ఇండియా లాక్‌ డౌన్‌.. వేరే మార్గం లేదా.?

‘చేతులు జోడించి చెబుతున్నా.. ఈ రోజు అర్థరాత్రి నుంచి మీ ఇంటి చుట్టూ లక్ష్మణ రేఖ గీసుకోండి.. అందులోంచి బయటకు రావొద్దు..’ ఇదీ ప్రధాన మంత్రి నరేంద్ర మోడీ కొద్ది సేపటి క్రితం చేసిన సంచలన ప్రకటన. సుదీర్ఘంగా ఆయన దేశ ప్రజల్ని ఉద్దేశించి ప్రసంగించారు. ఆ ప్రసంగం నిండా, దేశ ప్రజల పట్ల ఆయనలోని బాధ్యత కన్పించింది. ‘ప్రధానిగా కాదు, మీ కుటుంబ సభ్యుడిగా చెబుతున్నాను..’ అంటూ మోడీ చేసిన వ్యాఖ్యలిప్పుడు ప్రతి ఒక్కరినీ ఆలోచింపజేస్తున్నాయి.

విదేశాల నుంచి వచ్చిన వ్యక్తులు, తగిన జాగ్రత్తలు పాటించకపోవడం వల్లే ఈ దుస్థితి దాపురించిందని ప్రధాని మోడీ చెప్పిన మాట ముమ్మాటికీ నిజం. పరిస్థితి తీవ్రతను గుర్తించి, ప్రభుత్వాలు అప్రమత్తం చేసినా.. విదేశాల నుంచి వచ్చినవారిలో కొందరు నిర్లక్ష్యం చేశారు. ఆ కొందరి నిర్లక్ష్యం ఇప్పుడు దేశానికి శాపంగా మారింది.

తొలుత మార్చి 31 వరకు అనుకున్న లాక్‌ డౌన్‌ కాస్తా, ఇప్పుడు ఏప్రిల్‌ 14 వరకూ పొడిగింపబడింది. ఏ రాష్ట్రానికి ఆ రాష్ట్రం లాక్‌డౌన్‌ ప్రకటించుకోవడం ఓ ఎత్తు, దేశమంతా లాక్‌ డౌన్‌ అవడం ఇంకో ఎత్తు. ఆయా రాష్ట్రాలు లాక్‌డౌన్‌ ప్రకటించినా, కొందరు ప్రజలు లెక్క చేయకపోవడం ఇంతటి కరిన నిర్ణయానికి మరో కారణంగా చెప్పుకోవచ్చు. పోలీసులు విజ్ఞప్తి చేస్తున్నా జనం రోడ్ల మీదకు రావడం మానలేదు. ఇప్పుడు పరిస్థితి తారుమారైపోయింది.

ఏప్రిల్‌ 14వ తేదీ వరకూ లాక్‌ డౌన్‌ అంటే ఆషామాషీ వ్యవహారం కాదు. కానీ, దీనికి మించిన వేరే దారి లేదు. అయితే, ఈ సమయంలో కేంద్ర ప్రభుత్వం ప్రజల పట్ల మరింత బాధ్యతతో మెలగాలి. రాష్ట్రాలకు తగు సూచనలు మాత్రమే కాదు, తగినన్ని నిధులు ఇవ్వాల్సిన బాధ్యత కూడా కేంద్రానిదే. ప్రభుత్వాల బాధ్యత కంటే ఇక్కడ ప్రజల బాధ్యత కీలకం. అందుకే, ప్రధాని నరేంద్ర మోడీ ‘చేతులు జోడించి’ వేడుకున్నారు. ఇది ప్రధాని ఆదేశంలా కాకుండా, మన ఇంటి పెద్ద మనకి చేసిన సూచనగా, సున్నితమైన హెచ్చరికగా మాత్రమే భావించాలి. సాటి మనిషిని కాపాడుకుందాం.. ఇంట్లోనే వుందాం.. కరోనాని దేశం నుంచి తరిమికొట్టేద్దాం.