సగటు భక్తుడి ఆవేదన: వెంకన్న జోలికి వెళ్ళొద్దు ప్లీజ్‌.!

ఎవరు ఔనన్నా ఎవరు కాదన్నా టీటీడీ పాలక మండలి అనగానే రాజకీయ నిరుద్యోగులకు పునరావాస కేంద్రంగా మారిపోయిందన్నది ఓపెన్‌ సీక్రెట్‌. ఇదే విమర్శ గతంలో వైఎస్‌ రాజశేఖర్‌రెడ్డి హయాంలో విన్నాం.. ఆ తర్వాత చంద్రబాబు హయాంలో విన్నాం.. ఇప్పుడు వైఎస్‌ జగన్‌ హయాంలో వింటున్నాం. అసలు వెంకటేశ్వరస్వామి దేవస్థానానికి పాలక మండలి ఏంటి.? అన్న వాదన భక్తుల్లో ఎప్పటినుంచో వుంది.

అసలు విషయంలోకి వచ్చేస్తే, మాజీ చీఫ్‌ సెక్రెటరీ ఐవైఆర్‌ కృష్ణారావు, చంద్రబాబు హయాంతో పోల్చితే, ఇప్పుడు టీటీడీ ప్రతిష్ట మరింత దిగజారిందంటూ ఘాటైన వ్యాఖ్యలు చేశారు. తిరుపతి వెంకటేశ్వరస్వామిని భక్తితో కొలిచే భక్తులు.. ఆ వెంకటేశ్వరస్వామి సన్నిధిలో లభించే లడ్డూని ప్రసాదంగా భావిస్తారనీ, దాన్ని తీసుకొచ్చి మార్కెట్‌లో స్వీట్లు అమ్మినట్లు అమ్మితే ఎలా.? అని ప్రశ్నించారు.

‘నేను సీఎస్‌గా వున్నప్పుడు పాలక మండలి విషయంలో కొన్ని అభ్యంతరాలు లేవనెత్తాను. చంద్రబాబు ప్రభుత్వం అవి పట్టించుకోలేదు. అంతకన్నా దారుణంగా తయారైందిప్పుడు టీటీడీ’ అంటూ ఆవేదన వ్యక్తం చేశారు ఐవైఆర్‌ కృష్ణారావు. టీటీడీ ఆస్తుల్ని అమ్మకానికి పెట్టడం అత్యంత బాధాకరమని ఐవైఆర్‌ అభిప్రాయపడ్డారు.

ఐవైఆర్‌ కృష్ణారావు మాత్రమే కాదు, చాలామంది వెంకటేశ్వరస్వామి ఆస్తుల అమ్మకంపై అభ్యంతరాలు వ్యక్తం చేస్తున్నారు. అయినా, భక్తులు.. దేవుడికి ఇచ్చిన భూముల్ని అమ్మడమేంటి.? ఆ మాత్రం ఇంగితం పాలకులకు లేకుండా పోయిందంటే దానర్థమేంటి.? ‘టీడీపీ హయాంలోనూ జరిగింది..’ అని వైసీపీ నేతలు చెబితే అది బుకాయింపు మాత్రమే అవుతుంది. టీడీపీని ఓటర్లు ఇంటికి పంపారు.. వైసీపీని కూడా అలాగే ఇంటికి పంపేయాలని ఆ పార్టీ నేతలు కోరుకుంటున్నారా.?

ఇదిలా వుంటే, సోషల్‌ మీడియా వేదికగా చాలా మీమ్స్ దర్శనమిస్తున్నాయి. ‘వెంకన్న జోలికి వెళ్ళినోళ్ళవరూ బాగుపడలేదు.. దయచేసి వెంకటేశ్వరస్వామి భూములతో వ్యాపారం చెయ్యొద్దు..’ అని హెచ్చరిస్తున్నారు కొందరు. సాక్షాత్తూ టీటీడీ పాలక మండలిలో సభ్యుడైన (ప్రత్యేక ఆహ్వానితుడు, రాజ్యసభ సభ్యుడు రాకేష్‌ సిన్హా సైతం వెంకటేశ్వరస్వామికి చెందిన భూముల వేలాన్ని తప్పుపడుతున్నారంటే, పాలక మండలి అలియాస్‌ ధర్మకర్తల మండలి.. ఎవరి ప్రయోజనాల కోసం ఈ ‘పాపానికి’ ఒడిగట్టిందనుకోవాలి.? అని విపక్షాలు నిలదీస్తున్నాయి.

మొత్తమ్మీద, వివాదం ముదిరి పాకాన పడుతున్న దరిమిలా, ఈ నెల 28న జరగనున్న ధర్మకర్తల మండలి సమావేశంపై తీవ్ర ఉత్కంఠ నెలకొంది. ఆ సమావేశంలో అయినా, సరైన నిర్ణయం తీసుకుని, టీటీడీ.. భూముల వేలంపై వెనుకడుగు వేస్తుందేమో వేచిచూడాలి.