జస్ట్ ఆస్కింగ్: ఉద్యోగులంతా అవినీతిపరులేనా.?

అవినీతి మన దేశంలో ఎప్పుడో వ్యవస్థీకృతమైపోయింది. కింది స్థాయి నుంచి పై స్థాయి వరకూ అవినీతి రాజ్యమేలుతోంది. ఎవరు ఔనన్నా ఎవరు కాదన్నా ఇదే వాస్తవం. అలాగని, అందరూ అవినీతిపరులేనా.? అలా ఆలోచించడం కూడా తప్పే. కొందరు అవినీతిపరుల కారణంగా, అందరికీ చెడ్డపేరు వస్తోందన్నది నిర్వివాదాంశం.

ఓ శాఖలో అవినీతి జరుగుతోందంటే, సంబంధిత శాఖా మంత్రికి ఆ అవినీతిలో వాటా లేకుండా వుంటుందా.? అన్న ప్రశ్న సహజంగానే తలెత్తుతుంటుంది. కాంట్రాక్టర్లకీ, రాజకీయాలకీ వున్న లింకులేంటో, ఆ లింకుల వల్ల ఇరు వర్గాలకూ జరుగుతున్న రాజకీయ లబ్ది ఏంటో అందరికీ తెలిసిన విషయమే.

రాజకీయమంటే సేవ.! కానీ, రాజకీయ నాయకులు ఆయా పదవుల్లో కూర్చునేందుకు తొక్కే అడ్డదారుల గురించి కొత్తగా చెప్పేదేముంది.? నామినేటెడ్ పోస్టుల కోసం లక్షలు, కోట్లు ఖర్చు చేసేది ఎందుకు.? దోచుకోవడానికే కదా.! ఎమ్మెల్యే సీటు, ఎంపీ సీటు మాత్రమే కాదు, వార్డు మెంబర్‌గా పోటీ చెయ్యడానికీ టిక్కెట్టు కోసమే లక్షల్లో ఖర్చు చేయాల్సిన రోజులివి.

ఇప్పుడిదంతా ఎందుకంటే, ఆంధ్రప్రదేశ్‌లోని అధికార వైసీపీ, ఉద్యోగుల మీద విషం చిమ్ముతోంది. ఉద్యోగులంతా అవినీతిపరులే.. అన్నట్టు అధికార వైసీపీ అనుకూల మీడియా అడ్డగోలు కథనాల్ని తెరపైకి తెస్తోంది. ఉద్యోగులు పీఆర్సీ విషయమై చేస్తున్న ఉద్యమానికి ‘అవినీతి’ మరక అంటించేస్తోంది బులుగు మీడియా.

వాలంటీర్ వ్యవస్థ వచ్చాక, ఉద్యోగులకు అవినీతి చేసే ఆస్కారం వుండడంలేదనీ, తద్వారా వారికి ప్రత్యామ్నాయ ఆదాయం తగ్గిందనీ, ఉద్యోగుల గొడవ జీతాలు పెంచడం గురించి కాదనీ, వాలంటీర్ వ్యవస్థను రద్దు చేయించడమే వారి లక్ష్యమనీ సోషల్ మీడియాలోనూ, వెబ్ మీడియాలోనూ.. వైసీపీ పెయిడ్ బృందం కథనాల్ని ప్రచారం చేస్తోంది.

‘కామన్ మేన్’ పేరుతో అధికార పార్టీ అనుకూల మీడియా, ప్రభుత్వ ఉద్యోగులపై చేయిస్తున్న వ్యాఖ్యలు.. మొత్తంగా ఉద్యోగులనే వ్యవస్థకే మకిలి అంటించేలా వుంది. ఉద్యోగులు లేకపోతే, ప్రభుత్వమెలా మనుగడ సాధిస్తుంది.? ఉద్యోగులకు మకిలి అంటించడమంటే, మొత్తం వ్యవస్థకు మకిలి అంటుకున్నట్టే కదా.?