‘ఇచ్చట వాహనములు నిలుపరాదు’ మూవీ రివ్యూ

అల వైకుంఠపురములో చిత్రంలో మెరిసిన సుశాంత్ తిరిగి లీడ్ రోల్ లో నటించిన చిత్రం ఇచట వాహనములు నిలుపరాదు. టైటిల్ నుండి ఆసక్తికరంగా అనిపించిన ఈ చిత్రం ఎలా ఉందో ఇప్పుడు చూద్దాం.

కథ:

అరుణ్ (సుశాంత్) జీవితాన్ని చక్కగా ఎంజాయ్ చేస్తూ తిరిగే కుర్రాడు. ఒక ఆర్కిటెక్చర్ కంపెనీలో పనిచేసే అరుణ్, అక్కడే ఇంటర్న్ గా చేరిన మీనాక్షి (మీనాక్షి చౌదరి)ను చూసి ఇష్టపడతాడు. ఆమె అక్కడ లోకల్ రాజకీయ నాయకుడు అయిన నరసింహ యాదవ్ (వెంకట్) చెల్లెలు. ఒకరోజు యాదవ్ ఊర్లో లేని సమయంలో అరుణ్ ను తన ఇంటి దగ్గర కలుసుకోవడానికి ఒప్పుకుంటుంది మీనాక్షి. అయితే ఆమెను సర్ప్రైజ్ చేద్దామన్న ఉద్దేశంతో ఆమె ఇంటికి వెళ్లాను అనుకుని పక్కింటికి వెళ్ళిపోతాడు.

అయితే అక్కడ అప్పటికే ఒక క్రైమ్ జరుగుతుంది. అక్కడి సొసైటీ జనాలు క్రిమినల్ ఇంకా లోపలే ఉన్నాడు అనుకుని ఎగ్జిట్ పాయింట్స్ అన్నీ మూసేస్తారు. అయితే లోపల ఉండిపోయిన అరుణ్ ఏ క్రిమినల్ అని అందరూ అనుకుంటారు. ఈ నేపథ్యంలో అరుణ్ ఏం చేసాడు? తనే అమాయకుడు అని ఎలా ప్రూవ్ చేసుకున్నాడు? అసలు ఈ క్రైమ్ వెనకాల ఉన్నది ఎవరు?

తెర మీద స్టార్స్‌:

సుశాంత్ ఈ సాఫ్ట్ రోల్ ను సరిగా క్యారీ చేయడంలో విఫలమయ్యాడు. చాలా చోట్ల సుశాంత్ నటన నీరసంగా సాగింది. మీనాక్షి చూడటానికి బాగుంది కానీ ఆమె డబ్బింగ్ మేజర్ డ్రాబ్యాక్. వెంకట్ చాలా సంవత్సరాల తర్వాత కంబ్యాక్ ఇచ్చాడు కానీ ఇంకా బాగా చేసుండాల్సింది. వెన్నెల కిషోర్ ఉన్నంత సేపూ నవ్వించాడు.

పులిగా ప్రియదర్శికి ముఖ్యమైన పాత్ర పడింది కానీ ఆ రోల్ ను ఎందుకో సరిగా ఉపయోగించుకోలేదు. అభినవ్ బాగా చేసాడు. రవివర్మ నెగటివ్ రోల్ లో మెప్పించాడు. సునీల్ క్యామియో బాగుంది.

తెర వెనుక టాలెంట్:

కథగా ఎంచుకున్న పాయింట్ చాలా వీక్ గా ఉంది. పైగా దానిపై సరిగా వర్క్ చేయలేదు అనిపిస్తుంది. స్క్రీన్ ప్లే ఫ్లాట్ గా సాగింది. డైలాగ్స్ గురించి ప్రత్యేకంగా చెప్పుకోవడానికి ఏం లేదు. ఏదో అలా సాగిపోతాయి. ప్రవీణ్ లక్కరాజు సంగీతం పర్లేదు. అయితే విజువల్ గా సాంగ్స్ అంతలా ఆకట్టుకోవు. బ్యాక్ గ్రౌండ్ స్కోర్ గట్టిగా వినబడింది కానీ ఎఫెక్టివ్ గా లేదు. ఎడిటింగ్ జస్ట్ ఓకే. సినిమాటోగ్రఫీ సోసో గా సాగింది. మిగిలిన డిపార్ట్మెంట్స్ మాములే.

విజిల్ మోమెంట్స్:

• సెకండ్ హాఫ్ లో వచ్చే కొన్ని టెన్స్ సన్నివేశాలు

బోరింగ్ మోమెంట్స్:

• సాగతీతగా అనిపించే ఫస్ట్ హాఫ్
• నవ్వు తెప్పించని కామెడీ.

విశ్లేషణ: సినిమా మొదలుకావడమే మనం దీని నుండి ఎలాంటి ఔట్పుట్ ఆశించవచ్చో ఒక క్లారిటీ వచ్చేస్తుంది. బైక్ షోరూమ్ లో జరిగే తతంగమంతా చాలా ఆర్టిఫీషియల్ గా అనిపిస్తుంది. పైగా హీరో, హీరోయిన్ల మధ్య వచ్చే లవ్ ట్రాక్ అంత కన్విన్సింగ్ గా డిజైన్ చేసుకోలేదు. సినిమాకు మెయిన్ కాన్ఫ్లిక్ట్ పాయింట్ అయిన నరసింహ యాదవ్, భూషణ్ ల మధ్య గొడవే సరిగా అనిపించదు, ఇక దాని తర్వాత జరిగేదంతా ఎందుకో ప్రేక్షకుడికి అర్ధం కాదు. ఇంటర్వెల్ గా సాగదీసి సరిగ్గా దాని ముందు మెయిన్ కథలోకి వెళ్తాడు దర్శకుడు.

సెకండ్ హాఫ్ మొదలు బాగుంటుంది. కొన్ని టెన్స్ మూమెంట్స్ సినిమాపై ఆసక్తిని పెంచుతాయి. అయితే అలాంటి ఆశలు ఏం పెట్టుకోవాల్సిన అవసరం లేదని సినిమా కొంచెం ముందుకు కదలాగానే అర్ధమైపోతుంది. అయితే సినిమాలో ఏమైనా కాపాడే అంశాలు ఉన్నాయంటే అవి సెకండ్ హాఫ్ లో వచ్చేవే. ఇక ప్రీక్లైమాక్స్, క్లైమాక్స్ మన అంచనాలకు తగ్గట్లే ముగుస్తాయి. అయితే ఈ సినిమాకు ఈ టైటిల్ ఎందుకు పెట్టారన్న జస్టిఫికేషన్ ఉండదు.

ఫైనల్ పంచ్: రాంగ్ పార్కింగ్.

తెలుగుబులెటిన్.కామ్ రేటింగ్ : 2/5