గుండె పగిలింది: వరల్డ్‌ కప్‌లో కుప్పకూలిన కోహ్లీ సేన!

ఒకదాని తర్వాత ఇంకోటి.. కళ్ళు చెదిరే విజయాల్ని వరల్డ్‌ కప్‌లో సాధిస్తోంటే, భారత క్రికెట్‌ అభిమానుల ఆనందం ఆకాశాన్నంటడం సహజమే. ఎక్కడా ఎలాంటి అనుమానమూ రాలేదు. ఇదే దూకుడు ప్రదర్శిస్తే కప్పు ఈసారి మనదే.. ఇప్పుడు కాకపోతే ఇంకెప్పుడు.? అన్న చర్చ అంతటా జరిగింది. అత్యద్భుతమైన బ్యాటింగ్‌ లైనప్‌ టీమిండియా సొంతం. మైదానంలో నిప్పులు చెరిగే బౌలర్లూ మెన్‌ ఇన్‌ బ్లూలో వున్నారు. న్యూజిలాండ్‌తో లీగ్‌ దశలో జరగాల్సిన మ్యాచ్‌ కాస్తా వర్షార్పణం కావడంతో చెరో పాయింట్‌ వచ్చింది. సెమీస్‌లో మళ్ళీ న్యూజిలాండ్‌తో తలపడే అవకాశం రావడంతో, టీమిండియా గెలుపుకి ఢోకా లేదని అంతా భావించారు.

ఇక్కడా వర్షం టీమిండియాకి షాకిచ్చింది. అయితేనేం, తక్కువ స్కోర్‌కే న్యూజిలాండ్‌ బ్యాట్స్‌మెన్‌ని కట్టడి చేయగలిగారు భారత బౌలర్లు. ఒక రోజు జరగాల్సిన మ్యాచ్‌ వర్షం కారణంగా రిజర్వ్‌ డేకి పొడిగించబడింది. 239 పరుగలకు న్యూజిలాండ్‌ ఆలౌట్‌ అయితే, భారత బ్యాటింగ్‌ లైనప్‌ స్ట్రాంగ్‌గా వుంది గనుక.. గట్టిగా 35 ఓవర్లలోనే టీమిండియా గెలిచేస్తుందని అభిమానులు భావించారు. బెట్టింగులు కూడా ఆ దిశగా జరిగాయి. కోట్లలో బెట్టింగులు జరగడం గమనార్హం. కానీ, అందరి అంచనాల్ని తల్లకిందులు చేసింది టీమిండియా. 1, 1 ,1.. ఇదీ టీమిండియా టాప్‌ ఆర్డర్‌ పరిస్థితి. ఓపెనర్లు లోకేష్‌ రాహుల్‌, రోహిత్‌ శర్మ మాత్రమే కాదు.. టీమిండియా కెప్టెన్‌ కోహ్లీ కూడా ఒక్క పరుగుకే పెవిలియన్‌ బాట పట్టాడంటే పరిస్థితి ఎంత ఛండాలంగా వుందో అర్థం చేసుకోవచ్చు.

పిచ్‌ కండిషన్‌ని అర్థం చేసుకోలేనంత అనుభవ హీనులా మన బ్యాట్స్‌మెన్‌ అని ఇప్పుడంతా చీదరించుకుంటున్నారంటే.. వారి ఆవేదనలో అర్థం వుంది. చివర్లో ధోనీ, జడేజా టీమిండియాని ఆదుకున్నారు. దాంతో గౌరవప్రదమైన స్కోర్‌ చేసినా, వరల్డ్‌ కప్‌ నుంచి నిష్క్రమించాల్సి వచ్చింది టీమిండియా. లీగ్‌ దశలో సమీకరణాలు కుదరక ఓడిపోతే అదో లెక్క. సెమీఫైనల్‌లో పోరాడి ఓడితే మరో లెక్క. కానీ, ఇంత దారుణంగానా.? న్యూజిలాండ్‌ బౌలింగ్‌ అద్భుతంగా వుందనడం కంటే, మనోళ్ళ చెత్త బ్యాటింగ్‌ కారణంగానే టీమిండియా ఓడిపోయిందనడం సబబు.

టాప్‌ త్రీ బ్యాట్స్‌మెన్‌ ఒక్కో పరుగు చేసి ఔట్‌ అయితే, రిషబ్‌ పంత్‌ కావొచ్చు, హార్దిక్ పాండ్య కావొచ్చు.. వాళ్ళయినా ఎందుకు నిలకడగా ఆడతారు.? కొద్ద గొప్పో వీళ్ళిద్దరూ ఫర్వాలేదన్పించారుగానీ, వారినీ క్షమించడానికి వీల్లేదిక్కడ. వచ్చిన అద్భుతమైన అవకాశాన్ని చేజార్చుకున్నారు ఈ ఇద్దరూ. ఏదిఏమైనా వరల్డ్‌ కప్‌లో టీమిండియా కథ ముగిసింది. అదీ అత్యంత దారుణంగా. గెలిస్తే నెత్తిన పెట్టుకోవడం, ఓడితే.. చీల్చి చెండాడడం మామూలే అయినా.. కోహ్లీ సేన, సెమీస్‌లో ప్రదర్శించిన ఆటతీరుకి ఎంతలా విమర్శించినా తక్కువే.