పెద్దాయన.! ఏమీ అనలేం.! కానీ, ఆయన మాత్రం చాలా చాలా అనేస్తున్నారు. రోజులు మారాయ్.! కోట శ్రీనివాసరావుకీ ఆ విషయం తెలుసు. కాలంతోపాటు ఆయన కూడా మారారు.! అప్పటికీ ఇప్పటికీ చాలా తేడా. ఆయన ముందు తరానికీ, ఆయన తరానికీ చాలా తేడాలున్నాయ్. అలాగని, ఆయన్ని ఆయన ముందు తరం వాళ్ళు విమర్శించి వుంటే.!
రోజుకి రెండు కోట్ల రూపాయల రెమ్యునరేషన్ తీసుకుంటున్నట్లు మైక్ పట్టుకుని ప్రకటించడమేంటి.? అంటూ ప్రశ్నించేశారు సీనియర్ నటుడు కోట శ్రీనివాసరావు ఓ కార్యక్రమంలో.
సన్మానాల సమయంలో సన్మాన గ్రహీతలు నాలుగు మంచి మాటలు చెప్పడం ఆనవాయితీ. మంచి మాటలైతే ఫర్లేదు, అలాంటి వేదికల్ని ఎవరి మీదనో విమర్శలు చేయడానికి వాడుకుంటేనే అభ్యంతరకరం. కోట శ్రీనివాసరావు ఎందుకీ వెకిలి వ్యాఖ్యలు చేసినట్లు.?
వృద్ధాప్యం వల్ల వచ్చిన చాదస్తంతో అనుకోవాలా.? లేదంటే, మనసులో ఏదో పెట్టుకుని పవన్ కళ్యాణ్ మీద కోట శ్రీనివాసరావు సెటైర్లు వేశారనుకోవాలా.?
తన మీద పదే పదే ‘ప్యాకేజీ’ అంటూ రాజకీయ ప్రత్యర్థులు చేస్తోన్న ఆరోపణల నేపథ్యంలో, ‘రోజుకి రెండు కోట్ల రూపాయల రెమ్యునరేషన్ తీసుకుంటున్నాను.. అన్ని సినిమాలకీ అలా కుదరదు..’ అని పవన్ కళ్యాణ్ స్వయంగా చెప్పారు.
పవన్ కళ్యాణ్ సంపాదన.. అందరికీ తెలిసిన విషయమే. ఆయన కడుతున్న పన్నులే అందుకు నిదర్శనం. రాజకీయాల్లో పారదర్శంగా ఎలా వుండాలో ఆయన ఓ రోల్ మోడల్గా చూపిస్తున్నారంతా. దీన్ని కోట శ్రీనివాసరావు లాంటి సీనియర్లు అభినందించాలి, ఆహ్వానించాలి చేతనైతే.
చేతకానప్పుడు, ఆ విషయం జోలికి కోట వెళ్ళకుండా వుండి వుంటే బావుండేది. స్వర్గీయ ఎన్టీయార్ రాజకీయాల్లోకి వచ్చాక, ఆయన్ని ఎవరూ ‘ప్యాకేజీ స్టార్’ అని విమర్శించలేదు. అప్పటి రాజకీయాలు అలాంటివి. ఆయన్ని ‘కమ్మ’ నాయకుడనీ ఎవరూ అనలేదు. అప్పుడు సంస్కారవంతులున్నారు రాజకీయాల్లో.
కానీ, ఇప్పుడు కుసంస్కారులున్నారు.. కులపిచ్చిగాళ్ళున్నారు. బట్ట కాల్చి మొహాన వేసే సంస్కార హీనులున్నారు. వాళ్ళందరికీ సమాధానం చెప్పినా, చెప్పకపోయినా.. తనను నమ్ముతున్నవారి ముందు స్వచ్ఛంగా నిలబడాలంటే, తప్పదు.. వాస్తవాల్ని చెప్పాల్సిందే. పవన్ కళ్యాణ్ వాస్తవాలు చెబుతోంటే, కోటకి ఎందుకు కడుపు మంట.? అసలు అది కోట శ్రీనివాసరావుకి సంబంధమే లేని వ్యవహారం కదా.?