తెగేలాకా లాగితే తేడాలొస్తాయ్‌: నిమ్మగడ్డ ఉదంతంపై ఐవైఆర్‌.!

మాజీ చీఫ్‌ సెక్రెటరీ ఐవైఆర్‌ కృష్ణారావు, సోషల్‌ మీడియా వేదికగా వైఎస్‌ జగన్‌ ప్రభుత్వంపై ఆసక్తికరమైన వ్యాఖ్యలు చేశారు. రాష్ట్ర మాజీ ఎన్నికల కమిషనర్‌ నిమ్మగడ్డ రమేష్‌కుమార్‌ ఉదంతానికి సంబంధించి ఓ పత్రికలో వచ్చిన కథనంపై ఐవైఆర్‌ తనదైన శౖలిలో స్పందించారు సోషల్‌ మీడియా వేదికగా.

‘కొన్ని విషయాలు తెగేదాకా లాగితే ఫలితాలు ప్రతికూలం అవుతాయి. రాష్ట్ర ఎన్నికల సంఘం విషయంలో ఆంధ్రప్రదేశ్‌ రాష్ట్ర ప్రభుత్వం ఈ విధానాన్ని అనుసరిస్తున్నట్లుంది’ అని ఐవైఆర్‌ ట్వీట్‌ చేశారు. ‘హైకోర్టు తీర్పుని ఉల్లంఘించడమే.. ఈసీ సమగ్రత పట్ల అగౌరవం దురదృష్టకరం..’ అంటూ నిమ్మగడ్డ రమేష్‌కుమార్‌ చేసిన వ్యాఖ్యలకు సంబంధించిన కథనంపై ఐవైఆర్‌ స్పందించారు.

మరోపక్క, రాష్ట్ర అడ్వొకేట్‌ జనరల్‌ శ్రీరాం, ఇటీవల మీడియా ముందుకొచ్చి, హైకోర్టు ఇచ్చిన తీర్పుపై ప్రభుత్వ వెర్షన్‌ని విన్పించడం.. అది కాస్తా మళ్ళీ ప్రభుత్వంపై విమర్శలకు తావివ్వడం తెల్సిన విషయమే. ‘ఉన్నత స్థాయిలో ప్రభుత్వ పెద్దలు తీసుకున్న నిర్ణయం తేడా కొట్టేయడంతో.. ఇప్పుడు అడ్వొకేట్‌ జనరల్‌ని ముందుకు తెచ్చారు..’ అంటూ ఓ ఆంగ్ల పత్రికలో వచ్చిన కథనాన్ని మరో ట్వీట్‌లో ప్రస్తావించారు ఐవైఆర్‌.

ఇదిలా వుంటే, బీజేపీ రాష్ట్ర అధ్యక్షుడు కన్నా లక్ష్మినారాయణ సైతం, నిమ్మగడ్డ వ్యవహారంలో ప్రభుత్వ తీరుని తీవ్రంగా తప్పు పట్టారు. రాష్ట్ర ఎన్నిల కమిషనర్‌కి ‘కులం ఆపాదిస్తూ’ సాక్షాత్తూ ముఖ్యమంత్రి వ్యాఖ్యలు చేయడం దురదృష్టకరమని కన్నా లక్ష్మినారాయణ అన్నారు. 151 మంది ఎమ్మెల్యేలను ప్రజలు ఇస్తే, కనీసం స్థానిక ఎన్నికల్ని జగన్‌ ప్రభుత్వం సజావుగా నిర్వహించలేకపోయిందని కన్నా లక్ష్మినారాయణ ఎద్దేవా చేశారు.

‘టీడీపీ హయాంలో పింక్‌ డైమండ్‌ పోయిందని వైఎస్సార్సీపీ నానా యాగీ చేసింది.. డేటా చోరీ జరిగిందంటూ గగ్గోలు పెట్టింది.. సాక్షాత్తూ వైఎస్‌ జగన్‌ మీద హత్యాయత్నం జరిగితే, దానిపై అధికారంలోకి వచ్చాక సరైన విచారణలు, చర్యలు లేవు.. ఇవన్నీ చూస్తోంటే, అధికార పార్టీపై చాలా అనుమానాలొస్తున్నాయ్‌..’ అంటూ కన్నా విమర్శించారు. వైఎస్‌ జగన్‌ని విఫలమైన సీఎంగా అభివర్ణించిన కన్నా లక్ష్మినారాయణ, తక్షణం వైఎస్‌ జగన్‌ సీఎం పదవికి రాజీనామా చేయాలని డిమాండ్‌ చేయడం కొసమెరుపు.