తూర్పుగోదారి జిల్లాలో ‘అగ్గి’.! అప్పుడూ, ఇప్పుడూ అదే రాజకీయం.!

ఉమ్మడి తూర్పుగోదావరి జిల్లా చాలా చాలా ప్రత్యేకమైనది. ప్రకృతి అందాలకు నెలవు. గౌరవ మర్యాదలకు కేరాఫ్ అడ్రస్. ప్రశాంతమైన జిల్లా.. రాజకీయ చైతన్యం ఎక్కువ. వ్యాపార కార్యకలాపాలకూ కేరాఫ్ అడ్రస్. అలాంటి ఉమ్మడి తూర్పుగోదావరి జిల్లాపై ఎప్పుడూ ‘రాజకీయ కత్తి’ వేలాడుతూనే వుంటుంది.

టీడీపీ అధినేత నారా చంద్రబాబునాయుడు ముఖ్యమంత్రిగా వున్న సమయంలో, తుని రైలు దహనం ఘటన చోటు చేసుకుంది. అప్పట్లో కాపు ఉద్యమం సెగ రైలుకి అంటుకుందనే ప్రచారం జరిగింది. కానీ, నిజానికి అసలు సెగ అది కాదు. రాజకీయ సెగ రైలుని తగలబెట్టింది.

‘టీడీపీనే ఆ రైలుని తగలబెట్టింది..’ అని అప్పటి ప్రతిపక్షం వైఎస్సార్ కాంగ్రెస్ పార్టీ ఆరోపించింది. ‘కాదు కాదు, వైసీపీనే ఈ దుర్మార్గానికి ఒడిగట్టింది..’ అంటూ అప్పటి అధికార పక్షం టీడీపీ ఎదురుదాడికి దిగింది. ఇంతకీ, రైలు తగలబడటానికి తెరవెనుకాల రాజకీయ మంత్రాంగం నడిపిందెవరన్నది మాత్రం ఇప్పటికీ తేలలేదు.

ఆనాటి ఆ కాపు ఉద్యమం అనూహ్యంగా ఆ తర్వాత చల్లారిపోయింది. కాపు యువత లాఠీ దెబ్బల్ని తిన్నారుగానీ, ఆ ఉద్యమం విజయ తీరాలకు చేరలేకపోయింది. ఇప్పుడు మళ్ళీ అదే తూర్పుగోదావరి జిల్లా నుంచి వేరుపడ్డ కోనసీమ జిల్లాలో అగ్గి రాజుకుంది.

మంత్రి విశ్వరూప్, అదికార పార్టీకి చెందిన ఎమ్మెల్యే సతీష్ ఇళ్ళు నిరసనకారుల మంటల్లో తగలబడిపోయాయి. కోనసీమ ప్రాంతాన్ని జిల్లాగా ఏర్పాటు చేసిన వైఎస్ జగన్ ప్రభుత్వం, ఆ జిల్లా పేరుని కొనసీమగా వుంచకుండా, అంబేద్కర్ పేరు పెట్టడమేంటన్నది నిరసనకారుల ఆందోళనకు కారణం.

రాష్ట్రానికి ప్రత్యేక హోదా రాలేదని ఎక్కడా ఇలాంటి ఘటనలు జరగలేదు. రాజధాని లేదనే కోణంలోనూ ఇంత తీవ్రస్థాయిలో ఆందోళనలు జరగలేదు. కేవలం జిల్లా పేరు విషయంలో ఇంత రచ్చ జరగడమా.? అసలు కారణం అది కాదు. తెరవెనుకాల ఏదో పెద్ద కథ వుంది. తూర్పుగోదావరి జిల్లాలోనే రెండు ఘటనలు.. తీవ్రమైన ఘటనలు ఒకటి చంద్రబాబు హయాంలో ఒకటి వైఎస్ జగన్ హయాంలో జరిగాయంటే.. కాస్త లోతైన చర్చే జరగాలి ఈ ఘటనలపై.