జగన్‌ సారూ.. ‘కోటి’ సరే, ఈ శతకోటి ప్రశ్నల సంగతేంటి.?

విశాఖ గ్యాస్‌ లీక్‌ ఎపిసోడ్‌కి సంబంధించి మృతుల కుటుంబాలకు కోటి రూపాయల చొప్పున ఎక్స్‌గ్రేషియా ప్రకటించారు ముఖ్యమంత్రి వైఎస్‌ జగన్‌ మోహన్‌రెడ్డి. ఇది నిజంగానే స్వాగతించాల్సిన విషయం. అయితే, ఇంతటి దుర్ఘటనకు కారణమైన ఎల్జీ పాలిమర్స్‌ సంస్థపై ముఖ్యమంత్రి ఎందుకు తీవ్రంగా స్పందించలేకపోయారు.? ‘ఎల్జీ పాలిమర్స్‌ అనేది మల్టీ నేషనల్‌ కంపెనీ. చాలా బాగా పనిచేసే కంపెనీ. అలారం ఎందుకు మోగలేదు? అన్నది నాకూ అనిపిస్తోంది..’ అంటూ చాలా సున్నితంగానే వైఎస్‌ జగన్‌ మోహన్‌రెడ్డి వ్యాఖ్యానించారు.

లాక్‌డౌన్‌ అమల్లో వున్నా, ప్రమాదకరమైన రసాయనాలు ఉపయోగించే ఫ్యాక్టరీల్లో మెయిన్‌టెనెన్స్‌ తప్పనిసరి. అలాంటప్పుడు, లాక్‌డౌన్‌ నేపథ్యంలోనే ‘రసాయనం’ నిల్వ వుండిపోవడం, వేడికి అది లీక్‌ అవడం జరిగిందంటూ యాజమాన్యం ప్రకటించడమేంటి.? ఇక్కడ యాజమాన్యం తప్పిదం సుస్పష్టం. దాన్ని ప్రభుత్వం ఎందుకు ‘కవర్‌’ చేయాలని చూస్తోందన్నదే ఎవరికీ అర్థం కావడంలేదు. ఇదిలా వుంటే, ‘కోటి’ ఎక్స్‌గ్రేషియాపైనా సందేహాలు వ్యక్తమవుతున్నాయి.

నిజానికి, ఆ కోటి రూపాయల మొత్తాన్నీ కంపెనీ నుంచే వసూలు చేయాలి. ఆ మాటకొస్తే, ప్రమాదకర రసాయనాలతో పరిశ్రమలు నడిపే సంస్థలు, ఒకవేళ అనుకోని ప్రమాదం జరిగితే.. భారీ స్థాయిలో ఎక్స్‌గ్రేషియా చెల్లించాల్సి వస్తుంది. ఇందుకోసం పెద్దయెత్తున ఇన్స్యూరెన్స్‌ సౌకర్యాన్నీ కలిగి వుంటారు. ఒక్కో మరణానికీ 5 కోట్ల వరకూ ఎక్స్‌గ్రేషియా ఇచ్చే స్థాయిలో ఇన్స్యూరెన్స్‌ వుంటుందని నిపుణులు చెబుతుండడం గమనార్హం.

మరోపక్క, ఇలాంటి ప్రమాదాలు జరిగినప్పుడు, ప్రభుత్వాలు సదరు కంపెనీల నుంచి భారీ స్థాయిలో నష్ట పరిహారాల్ని వసూలు చేయాల్సి వుంటుంది. కానీ, ఈ అంశాలపై ముఖ్యమంత్రి ఇప్పటిదాకా స్పందించకపోవడం ఆశ్చర్యకరమే. అత్యవసరం కాకపోయినా, ఎల్జీ పాలిమర్స్‌కి స్థానిక యంత్రాంగం లాక్‌డౌన్‌ నుంచి మినహాయింపు ఇచ్చిందా.? గత కొంతకాలంగా ఈ సంస్థపై ఫిర్యాదులు చేస్తున్నామని స్థానికులు చెబుతున్న మాట నిజమైతే, అధికారులు ఎందుకు స్పందించలేదు.? ఇలా చాలా ప్రశ్నలు దాగి వున్నాయి.

వాటికి సమాధానం చెప్పలేకనే, భారీ స్థాయిలో ఎక్స్‌గ్రేషియా ప్రకటించి ప్రభుత్వం చేతులు దులుపుకుందనే విమర్శలు వెల్లువెత్తుతుండడం గమనార్హం. ఇంతటి దుర్ఘటనను మించిన దారుణం ఏంటంటే, అధికార పార్టీ.. ఈ ఘటనతో పబ్లిసిటీ స్టంట్లు చేస్తుండడం. ఎన్ని కోట్లు ఖర్చు చేస్తే వస్తుంది.. ఇంతటి పబ్లిసిటీ.. అన్నట్లు అధికార పార్టీ నేతలు చెలరేగిపోతున్నారు. శవ రాజకీయాలకు పరాకాష్ట ఇది.