ఇంటర్వ్యూ: ఇష్టం లేదు, కానీ మార్కెట్ దృష్ట్యా విష్ణుతో ఆ ప్లాప్ సినిమా చేశా – జి. నాగేశ్వరరెడ్డి

‘సీమశాస్త్రి’, ‘సీమ టపాకాయ్’, ‘దేనికైనా రెడీ’, ‘కరెంట్ తీగ’, ‘ఈడో రకం ఆడో రకం’ చిత్రాలతో ప్రేక్షకులను నవ్వించిన దర్శకుడు జి. నాగేశ్వరరెడ్డి. ఈమధ్య ఆయన తీసిన సినిమాలు సరిగా ఆడలేదు. అలాగని ఆయన ప్రతిభను తక్కువ అంచనా వేయలేం. ‘తెనాలి రామకృష్ణ బిఏబీఎల్’ ప్రచార చిత్రాలతో ప్రేక్షకుల్లో సినిమాపై అంచనాలు పెంచారు. ఈ సినిమా గురించి జి. నాగేశ్వరరెడ్డితో ఇంటర్వ్యూ…

వికటకవి తెనాలి రామకృష్ణకు, మీ రామకృష్ణకు పోలికలు ఉన్నాయా?

వికటకవిలో చమత్కారం, హాస్యం మా రామకృష్ణలోనూ ఉంటాయి. శ్రీకృష్ణదేవరాయల దగ్గర తెనాలి రామకృష్ణ ఎంత నవ్వించారో, శ్రీకృష్ణదేవరాయలు ఒక సమస్యలో ఉన్నప్పుడు అంతే సీరియస్ గా వ్యవహరించారు. రాజును కాపాడారు. మా రామకృష్ణ కూడా నవ్విస్తాడు. సెకండాఫ్ వచ్చేసరికి ఓ సమస్య విషయంలో అంతే సీరియస్ గా ఫైట్ చేస్తాడు.

అసలు, హీరో క్యారెక్టర్ ఏంటి?

సివిల్ కోర్టులో లాయర్. కాంప్రమైజ్ అయితే కోర్టుల వరకు వెళ్లవలసిన అవసరం లేదనేది అతడి అభిమతం. భాస్కరభట్లగారు రాసిన టైటిల్ సాంగులో, ఆయన అదే చెప్పారు. ఎటువంటి కేసులోనైనా కాంప్రమైజ్ చేయాలని చూసే తెనాలి రామకృష్ణ, ఓ కేసులో మాత్రం అసలు కాంప్రమైజ్ కాకూడదని బలంగా నిలబడతాడు. అదేంటి? అనేది సినిమా చూసి తెలుసుకోవాలి.

హన్సిక కూడా లాయర్ గా నటించినట్టున్నారు?

హన్సిక సరదా లాయర్. ఒక్క కేసు కూడా వాదించదు. కానీ, తానొక మహామేధావి అనుకునే ఇన్నోసెంట్ క్యారెక్టర్ చేసింది. తనకు కేసు వస్తే అసలు ఓడిపోనని ఫీలింగ్. ప్రేక్షకులను హన్సిక నవ్విస్తారు.

వరలక్ష్మీ శరత్ కుమార్ క్యారెక్టర్ ఏంటి?

ఇంపార్టెంట్ క్యారెక్టర్ చేసింది. ఆమె ఫెంటాస్టిక్ పెరఫార్మెర్. ముందు ఆ క్యారెక్టర్ కు ఆమెను తీసుకోవాలని అనుకున్నప్పుడు ‘మంచి ఆర్టిస్ట్ ను తీసుకొచ్చి వేస్ట్ చేశారు’ అంటారేమో అని ఆలోచించా. చివరకు, క్యారెక్టర్ చేసినందుకు ఆమె హ్యాపీగా ఫీలయ్యారు.

సినిమాలో సందేశాలు ఏమైనా ఇచ్చారా?

సందేశం కంటే ఈ సినిమా ప్రేక్షకులను ఎక్కువ నవ్విస్తుంది. ప్రజలు అందరూ పని ఒత్తిడిలో పడి నవ్వడం మర్చిపోతున్నారు. ఒకప్పుడు ఫ్రెండ్స్, ఫ్యామిలీతో కలిసి కూర్చున్నప్పుడు సరదాగా నవ్వుకునేవాళ్ళం. వర్క్ టెన్షన్స్, ప్రెజర్స్ లో పడి నవ్వట్లేదు. నాకు కొన్నిసార్లు టెన్షన్స్ ఉంటాయి. చివరకు, లాఫింగ్ క్లబ్స్ పెట్టుకుని అక్కడికి వెళ్లి నవ్వుతున్నాం. సినిమాకు ప్రేక్షకులను నవ్వించే శక్తి ఉంది. ఈ సినిమా అందరిని బాగా నవ్విస్తుంది.

సినిమాను తమిళంలో విడుదల చేస్తున్నారా?

సినిమా హిట్టయ్యితే రీమేక్ చేస్తాం. ప్లాప్ అయ్యితే డబ్బింగ్ చేస్తాం. సినిమాను తమిళ ప్రేక్షకుల ముందుకు తీసుకువెళ్లాలనే ఆలోచన ఉంది.

నవ్వించాలని మీరు చేసిన ‘ఆచారి అమెరికా యాత్ర’ సరిగా ఆడలేదు. డిజప్పాయింట్ అయ్యారా?

అవును. మనం చేసిన సినిమా సరిగా ఆడకపోతే డిజప్పాయింట్ అవుతాం. అయితే ముందు ఆ కథను చెయ్యడం నాకు ఇష్టం లేదు. కొన్ని మార్కెటింగ్ పరిస్థితుల వల్ల చెయ్యవలసి వచ్చింది. ప్రతిసారి బ్రాహ్మిణ్స్, వాళ్లపై జోకులు వెయ్యడం కరెక్ట్ కాదని అనిపించింది. కానీ, చెయ్యవలసి వచ్చింది. ఆ సినిమా నాకు, మంచు విష్ణుకు, నిర్మాతకు లాస్ మిగిల్చింది.

నెక్స్ట్ ప్రాజెక్ట్స్?

ఈ సినిమా విడుదల తర్వాత చెప్తా.