ఇన్‌సైడ్‌ స్టోరీ: వేసవిలో ఏపీ రాజకీయం వేడెక్కబోతోందట.!

‘కొత్త ప్రభుత్వం పనితీరుపై ఏడాది వరకూ పూర్తిస్థాయిలో ఓ అవగాహనకు రాలేం..’ అని ఇంకా కొందరు బీజేపీ నేతలు సన్నాయి నొక్కులు నొక్కుతున్నారు.. రాష్ర్‌టంలో వైఎస్‌ జగన్‌ ప్రభుత్వం గురించి కామెంట్‌ చేయడానికి. మరికొందరు మాత్రం, నేరుగానే వైఎస్‌ జగన్‌ ప్రభుత్వంపై విమర్శలు చేస్తున్న విషయం విదితమే. ఇదిలా వుంటే, అత్యంత విశ్వసనీయ వర్గాల సమాచారం ప్రకారం, ఈ వేసవి కాలంలోనే ఆంధ్రప్రదేశ్‌లో రాజకీయం విపరీతమైన వేడిని సంతరించుకోబోతోందట.

మే నెలలో అనేక రాజకీయ మార్పులు సంభవిస్తాయని ఢిల్లీ బీజేపీ వర్గాల నుంచి లీకులు అందుతున్నాయి. ‘పార్టీ శ్రేణులు అప్రమత్తంగా వుండాలి.. రాష్ట్ర వ్యాప్తంగా ఎక్కడికక్కడ బీజేపీ నేతలు తమ స్థాయిలో యాక్టివ్‌ అవ్వాల్సిందే..’ అనే సంకేతాలు ఇప్పటికే ఏపీ బీజేపీ నేతలకు ఢిల్లీ నుంచి సమాచారం అందినట్లు తెలుస్తోంది. ‘ఇప్పటిదాకా వైసీపీని భుజాన వేసుకున్నది చాలు..’ అంటూ వైసీపీ మద్దతుదారులుగా వున్న బీజేపీ నేతలకీ, ‘ఇకపై టీడీపీ పట్ల సానుకూలంగా వుంటే కుదరదు..’ అని టీడీపీ పట్ల సానుకూలంగా వున్న బీజేపీ నేతలకీ బీజేపీ అధిష్టానం నుంచి ఏకంగా శ్రీముఖాలు అందాయన్న ప్రచారం జరుగుతోంది.

ఆయా నేతలెవరన్నది ప్రత్యేకంగా చెప్పాల్సిన పనిలేదు. ‘జనసేనతో కలిసి ప్రయాణం చేయబోతున్నాం.. ఆ దిశగానే రెండు పార్టీలకు చెందిన నేతల రాజకీయ ప్రకటనలుండాలి.. జనసేన పార్టీతో అస్సలేమాత్రం పొలిటికల్‌ గ్యాప్‌ వుండకూడదు..’ అని ఓ బీజేపీ ముఖ్య నేతకు సున్నితమైన వార్నింగ్‌ కూడా ఢిల్లీ నుంచి అందిందట.

రానున్న రోజుల్లో బీజేపీ, ఏపీలో బలపడాల్సిందేననీ, అందుకు అవసరమైన రాజకీయ వ్యూహాలు సిద్ధం చేసుకుని ఢిల్లీకి రావాల్సిందిగా కన్నా లక్ష్మినారాయణ నేతృత్వంలోని బీజేపీ ముఖ్య నేతలకు అధిష్టానం ఆదేశించినట్లు తెలుస్తోంది. మార్చి నెలాఖరున ఏపీ బీజేపీ నేతలతోపాటు, జనసేన ముఖ్య నేతలతో బీజేపీ అధిష్టానం కీలకమైన భేటీ నిర్వహించనుందని సమాచారం. అయితే, వేసవిలో రాజకీయం వేడెక్కడానికి సంబంధించి.. ఎలాంటి అనూహ్య మార్పులుంటాయన్నదానిపై భిన్న వాదనలు విన్పిస్తున్నాయి.