ఎక్కడ నెగ్గాలో కాదు.. ఎక్కడ తగ్గాలో కూడా కేజ్రీకి తెలుసు

ఎన్నికల సందర్భంగా రాజకీయ ప్రత్యర్థులపై ఎలా విరుచుకుపడినా.. వారిపై తీవ్ర విమర్శలు చేసినా.. ఎన్నికలు ముగిసిన తర్వాత అవన్నీ పక్కన పెట్టి ప్రజా సంక్షేమం కోసమే పాటుపడాలి. ఈ విషయంలో అవసరమైతే రాజకీయ ప్రత్యర్థులను సైతం కలుపుకొని పోవాలి. అదే ప్రజాస్వామ్యానికి అసలు సిసలు నిర్వచనం. కానీ దీనిని అనుసరించే నాయకులు చాలా అరుదుగా ఉంటారు.

ఇలాంటివారిలో ఆమ్ ఆద్మీ పార్టీ అధినేత, ఢిల్లీ సీఎం అరవింద్ కేజ్రీవాల్ ముందు వరుసలో ఉన్నారు. ఢిల్లీ ఎన్నికల్లో వరుసగా మూడోసారి ఘన విజయం సాధించిన కేజ్రీ.. ఆదివారం సీఎంగా ప్రమాణ స్వీకారం చేశారు. ఈ సందర్భంగా ఆయన మాట్లాడుతూ.. ప్రధాని మోదీకి స్నేహహస్తం అందించారు. ఢిల్లీలో పాలన సజావుగా సాగేందుకు కేంద్రంతో కలిసి పని చేయాలనుకుంటున్నామని, ఇందుకు మోదీ ఆశీస్సులు కావాలని పేర్కొన్నారు.

ఎన్నికలు ముగిసినందున రాజకీయాలతో పనిలేదని, ఎన్నికల్లో తనను విమర్శించినవారందరినీ క్షమించేశానని, ఇక సంక్షేమంపై దృష్టి పెడతానని పేర్కొన్నారు. నిజానికి ఎన్నికల ప్రచారంలో కేజ్రీవాల్ పై బీజేపీ తీవ్ర విమర్శలు చేసింది. ఆయన్ను ఉగ్రవాదితో పోల్చింది. కానీ కేజ్రీవాల్ మాత్రం తన సంక్షేమ పథకాలనే నమ్ముకుని హ్యాట్రిక్ కొట్టారు. 70 సీట్లలో ఏకంగా 62 స్థానాలు కొల్లగొట్టి అధికారాన్ని నిలబెట్టుకున్నారు. బీజేపీ 8 స్థానాలతో సరిపెట్టుకోగా, కాంగ్రెస్ ఖాతా తెరవలేదు.

ఈ నేపథ్యంలో ఎన్నికలు ముగిసి, ఫలితాలు వెలువడిన తర్వాత కేజ్రవాల్ ను అభినందిస్తూ ప్రధాని మోదీ ట్వీట్ చేశారు. తాజాగా పాలన సజావుగా సాగేందుకు మోదీ ఆశీస్సులు కోరుతూ కేజ్రీ చేసిన వ్యాఖ్యలు చర్చనీయాంశంగా మారాయి. ఢిల్లీకి సీఎంగా ఉన్నప్పటికీ, ఇతర రాష్ట్రాల సీఎంలకు ఉన్నన్ని అధికారాలు కేజ్రీకి ఉండవు. అక్కడి పలు అంశాలు కేంద్రం కనుసన్నల్లోనే ఉంటాయి.

మరోవైపు లోక్ సభ ఎన్నికలకు ఇంకా నాలుగేళ్ల నాలుగు నెలల సమయం ఉంది. ఈ సమయంలో ఎలాంటి రాజకీయాలూ అవసరం లేదు. అందుకే పాలన సక్రమంగా సాగేందుకు కేంద్ర ప్రభుత్వానికి కేజ్రీ స్నేహహస్తం అందించినట్టు చెబుతున్నారు. ఇక్కడ కూడా ఆయన హూందాతనం ప్రస్పుటమవుతోందని, ఎక్కడ నెగ్గాలో కాదు.. ఎక్కడ తగ్గాలో కూడా కేజ్రీకి తెలుసని వ్యాఖ్యానిస్తున్నారు.