వైసీపీపై జనసేన మార్కు కౌంటర్ ఎటాక్.! బరాబర్ ఏకి పారేస్తాం.!

తగ్గేదే లేదంటోంది జనసేన.! ఔను, వైసీపీ విమర్శల నేపథ్యంలో జనసేన పార్టీ చూస్తూ కూర్చోదనే విషయాన్ని కుండబద్దలు గొట్టేస్తున్నారు జనసైనికులు. ‘మేమెవరికో దత్తపుత్రుడని మీరు అంటున్నారు. అలాంటి విమర్శలు ఆకపోతే, మేం మిమ్మల్ని సీబీఐ దత్త పుత్రుడు అనాల్సి వస్తుంది.. చర్లపల్లి జైలు షటిల్ టీమ్ అనాల్సి వస్తుంది..’ అని జనసేన అధినేత పవన్ కళ్యాణ్, వైఎస్సార్ కాంగ్రెస్ పార్టీ అదినేత వైఎస్ జగన్ మోహన్ రెడ్డికి కౌంటర్ ఎటాక్ ఇచ్చాక, జనసైనికులకు కూడా ఈ విషయమై స్పష్టమైన సంకేతాలు అందాయి.

ఇంకేముంది.? యుద్ధం మొదలైంది.! ‘బరాబర్ ఏకి పారేస్తాం.. ఇందులో ఇంకో మాటకు తావే లేదు..’ అంటున్నారు జనసైనికులు. ‘ఈ రాష్ట్రానికి పవన్ కళ్యాణ్ ఓ టూరిస్టు మాత్రమే’ అని తాజా మంత్రి గుడివాడ అమర్‌నాథ్ ట్వీటేస్తే, ‘ఒక టూరిస్టు రాష్ట్ర ప్రజల కోసం ఆలోచిస్తోంటే.. రాష్ట్రాన్ని పాలించినవాళ్ళు ఏం చేస్తున్నట్టు.?’ అంటూ కౌంటర్ ఎటాక్ జనసేన నుంచి షురూ అయ్యింది.

‘పవన్ మాట్లాడే ప్రతి మాటా టీడీపీ రాసిచ్చిన స్క్రిప్ట్’ అని వైసీపీ నాయకుడొకరు విమర్శిస్తే, ‘జగన్ మాట్లాడే ప్రతి మాటా సీబీఐ దత్త పుత్రుడికి సీబీఐ రాసిచ్చిన స్క్రిప్ట్’ అంటోంది జనసేన. అంతేనా, చంచల్‌గూడానో, చర్లపల్లినో.. ఆయా జైళ్ళలోని నేరస్తుల నుంచి వైసీపీ అధినేత స్ఫూర్తి పొందినట్టున్నారనే విమర్శలూ జనసైనికుల నుంచి సోషల్ మీడియాలో కనిపిస్తున్నాయి.

అంతే మరి, తమలపాకుతో నువ్వొకటిస్తే.. తలుపు చెక్కతో నేనొకటిస్తా.. అన్నట్టే వుంటుంది వ్యవహారం. పవన్ కళ్యాణ్ పెళ్ళిళ్ళ గురించి మాట్లాడుతున్న వైసీపీ నేతల వ్యక్తగత జీవితాల్నీ జనసైనికులు బజార్న పడేస్తున్నారు. అరగంట అంబోతు గురించి, గంట పూబంతి గురించీ… కొబ్బరి చిప్పల వెల్లుల్లిపాయ్ గురించీ.. జనసైనికులు వేస్తున్న సెటైర్లతో వైసీపీకి మైండ్ బ్లాంక్ అయిపోతోంది.

‘మేం మీ పాలనా వైఫల్యాలపై స్పందిస్తాం.. అది మా బాధ్యత.. మా వ్యక్తిగత జీవితాల్లోకి తొంగి చూడొద్దు..’ అని సున్నితంగా జనసేనాని వ్యాఖ్యానిస్తే, వైసీపీకి జనసేనాని అలుసైపోయారు. కానీ, ఇప్పుడు సీన్ మారిపోయింది. ‘నువ్వెంత.. అంటే నువ్వెంత..’ అనే స్థాయికి వ్యవహారం వెళ్ళింది. ఏకిపారేయడం జనసేన మొదలెడితే, వైసీపీ పరిస్థితి ఎలా వుంటుందో ఇప్పుడిప్పుడే అందరికీ అర్థమవుతోంది.