ప్రక్షాళన దిశగా నడుం బిగించిన కేసీఆర్.?

ఈటెల రాజేందర్ మాత్రమేనా.? మంత్రి వర్గం నుంచి ఇంకెవరైనా ఔట్ అవబోతున్నారా.? తెలంగాణ ముఖ్యమంత్రి కల్వకుంట్ల చంద్రశేఖర్ రావు మనసులో ఏముంది.? ఆయన, ప్రక్షాళన దిశగా చర్యలు షురూ చేసేవారా.? అవి ఈటెల రాజేందర్ తొలగింపుతోనే మొదలయ్యాయా.? ఇలా రకరకాల ప్రశ్నలు గులాబీ శ్రేణుల్లో వ్యక్తమవుతున్నాయి. ఈటెల రాజేందర్ తొలగింపు అనేది చిన్న వ్యవహారమేననీ, ముందు ముందు చాలా పెద్ద మార్పులు చూడబోతున్నామనీ గులాబీ శ్రేణుల్లో చర్చ జరుగుతోందట గత కొద్ది రోజులుగా. ప్రధానంగా ధరణి పోర్టల్ తెరపైకొచ్చాక, చాలామంది నాయకుల్లో గుబులు మొదలయ్యింది.

ఈ క్రమంలోనే కొందరు తమ ఆర్థిక మూలాలు దెబ్బ తింటాయన్న కోణంలో ఆందోళన చెందడం మొదలెట్టారట. తాజాగా దేవరయాంజల్ భూముల వ్యవహారం తెరపైకి రావడంతో, మరింతగా గులాబీ శ్రేణుల్లో ప్రకంపనలు కనిపిస్తున్నాయి. అతి త్వరలో తెలంగాణ ముఖ్యమంత్రి కల్వకుంట్ల చంద్రశేఖర్ రావు, తన మంత్రి వర్గాన్ని పునర్ వ్యవస్థీకరించబోతున్నారనీ, ఈ క్రమంలో పలువురు మంత్రులు తమ పదవుల్ని కోల్పోవచ్చనీ అంటున్నారు. కొన్నాళ్ళ క్రితం తెలంగాణ రాష్ట్ర సమితి వర్కింగ్ ప్రెసిడెంట్, మంత్రి కల్వకుంట్ల తారకరామరావు పేరుని ముఖ్యమంత్రి పదవి కోసం ప్రతిపాదించిన నేతల్లోనూ కొందరు తమ పదవుల్ని కోల్పోయే అవకాశం వుందట. అలా కేటీఆర్ మీద లేని పోని ప్రేమ కురిపించినవారికి షాకిస్తూ, ‘అసలు ఇలాంటి వ్యాఖ్యలు ఎలా చేస్తారు.? ఇంతటి బాధ్యతారాహిత్యమా.?’ అంటూ కేసీఆర్ అప్పట్లోనే అసహనం వ్యక్తం చేశారు.

కేటీఆర్ విషయంలో భజన చేసిన నాయకుల లిస్ట్ తీస్తే, అందులో ఈటెల పేరు కూడా కన్పిస్తుంది. సో, వేటు ఆ కోణంలోనే ఈటెల మీద పడిందా.? లిస్టులో తర్వాత వున్నదెవరు.? అన్న చర్చ జరగడం సహజమే మరి. కరోనా నుంచి కోలుకుని తాజాగా ప్రగతి భవన్ చేరుకున్న కేసీఆర్, అటు పాలన విషయంలో.. ఇటు పార్టీ విషయంలో ఎలాంటి కీలక నిర్ణయాలు తీసుకుంటారో వేచి చూడాల్సిందే.