జిన్నా టవర్స్ పేరు మార్చితే ఎవరికి నష్టం.!

సరే, బీజేపీ రాజకీయ ఉద్దేశ్యాలు ఏంటన్నది కాస్సేపు పక్కన పెడదాం. పాకిస్తాన్ జాతి పిత అయిన మహమ్మద్ అలీ జిన్నా పేరు, భారతదేశంలోని ఆంధ్రప్రదేశ్ రాష్ట్రంలో.. గుంటూరులోని ఓ కూడలికి ఎందుకు వుండాలి.? అన్నది కాస్త ఆలోచించాల్సిన విషయమే.

కొన్నాళ్ళ క్రితం ‘కరాచీ బేకరీ’ విషయమై పెద్ద రచ్చే జరిగింది. ‘చైనా బజార్’ పేరు మారిపోయి, ‘ఇండియా బజార్’ అయిపోయింది. అలాంటప్పుడు, ‘జిన్నా సెంటర్’ కాస్తా, ‘అబ్దుల్ కలాం సెంటర్’గా మార్చితే, తప్పేమీ లేదు. నిజానికి, మారాల్సిందే కూడా.

అసలు, ఈ వివాదం ఎలా తెరపైకి వచ్చింది.? అంటే, బీజేపీ నేతలు కుట్రపూరితంగా మత విద్వేషాల్ని రెచ్చగొట్టేందుకే ఇలా చేస్తున్నారంటూ ఓ వింత వాదనను తెరపైకి తెచ్చారు కొందరు. ఏమో, బీజేపీకి కొన్ని రాజకీయ అవసరాలు వుండొచ్చు. రాజకీయంగా ఎదిగేందుకే, ఈ జిన్నా అంశాన్ని తెరపైకి తీసుకు వచ్చి వుండొచ్చు.

కానీ, దీనికి నేపథ్యం కూడా బలమైనదే వుంది. అదేంటంటే, పాకిస్తాన్ ప్రభుత్వం, ఇటీవల గుంటూరులోని జిన్నా సెంటర్ గురించి ప్రస్తావిస్తూ ఓ ట్వీటేసింది. అదే, కమలనాథులకి ఒళ్ళు మండేలా చేసింది. భారత ప్రధాని హోదాలో నరేంద్ర మోబీ, అధికారిక పర్యటనలో భాగంగా పాకిస్తాన్ వెళ్ళి.. పాకిస్తాన్ ప్రధానితో భేటీ అయి, ఆప్యాయగా మాట్లాడొచ్చు.. కానీ, అదే పాకిస్తాన్ విషయంలో ఇంకెవరైనా అలా వ్యవహరిస్తే.. దేశద్రోహులుగా ముద్ర వేయడం బీజేపీకి కొత్తేమీ కాదు.

ఏపీ బీజేపీ నేతలు కొందరు బరితెగించి మరీ, ‘మీరు జిన్నా విగ్రహాన్ని జిన్నా కూడలిలో పెడతారా.?’ అంటూ నిలదీసేస్తున్నారు. ఆంధ్రప్రదేశ్‌లోని అధికార పార్టీ ఎందుకు అంత పెద్ద రిస్క్ చేస్తుంది.? ఛాన్సే లేదు. ఈ వివాదం ఇప్పటితో చల్లారేలా లేదు. ఇంతకీ, జగన్ సర్కార్.. జిన్నా కూడలి పేరు మార్చుతుందా.? బీజేపీ, జిన్నా టవర్‌ని కూల్చేస్తుందా.? వేచి చూడాల్సిందే.