ఇన్‌సైడ్‌ స్టోరీ: మోడీ సర్కార్‌పై విశ్వాసం సన్నగిల్లుతోందా.?

కరోనా వైరస్‌తో ప్రపంచ విలవిల్లాడుతున్న వేళ, రాజకీయాలు చేయడం సరికాదన్న భావనతో చాలా రాజకీయ పార్టీలున్నాయి. అలా వుండాలి కూడా.! కానీ, ఎన్నాళ్ళిలా.? ప్రజల్ని ప్రభుత్వాలు పట్టించుకోనప్పుడు, గొంతు విప్పాల్సింది విపక్షాలే కదా.! ఎలాగూ మెజార్టీ మీడియా, ప్రధాని నరేంద్ర మోడీ మాటని కాదని, వాస్తవ పరిస్థితుల్ని వెల్లడించే పరిస్థితి లేదు.

ప్రస్తుత పరిస్థితుల్లో కేంద్ర, రాష్ట్ర ప్రభుత్వాలకి ఇతర రాజకీయ పార్టీలు, ప్రజలూ అండగా వుండాల్సిందే. కానీ, ఆ ప్రజలకు అండగా వుండేదెవరు.? మీరు త్యాగాలు చెయ్యండి.. మేం పబ్లిసిటీ స్టంట్లు చేస్తామంటే అది ఏమాత్రం సబబు కాదు. ఇక్కడ నరేంద్ర మోడీ ప్రభుత్వం పబ్లిసిటీ స్టంట్లు చేస్తోందా.? అంటే, అవుననే చర్చ ఇప్పుడు సోషల్‌ మీడియాలో గట్టిగా జరుగుతోంది. ఈ రోజు జాతిని ఉద్దేశించి నరేంద్ర మోడీ చేసిన ప్రకటనతో దేశ ప్రజలకు ‘ఊరట’ లభిస్తుందని అంతా అనుకున్నారు.

లాక్‌డౌన్‌ ఎత్తివేయడమే పెద్ద ఊరట అనుకుంటే అది పొరపాటే. లాక్‌డౌన్‌ కంటే పెద్ద సమస్య దేశ ఆర్థిక పరిస్థితి. సామాన్యుడి బతుకు పోరాటం ముందు ముందు ఏమవుతుందో ఎవరూ చెప్పలేకపోతున్నారు దేశ ఆర్థిక పరిస్థితి కారణంగా. పేదలకు అవి చేస్తున్నాం, లోన్లపై మారటోరియం ప్రకటించేశాం, రాష్ట్రాలకు నిధులు ఇచ్చేస్తున్నాం.. అని కేంద్రం చెబితే సరిపోదు. అంతకు మించి, జనానికి ప్రభుత్వం చాలా చాలా చేయాల్సి వుంది.

ఆ దిశగా ఒక్క స్పష్టమైన సంకేతం కూడా ప్రధాని నరేంద్ర మోడీ ఈ రోజు ఇవ్వలేకపోయారు. ‘మీ ఇంట్లోనే కూర్చోండి.. అదే మీకు, దేశానికి మంచిది’ అని చెబుతున్నారు. ఇప్పుడున్న పరిస్థితుల్లో ‘లాక్‌ డౌన్‌’ తప్ప ఇంకో మార్గం కరోనాని ఎదుర్కొనేందుకు లేదన్నది వాస్తవమే అయినా.. ఎక్కువ రోజులు ప్రజల్ని ఇంట్లో కూర్చోబెడితే.. ఆ తర్వాత తలెత్తే ఆకలి చావులకు ఎవరు బాధ్యత వహిస్తారు.? ముందు ముందు దేశంలో తలెత్తబోయే ఆర్థిక సంక్షోభానికి ఎవరు సమాధానం చెబుతారు.?