మంచు విష్ణు డ్రీమ్ ప్రాజెక్ట్ గా వచ్చిన కన్నప్ప సినిమా థియేటర్లలో మంచి హిట్ టాక్ తెచ్చుకుంది. ఈ సందర్భంగా శనివారం మూవీ టీమ్ సక్సెస్ మీట్ నిర్వహించింది. ఈ సినిమాను అవా ఎంటర్టైన్మెంట్, 24 ఫ్రేమ్స్ ఫ్యాక్టరీ బ్యానర్ల మీద డా.ఎం.మోహన్ బాబు నిర్మించగా.. ముఖేష్ కుమార్ సింగ్ దర్శకత్వం వహించారు. అక్షయ్ కుమార్, మోహన్లాల్, ప్రభాస్ కీలక పాత్రలు చేశారు. అన్ని ఏరియాల్లో మంచి హిట్ టాక్ వచ్చిందని మూవీ టీమ్ చెబుతోంది.
ఈ సందర్భంగా మోహన్ బాబు మాట్లాడుతూ.. ‘ఈ సినిమా నా జీవితంలో చాలా గొప్పది. ఇది డబ్బు కోసం తీసింది కాదు. ఆ భగవంతుడి ఆశీస్సులతోనే దీనికి ఇంత గొప్ప విజయం దక్కింది. నేను నటుడిగా వచ్చి 50 ఏళ్లు అవుతోంది. ఆ నాటి నుంచి ఈనాటి వరకు నా అభిమానులే నాకు అండగా ఉన్నారు. ఇప్పుడు కన్నప్పను ఆదరించిన వారందరికీ రుణపడి ఉంటాను. ఇది ఏ ఒక్కరి సినిమా కాదు. ఇది అందరి మూవీ. అందరి ప్రోత్సాహం వల్లే సినిమా ఇంత పెద్ద హిట్ అయింది. వినయ్ లేకపోతే ఈ సినిమాకు ఇంత ఆదరణ వచ్చేది కాదు. అందరూ సినిమా కోసం కష్టపడ్డారు. వారందరికీ హృదయ పూర్వక అభినందనలు’ అని అన్నారు.
విష్ణు మంచు మాట్లాడుతూ ..‘సినిమా ఇండస్ట్రీలో నటించే వారందరికీ కనిపించే దేవుళ్లు అంటే ప్రేక్షకులే. వారి వల్లే మా సినిమా ఇంత పెద్ద విజయం సాధించింది. ఇది అంతా ఆ శివుడి లీల. ఇంత పెద్ద విజయం చేసిన ప్రేక్షకులకు మనస్ఫూర్తి థాంక్స్ చెబుతున్నాను అని చెప్పారు.
డైరెక్టర్ ముఖేష్ కుమార్ సింగ్ మాట్లాడుతూ.. ‘ఈ సినిమా కోసం మేం చాలా కష్టపడ్డాం. ముఖ్యంగా మంచు విష్ణు, మోహన్ బాబు పదేళ్లుగా దీని మీద పనిచేస్తున్నారు. వారి కష్టానికి ఇంత పెద్ద విజయం దక్కింది. సినిమా మీద అందరూ ప్రేమను కురిపిస్తున్నారు. ఇది ప్రతి ఒక్కరికీ నచ్చుతుంది. చాలా మంది విష్ చేస్తున్నారు. అందరికీ ధన్యవాదాలు’ అని చెప్పారు.
మైత్రి శశి మాట్లాడుతూ .. ‘ఇలాంటి సినిమాలు ఈ రోజుల్లో రావడం నిజంగా అద్భుతమే అని చెప్పుకోవాలి. ‘సలార్’, ‘పుష్ప’ లాంటి సినిమాల తర్వాత ‘కన్నప్ప’కి కల్వకుర్తి లాంటి ఓ మారుమూల ఊరిలో థియేటర్లు నిండాయి. ఇదంతా మీ టీమ్ పడ్డ కష్టమే. ఈ సినిమా అన్ని చోట్లా మంచి హిట్ టాక్ తెచ్చుకుంటోంది. క్లైమాక్స్ చూసి నాకు కన్నీళ్లు వచ్చాయి. విష్ణు గారు అద్భుతంగా నటించారు. ఇలాంటి సినిమాకు మాకు అందించిన మోహన్ బాబు గారికి ధన్యవాదాలు.
ఎగ్జిక్యూటివ్ ప్రొడ్యూసర్ వినయ్ మహేశ్వరి మాట్లాడుతూ.. ‘మేం ఊహించినట్టే మూవీ మంచి హిట్ అయింది. మేం ఆశించినదానికంటే పెద్ద రెస్పాన్స్ దక్కింది. అందరికీ ప్రత్యేక ధన్యవాదాలు. ఈ సినిమా కోసం మేం అంతా చాలా కష్టపడ్డాం. విష్ణు డ్రీమ్ ప్రాజెక్ట్ ఇది. అతినికి పెద్ద హిట్ కావాలని అందరం కోరుకున్నాం’ అని చెప్పారు.