ఐ వన్నా ఫాలో ఫాలో ఫాలో ఫాలో యూ..

పలు అంశాల్లో తెలుగు రాష్ట్రాల ముఖ్యమంత్రులు కలిసి సాగుతున్న సంగతి తెలిసిందే. ముఖ్యంగా ఏపీలో తొలిసారిగా జగన్, తెలంగాణలో రెండోసారి కేసీఆర్ అధికారంలోకి వచ్చిన తర్వాత తెలుగు రాష్ట్రాల మధ్య మంచి వాతావరణం నెలకొంది. ఎన్నికల ముందు నుంచే పలు విషయాల్లో జగన్ కు కేసీఆర్ పలు సలహాలు, సూచనలు చేశారని.. జగన్ సైతం కేసీఆర్ చెప్పిన విషయాలు వినేవారని సమాచారం.

అనంతరం జగన్ ప్రమాణ స్వీకార కార్యక్రమానికి కేసీఆర్ వెళ్లడం.. తెలంగాణ ప్రభుత్వం ప్రతిష్టాత్మకంగా చేపట్టిన కాళేశ్వరం ప్రాజెక్టు ప్రారంభోత్సవానికి జగన్ హాజరు కావడం.. ఇరువురు పలు సందర్భాల్లో భేటీ కావడం జరిగాయి. ఇక చాలా విషయాల్లో కేసీఆర్ బాటలోనే జగన్ సాగుతున్నారు. కరోనా వైరస్ విజృంభిస్తున్న తరుణంలో దానికి పారాసిటమాల్ చాలంటూ అసెంబ్లీ వేదికగా కేసీఆర్ చెప్పగా.. జగన్ సైతం కరోనాను ఎదుర్కొనేందుకు పారాసిటమాల్, బ్లీచింగ్ పౌడర్ సరిపోతుందని చెప్పి విమర్శలపాలయ్యారు.

కరోనా నేపథ్యంలో రాష్ట్రంలోని పేదలకు ఉచితంగా రేషన్, రూ.1500 నగదు ఇవ్వాలని కేసీఆర్ నిర్ణయించగా.. జగన్ కూడా ఉచితంగా రేషన్, రూ.1000 నగదు ఇస్తామని ప్రకటించారు. ఇక కరోనా ఉధృతమవుతున్న తరుణంలో రాష్ట్ర ఆర్థిక పరిస్థితి బాగాలేకపోవడంతో ప్రజాప్రతినిధులు, ఉద్యోగుల జీతాల్లో కోత విధించాలని కేసీఆర్ నిర్ణయం తీసుకున్నారు. అప్పటివరకు అలాంటి ఆలోచన లేని జగన్ సైతం అదే బాటలో వెళ్లారు.

జీతాలు ఇవ్వడానికి ఒక రోజు ముందు ప్రజా ప్రతినిధుల జీతాలను పూర్తిగా, ఉద్యోగుల వేతనాలను 10 శాతం నుంచి 50 శాతం మేర తగ్గించి ఇవ్వనున్నట్టు ప్రకటించారు. తొలుత ఉద్యోగుల అందరి వేతనాల్లో కోత విధించాలని నిర్ణయించిన కేసీఆర్.. అంతలోనే మనసు మార్చుకుని వైద్య ఆరోగ్య, పోలీసు సిబ్బందికి మాత్రం పూర్తి వేతనాలు ఇవ్వాలని, అంతేకాకుండా నగదు ప్రోత్సాహకం చెల్లించాలని నిర్ణయం తీసుకున్నారు. ఆ మేరకు శుక్రవారం ఉత్తర్వులు కూడా వెలువడ్డాయి. దీంతో జగన్ కూడా అదే బాటలో వెళ్లాలని భావించారు.

వైద్య ఆరోగ్య, పోలీసు, శానిటేషన్ సిబ్బందికి పూర్తి వేతనాలు ఇవ్వనున్నట్టు శనివారం ప్రకటించారు. రాష్ట్ర ఆర్థిక పరిస్థితి బాగోలేకున్నా, మూడు కేటగిరీల సిబ్బంది వేతనాలు పూర్తిగా చెల్లించాలని నిర్ణయించినట్టు పేర్కొన్నారు. మొత్తానికి ఇలా ప్రతి విషయంలోనూ కేసీఆర్ నే జగన్ ఫాలో అవుతున్నారు.