లాక్ డౌన్ ఖరీదు 18 లక్షల కోట్లు!

భారత్ లో కరోనా మహమ్మారిని ఎదుర్కొనేందుకు మరో 19 రోజుల పాటు లాక్ డౌన్ పొడిగించిన సంగతి తెలిసిందే. దేశవ్యాప్తంగా మే 3వ తేదీ వరకు లాక్ డౌన్ కొనసాగుతుందని ప్రధాని మోదీ స్పష్టంచేశారు. ప్రజల ప్రాణాలను కాపాడటానికి ఇంతకుమించిన మార్గం లేదని పేర్కొన్నారు. ఆర్థికంగా చాలా మూల్యం చెల్లిస్తున్నప్పటికీ, ఈ నిర్ణయం తీసుకోక తప్పలేదని వివరించారు.

మరి లాక్ డౌన్ కారణంగా మనదేశానికి ఎంత నష్టమో తెలుసా? 40 రోజుల లాక్ డౌన్ వల్ల ఏకంగా రూ.18 లక్షల కోట్లు నష్టపోతున్నట్టు బ్రిటన్ కు చెందిన బార్క్ లేస్ అనే బ్రోకరేజీ సంస్థ వెల్లడించింది. తొలి మూడు వారాల లాక్ డౌన్ వల్ల దాదాపు తొమ్మిది లక్షల కోట్ల రూపాయలు నష్టం వాటిల్లగా.. తదుపరి 19 రోజుల లాక్ డౌన్ వల్ల మరో రూ.9 లక్షల కోట్ల మేరకు నష్టం కలిగే అవకాశం ఉందని అంచనా వేసింది.

ఇక వృద్ధి రేటు సైతం ఘోరంగా పడిపోనుందని తెలిపింది. 2020 కేలండర్ సంవత్సరంలో భారత వృద్ధిరేటు 2.5 శాతం ఉంటుందని అంచనా వేయగా.. ప్రస్తుత పరిస్థితుల్లో అది సున్నాకి పడిపోయిందని వివరించింది. ఇక 2020-21 ఆర్థిక సంవత్సరంలో వృద్ధిరేటు 3.5 శాతం నుంచి 0.8కి తగ్గిపోనుందని పేర్కొంది. ఇక భారత్ లోని ఉద్యోగుల పరిస్థితులపై అధ్యయనం చేసిన మరో సంస్థ ఆసక్తికరమైన వివరాలు వెల్లడించింది.

మనదేశంలో ప్రతి ఐదుగురిలో ఒకరికి ఉద్యోగం పోయే ప్రమాదం ఉందని పేర్కొంది. 20 శాతం మందికి ఉద్యోగం కోల్పోయే అవకాశం ఉండగా.. 16 శాతం మందికి వేతన కోత ఉంటుందని, 8 శాతం మందికి ఈ ఏడాది రావాల్సిన బోనస్ లేదా ఇంక్రిమెంట్ రాకపొవచ్చని వివరించింది. ఇప్పటికే దేశంలో 23.4 శాతం నిరుద్యోగిత ఉండగా.. కరోనా మహమ్మారి వల్ల అది మరింత పెరిగే అవకాశం ఉందని ఆందోళన వ్యక్తంచేసింది.