ఇదేంది ఇళయరాజా?

మ్యూజిక్ మాస్ట్రో ఇళయరాజా ఇటీవల తరచుగా వివాదాల్లో చిక్కుకుంటున్నారు. తన సంగీతంతో కోట్లాది మంది అభిమానులను అలరించిన ఆయన.. వివాదాస్పద అంశాల్లో వార్తల్లోకి ఎక్కుతున్నారు. కొంతకాలం క్రితం తన ఆప్తుడు అయిన నేపధ్యగాయకుడు ఎస్పీ బాలసుబ్రమణ్యంపై రాయల్టీ విషయంలో తగాదా పడ్డారు. తన అనుమతి లేకుండా తన పాటలు పాడొద్దంటూ ఆయనకు నోటీసు కూడా పంపించారు. దీనిపై అప్పట్లోనే ఇళయరాజాపై విమర్శలు వ్యక్తమయ్యాయి.

తాజాగా ఎల్వీ ప్రసాద్ మనవడు సాయి ప్రసాద్ తనను బెదిరిస్తున్నారని, తన సంగీత పరికరాలు ధ్వంసం చేశారని పోలీసులకు ఫిర్యాదు చేశారు. ఇంతకీ విషయం ఏమిటంటే.. ప్రసాద్ స్టూడియో వ్యవస్థాపకుడు ఎల్వీ ప్రసాద్ తో ఇళయరాజాకు మంచి అనుబంధం ఉండేది. మ్యూజిక్ మ్యాస్ట్రోపై గౌరవంతో ఎల్వీ ప్రసాద్.. చెన్నై స్టూడియోలో ఓ రికార్డింగ్ థియేటర్ ను వినియోగించుకోవాలని ఇచ్చారు. 1977 నుంచి ఇళయరాజా ఆ థియేటర్ ను ఉపయోగించుకుంటున్నారు. ఎల్వీ ప్రసాద్ తదనందరం కూడా ఇళయరాజాకు ఎలాంటి సమస్యా రాలేదు. అయితే, ఆయన మనవడు సాయి ప్రసాద్ తో ఇళయరాజాకు విభేదాలు వచ్చాయి. ఈ నేపథ్యంలో రికార్డింగ్ థియేటర్ ఖాళీ చేయాలని ఇళయరాజాకు సూచించారు. దీనిపై మ్యాజిక్ మ్యాస్ట్రో ఎదరు తిరిగారు. అది తనదేనని, ఎల్వీ ప్రసాద్ తనకు కానుకగా ఇచ్చారని పేర్కొన్నారు.

అయితే, చట్టపరంగా ఇళయరాజాకు దానిపై ఎలాంటి హక్కులు లేవని చెబుతున్నారు. కేవలం ఆయనపై గౌరవంతో దానిని వినియోగించుకోవడానికి మాత్రమే ఇచ్చారన్నది సాయి ప్రసాద్ వెర్షన్. చట్టపరంగా హక్కులన్నీ ఎల్వీ ప్రసాద్ వారసులకే ఉన్నాయి. అయినప్పటికీ ఆ స్టూడియో తనదే అనే రీతిలో ఇళయరాజా కోర్టుకెక్కడంపై సర్వత్రా విస్మయం వ్యక్తమవుతోంది. తనంతట తానుగా స్టూడియో ఖాళీ చేసి హుందాతనం చాటుకోవాలని పలువురు అభిప్రాయపడుతున్నారు.

కానీ ఇళయరాజా అలా చేయకుండా తనపై సాయి ప్రసాద్ మనుషులు దాడి చేశారని, తన స్టూడియోలోని పరికరాలను ధ్వంసం చేశారని ఫిర్యాదు చేశారు. ఈ కేసు కోర్టులో కూడా నిలబడదని, అయినా ఇళయరాజా ఇలా ఎందుకు చేస్తున్నారో అర్థం కావడంలేదనే వ్యాఖ్యలు వినిపిస్తున్నాయి. కాగా, ఆయన చెన్నైలోనే తన సొంత ప్రైవేటు స్టూడియోకు ఇప్పటికే ఏర్పాట్లు చేసుకున్నారని, సెప్టెంబర్ లో దానిని ప్రారంభించే అవకాశం ఉందని కూడా వార్తలొచ్చాయి.