దడ పుట్టిస్తున్న 23

23.. ఈ సంఖ్య చూస్తేనే రాజకీయ పార్టీలు బెంబేలెత్తిపోయే పరిస్థితి కనిపిస్తుందేమో! ఇటీవల పరిణామాలు చూస్తే రాజకీయాలకు, 23 సంఖ్యకు ఏదో సంబంధం ఉందేమో అనిపించేలా ఉన్నాయి. గత ప్రభుత్వంలో తెలుగుదేశం పార్టీ అధికారంలో ఉన్నప్పుడు అప్పటి ప్రతిపక్ష వైఎస్సార్ సీపీకి చెందిన 23 మంది శాసనసభ్యులను తన పార్టీలో చేర్చుకుంది. ఇటీవల ఎన్నికల్లో టీడీపీ నుంచి 23 మంది శాసనసభ్యులు మాత్రమే గెలుపొందారు.

అలాగే వైఎస్సార్ సీపీ నుంచి ముగ్గురు ఎంపీలను టీడీపీ చేర్చుకోగా.. అదే సంఖ్యలో ఎంపీలను ఆ పార్టీ తాజా ఎన్నికల్లో గెలుచుకోగలిగింది. ఇదే విషయాన్ని ఏపీ సీఎం వైఎస్ జగన్ మోహన్ రెడ్డి పలుమార్లు ప్రముఖంగా ప్రస్తావించారు. తమ పార్టీ నుంచి 23 మంది తీసుకోవడం వల్లే ఈసారి టీడీపీకి కేవలం 23 మంది మాత్రమే మిగిలారని ఎద్దేవా చేశారు. దీంతో 23 సంఖ్య టీడీపీలో ఓ భయంకరమైన అనుభవంగా మిగిలిపోయింది.

తాజాగా కర్ణాటకలో కుమారస్వామి నేతృత్వంలోని కాంగ్రెస్-.జేడీఎస్ సంకీర్ణ సర్కారు కూలిపోయింది కూడా 23వ తేదీనే కావడం గమనార్హం. యాధృచ్చికమో, కాకతాళీయమో తెలియదు గానీ.. కుమారస్వామి సీఎంగా ప్రమాణ స్వీకారం చేసింది కూడా 23వ తేదే. 2018 మే 23న సీఎం పగ్గాలు చేపట్టిన ఆయన జూలై 23న పదవి నుంచి దిగిపోవాల్సి వచ్చింది. ఇక్కడ మరో అంశం కూడా ఉంది. కుమారస్వామి సర్కారుపై జూలై ఒకటో తేదీన మొదలైన తిరుగుబాటు రగడకు సరిగ్గా 23వ రోజున ముగింపు పడింది.

అంటే.. ఇక్కడ కూడా 23 వారికి కలిసి రాలేదన్నమాట. టీడీపీ అధినేత చంద్రబాబుతో మొదలైన 23 దురదృష్టం ఆయన మిత్రుడైన కుమారస్వామినీ వెంటాడిందంటూ సోషల్ మీడియాలో చర్చ జరుగుతోంది. ఒకవేళ కుమారస్వామికి ఈ 23 వ్యవహారం కాస్త ముందే తెలిసి ఉంటే విశ్వాస పరీక్షను ఒక రోజు ముందుగానే నిర్వహించి, ప్రభుత్వాన్ని కాపాడుకునేవారేమోనని సెటైర్లు పడుతున్నాయి. మొత్తమ్మీద రాజకీయ వర్గాలకు మాత్రం 23 కంటి మీద కునుకు లేకుండా చేస్తోంది.