ఆంధ్రప్రదేశ్‌ రాజకీయాల్లో ఈ ‘కుక్కల’ గోలేంటి.?

రాజకీయాల్లో విలువలు ఎప్పుడో దిగజారిపోయాయి.. దిగజారిపోయిన ఆ విలువల వలువలూడ్చేయడానికి ఇంకా ఇంకా ప్రయత్నిస్తూనే వున్నారు నేటి తరం రాజకీయ నాయకులు. పదవుల కోసం నేతలు కక్కుర్తి పడటం కొత్తేమీ కానీ, ఆ కక్కుర్తి మరింత హీనమైన స్థాయికి దిగజారిపోతుండడం అత్యంత బాధాకరమైన విషయం. ఈ మధ్యనే ఓ టీడీపీ మహిళా నేత, తమ అధినేతను ఉద్దేశించి ‘మంచి కుక్క – చెడు కుక్క’ అంటూ ప్రస్తావించారు. అధినేతను వెనకేసుకొచ్చేందుకే అయినా, ఆమె చేసిన వ్యాఖ్యలు అందర్నీ విస్మయానికి గురిచేశాయి. టీడీపీ శ్రేణులు సైతం, ఆ వ్యాఖ్యల్ని జీర్ణించుకోలేకపోయాయి.

తాజాగా వైపీపీ నేత ఒకరు, జనసేన అధినేతపై అత్యంత జుగుప్సాకరమైన వ్యాఖ్యలు చేశారు. ‘మీకు పీకే అంటే పవన్‌ కళ్యాణ్‌ కావొచ్చు.. మాకు మాత్రం పీకే అంటే పిచ్చికుక్క..’ అంటూ నోరు పారేసుకున్నారాయన. ఆయనెవరో కాదు, జోగి రమేష్‌. మొన్నామధ్య తూర్పుగోదావరి జిల్లాకి చెందిన ఓ వైసీపీ నేత, పవన్‌ కళ్యాణ్‌పైనా.. చంద్రబాబుపైనా రాయడానికి వీల్లేని పదజాలం ఉపయోగించారు. నిజానికి, ఇలాంటి తిట్లు ఏ ఒక్కరికో సొంతం కాదు. కానీ, అలా తిట్టడం వల్ల ఏం ప్రయోజనం.? ఏ వ్యక్తి అయినా నోరు పారేసుకుంటే, అవతలి వ్యక్తి గౌరవం తగ్గిపోదు.. ఎవరైతే నోరు పారేసుకుంటారో, వారే తమ స్థాయిని దిగజార్చుకున్నవారవుతారు. అంతే మరి.!

ఇంటకెళ్ళి తన భార్య దగ్గరో, కుమార్తె దగ్గరో, ఇతర కుటుంబ సభ్యుల దగ్గరో ‘నేను భలేగా మాట్లాడేశాను కదా..’ అని చెప్పుకోగలరా.? దురదృష్టవశాత్తూ ఈ తరహా రాజకీయ నాయకుల నుంచి విజ్ఞత ఆశించలేం. ప్రత్యర్థుల్ని నోటొకిచ్చినట్లు తిడితే, బిస్కెట్లు.. అదేనండీ పదవులో, గుర్తింపో దక్కుతుందని భావిస్తారేమో.!

ఈ రోజు ఈ పార్టీలో వున్నారు.. అవతలి వ్యక్తిని తిడుతున్నారు సరే.. రేప్పొద్దున్న పార్టీ మారితేనో.! చూస్తున్నాం కదా, వల్లభనేని వంశీ గతంలో ఎలా మాట్లాడారో, ఇప్పుడు ఏం మాట్లాడుతున్నారో.! ఒక్కటి మాత్రం నిజం.. రాజకీయ నాయకులు తమ రాజకీయ విమర్శల కోసం ‘జంతువుల’ ప్రస్తావన తీసుకురాకపోతే మంచిది. ఎందుకంటే, ఆ జంతువులు కూడా సిగ్గుపడేలా తయారైంది ప్రస్తుతం ఆంధ్రప్రదేశ్‌లో రాజకీయం.