివ్యూ: లూట్ కేస్ – ఇది కామెడీ కాదు, చూసిన వారికి ట్రాజిడీ.!

కోవిడ్ – 19 వలన థియేటర్స్ మూత పడ్డాయి. అవి ఎప్పుడు తెరుచుకుంటాయి తెలియకపోవడం వలన పలు సినిమాలు ఓటిటి బాట పట్టాయి.. అదే జాబితాలో కునాల్ ఖేము నటించిన ‘లూట్ కేస్’ కూడా నేడు డైరెక్ట్ గా హాట్ స్టార్ లో రిలీజ్ అయ్యింది. మరి ఈ కామెడీ ఫిల్మ్ చూసిన వారిని నవ్వించిందా? లేక ఎందుకు చూసాంరా బాబు అనేలా చేసిందా అనేది ఇప్పుడు చూద్దాం..

కథ:

నందన్ కుమార్(కునాల్ ఖేము) ఓ చిన్న ఉద్యోగంతో కుటుంబాన్ని పోషించే ఓ మధ్యతరగతి వ్యక్తి. ఒకరోజు నైట్ డ్యూటీ చేసుకొని వస్తున్న అతనికి అనుకోకుండా ఓ సూట్ కేస్ దొరుకుతుంది. ఆ సూట్ కేస్ ఫుల్ గా 2000 రూపాయల నోట్ల కట్టలు ఉంటాయి. ఎవరు లేకపోవడంతో నందన్ దానిని తీసుకెళ్తాడు. ఇక అక్కడి నుంచి ఆ సూట్ కేస్ ని కాపాడడం కోసం అతను పడిన తిప్పలేంటి? అసలు ఆ సూట్ కేస్ లోకి అంత డబ్బులు ఎలా వచ్చింది? ఎవరిది? ఆ సూట్ కేస్ కి ఎమ్మెల్యే పాటిల్ కి ఉన్న సంబంధం ఏమిటి? ఫైనల్ గా నందన్ లైఫ్ ఎన్ని మలుపులు తిరిగింది? అనేదే కథ.

తెర మీద స్టార్స్..

హీరోగా నటించిన కునాల్ ఖేము మధ్యతరగతి వాడిగా మంచి నటనని కనబరిచాడు. సన్నివేశాల పరంగా కునాల్ చాలా మంచి హావ భావాలలు పలికించాడు. తన నటన వల్లే సినిమా చూస్తున్నప్పుడు ఎంతో కొంత రిలీఫ్ ఉంటుంది. రసిక దుగల్ ఉన్నంతలో బాగా చేసింది. ముఖ్య పాత్రల్లో కనిపించిన గజరాజ్ రావు, విజయ్ రాజ్, రణ్వీర్ షోరేయ్ లు తమ పాత్రలకు న్యాయం చేశారు.

తెర వెనుక టాలెంట్..

లూట్ కేస్ ఓ కామెడీ కథ, అందులోనూ సినిమా ట్రైలర్ చూసినప్పుడే కథ ఏంటనేది అర్థమైపోయి ఉంటుంది. కావున ఈ సినిమాలో కథ బాగుందా? బాలేదా? అనే పాయింట్ చెప్పడం అనవసరం. ఇలాంటి సినిమాలు బాలీవుడ్ లో లెక్కలేనన్ని సార్లు వచ్చునంటాయి. ఇలాంటి కామెడీ సినిమాలకు కావాల్సింది, కథనం మరియు కడుపుబ్బా నవ్వించే కామెడీ సన్నివేశాలు.. అవి రెండూ ఈ సినిమాలో లేవు.. ట్రైలర్ చూసినప్పుడు ఏ మాటలకైతే నవ్వుకుంటారో అవే సన్నివేశాలకే నవ్వుతారు తప్ప మిగతా ఏ సీన్స్ కి నవ్వు రాదు. ఇది కామెడీ సినిమా కానీ చూసే వారికి ట్రాజిడీలా ఉంటుంది. కథనంలో ఎక్కడా ఆసక్తికరంగా అనిపించే ఒక్క అంశం కూడా లేదు. డైరెక్టర్ ఎక్కువగా సందర్భానుసారంగా వచ్చే కామెడీని పండించాలని అనుకున్నాడు. కానీ ఒక్క సన్నివేశం కూడా నవ్వు తెప్పించకపోవడంతో బోర్ కొట్టేస్తుంది.

కథ బ్యాక్ డ్రాప్ కి తగ్గట్టు సాను జాన్ వర్గీస్ కెమెరా వర్క్ బాగుంది. కంటెంట్ లేకపోవడం వలన మ్యూజిక్ డైరెక్టర్ కి కూడా పెద్ద పనిలేకుండా పోయింది. కనీసం ఎడిటర్ ఆనంద్ అయినా సినిమా లెంగ్త్ ని తగ్గించి ఉంటే ఆడియన్స్ ఆ అంశాన్ని అయినా హైలైట్ గా చెప్పుకునేవారు.

విజిల్ మోమెంట్స్:

– కునాల్ ఖేము నటన
– సినిమా మొత్తం మీద రెండు మూడు జోక్స్ కి నవ్వడం

బోరింగ్ మోమెంట్స్:

– తెలిసిన కథ
– పరమ బోరింగ్ కథనం
– దర్శకత్వం
– ఎడిటింగ్
– జీరో ఎంటర్టైన్మెంట్

విశ్లేషణ:

కంప్లీట్ కామెడీ ఎంటర్టైనర్ అంటూ వచ్చిన ‘లూట్ కేస్’ సినిమా మిమ్మల్ని నవ్వించకపోగా, మీ సహనాన్ని పరీక్షించి, చివరికి చిరాకు తెప్పించి ఇది కామెడీ కాదు చూసిన వారి పాలిట ట్రాజిడీగా మారుతుంది. 2 గంటల 12 నిమిషాల ఈ సినిమా చూడడం కంటే 3 నిమిషాల ట్రైలర్ చూడడం వలన మీరు ఎక్కువ ఎంజాయ్ చేయచ్చు. ఒకవేళ ఆ 3 నిమిషాల ట్రైలరే మీకు బోర్ కొడితే సినిమా ఏ రేంజ్ లో బోర్ కొడుతుందో మీ ఊహకే వదిలేస్తున్నాం..

చూడాలా? వద్దా?: చూడాలనిపిస్తే ట్రైలర్ చూడండి, కానీ సినిమా మాత్రం టచ్ చేయద్దు.!

తెలుగుబులెటిన్.కామ్ రేటింగ్ : 1.5/5