ఇన్‌సైడ్‌ స్టోరీ: కృష్ణా వరదలో అమరావతి మునిగిందా.?

ఎలాగైనా రాజధాని అమరావతిని చంపెయ్యాలన్నది వైసీపీ అనుకూల మీడియా కక్కుర్తి. అమరావతి కూడా ఆంధ్రప్రదేశ్‌లో భాగమే. రాజధాని అనే విషయాన్ని పక్కన పెడితే, అమరావతి మీద వైసీపీకి, వైసీపీ అనుకూల మీడియాకి అంత అక్కసు ఎందుకు.? అన్నది మాత్రం ఎవరికీ అర్థం కావడంలేదు.

అమరావతి అంటే అక్కడ ఓ కులం మాత్రమే నివసిస్తోందని అనుకుంటే పొరపాటే. అక్కడ అన్ని కులాలు, మతాలకు చెందిన ప్రజలున్నారు. కానీ, ఓ సామాజిక వర్గం పేరు చెప్పి అమరావతిని చంపెయ్యాలనే ప్రయత్నం జరుగుతోంది.

అమరావతిని గతంలో ముంపు ప్రాంతంగా ప్రకటించిన వైఎస్సార్సీపీ ముఖ్య నేతలు (వీరిలో మంత్రులు కూడా వున్నారు), అమరావతిని శాసన రాజధానిగా కొనసాగిస్తామంటున్నారు. ప్రతిపక్షంలో వున్నప్పుడు అమరావతిని రాజధానిగా అంగీకరించిన వైసీపీ, అధికారంలోకి వచ్చాక మాత్రం, ముంపు ప్రాంతమంటోంది.

ఇక, తాజాగా కృష్ణా నదికి వరద వచ్చింది. వైసీపీ హయాంలో ఇది రెండో వరద. మొదటి వరద సందర్భంలోనూ అమరావతిలోకి కృష్ణా నది నీళ్ళు వెళ్ళలేదు. ఇప్పుడూ అదే పరిస్థితి. అయితే, కొండవీటి వాగు నుంచి పెద్దయెత్తున నీరు.. కృష్ణా నదిలోకి ‘ఎత్తిపోతల పథకం’ ద్వారా వచ్చి చేరాయి. ఈ ఎత్తి పోతల పథకం లేకపోయి వుంటే, అమరావతి పరిధిలో కొన్ని గ్రామాల్లోని పంట పొలాలు మునిగిపోయేవని రైతులు చెబుతున్నారు. కేవలం ఎత్తిపోతల పథకం కారణంగానే తమకు ముంపు తగ్గిందన్నది రైతుల వాదన.

కానీ, వైసీపీ అనుకూల మీడియా మాత్రం.. కొండవీటి వాగు ఎత్తిపోతల పథకం వల్ల ఉపయోగమే లేదని తేల్చేసింది. రైతులకన్నా వైసీపీ అనుకూల మీడియాకే ఎక్కువ తెలుసా.? అన్నదిక్కడ కీలకమైన ప్రశ్న.

దశాబ్దాలుగా కొండవీటి వాగు నుంచి ముంపు ముప్పుని ఎదుర్కొంటున్నాయి అమరావతి పరిధిలోని కొన్ని గ్రామాలు. ఇప్పుడు ఆ ముప్పు లేకుండా పోయిందన్నది ఆ ప్రాంత ప్రజల వాదన. అమరావతిలోకి నీళ్ళొచ్చేశాయ్‌.. రాజధానికి అనుకూల ప్రాంతం కాదు.. అని వైసీపీ అనుకూల మీడియా ఇంకోసారి గట్టిగా ప్రచారానికి తెరలేపడం కోసమే కృష్ణా నదికి వరదొచ్చినట్లుంది పరిస్థితి.

రాజకీయం కోసం ఏమైనా మాట్లాడతారా.? ప్రజల ఆలోచనలతో అధికారంలో వున్నోళ్ళకి అస్సలు సంబంధం వుండదా.? మరీ ఇంత దిగజారుడు రాజకీయమా.? ఏదిఏమైనా, అమరావతి పేరుతో చంద్రబాబు చేసిన పబ్లిసిటీ స్టంట్స్‌లోనూ తప్పుంది.. ప్రస్తుతం వైసీపీ తీరులోనూ తప్పుంది.. రాష్ట్రానికి రెండు ప్రధాన రాజకీయ పార్టీలు అభివృద్ధి కంటకులుగా మారిపోవడం.. అత్యంత దురదృష్టకరం.