సీఎం జగన్ చేసిన సాయం మరువలేనిది: కైకాల సత్యనారాయణ

తెలుగు సినిమా సీనియర్ నటుడు కైకాల సత్యనారాయణ రాష్ట్ర ముఖ్యమంత్రి వైఎస్ జగన్ కు కృతజ్ఞతలు తెలుపుతూ బహిరంగ లేఖ రాశారు. గతేడాది ఆయన అనారోగ్యానికి గురై ఆసుపత్రిలో చేరిన సంగతి తెలిసిందే. వ్యక్తిగతంగా కాల్ చేసి, ప్రభుత్వం నుంచి ఏదైనా సహాయం అందిస్తామని హామీ ఇవ్వడమే కాకుండా.. ఉన్నతాధికారులు వ్యక్తిగతంగా హాజరై.. అన్ని రకాల సాయం అందించినందుకు ధన్యవాదాలు తెలిపారు. సీఎం అందించిన సాయం తనకూ, తన కుటుంబానికి ఎంతో శక్తిని ఇచ్చిందని పేర్కొన్నారు.

ఈ సహాయం కళాకారులు,  వారి శ్రేయస్సు పట్ల సీఎంకు ఉన్న గౌరవాన్ని మరోసారి రుజువు చేసిందని.. రాష్ట్రం మంచి చేతుల్లో ఉందనే భరోసా ఇస్తోందని కైకాల లేఖలో పేర్కొన్నారు. ఈ సందర్భంగా సీఎంకు నూతన సంవత్సరం, సంక్రాంతి శుభాకాంక్షలు తెలియచేశారు. తాను సంతకం చేయలేకపోవడంతో, తన కుమారుడు కొడుకు ఈ కృతజ్ఞతా లేఖపై సంతకం చేశారని పేర్కొన్నారు. ఈ సందర్భంగా తన కుటుంబానికి అండగా నిలిచిన ప్రతి ఒక్కరికి కృతజ్ఞతలు తెలిపారు.